Rabindranath Tagore

Dari Wikipedia baso Minang, ensiklopedia bebas
Lompek ka: navigasi, cari
Rabindranath Thakur
(diijo caro Inggirih: "Tagore")
Late-middle-aged bearded man in white robes looks to the left with serene composure.
Tagore k. 1915, taun inyo mandapek gala bangsawan dari George V. Tagore manulak gala ko, karano mamparotes pambunuahan Jallianwala Bagh di taun 1919.[1]
Lahia 7 Mei 1861
Kalkuta, India
Wafaik 7 Agustus 1941 (umua 80)
Kalkuta, India
Kabangsaan India
Suku bangso Benggala
Karajo Panyaia, panulih carito singkek, pangarang lagu, novelis, panulih drama, panulih esai, jo palukih
Pasangan iduik Mrinalini Devi (1883-1902)
Anak limo anak, duo lah maningga maso paja ketek
Karabaik Kaluargo Tagore
Panghargaan Adiah Nobel bidang Sastra (1913)
Tando tangan Close-up on a Bengali word handwritten with angular, jaunty letters.

Rabindranath Thakur, diijo caro Inggirih: Tagore, (uruih Benggali: রবীন্দ্রনাথ ঠাকুর, lahia 7 Mei 1861 – manigga 7 Agustus 1941), adolah surang panyaia jenius Benggala nan lah sabana baparan dalam pakambangan sastra jo musik di Asia Salatan. Inyo nan acok juo dipanggil Gurudev ko marupoan pangarang puisi tamusaua Gitanjali, nan "syairnyo sangaik manyintuah, sajuak jo endah", nan lah manyabaukannyo jadi urang bukan Eropa patamo nan mamanangan Adiah Nobel bidang Sastra di taun 1913. Karano tajamahan puisinyo nan dipandang spiritual dan panuah gairah, paribadinyo nan maanyuikan, rambuiknyo nan bagalombang, sarato mode bajunyo nan indak biaso, kasadonyo mambueknyo dipandang bak nabi dek dunia Baraik. "Prosanyo nan manawan jo puisinyo nan manyihia" pado umumnyo tatap indak dikataui di lua Benggala. Tagore lah bajaso mampakanakan bantuak prosa jo sajak baru sarato mamakai baso saari-ari ka dalam sastra Benggali, dangan baitu malapehannyo dari bantuak lamonyo nan badasar pado Sansekerta klasik. Inyo sangaik bapangaruah dalam mampakanakan budayo India ka Baraik jo sabaliaknyo, dan inyo umumnyo dipandang sabagai surang seniman kreatif India moderen nan takamuko.

Tagore barasa dari kaluargo Brahmana Pirali dari Kalkuta. Tagore mulai manulih puisi sadang inyo baumua salapan taun. Kutiko inyo baumua anam baleh, inyo mangaluaan puisi-puisi pantiang patamonyo dangan namo samaran Bhānusiṃha ("Singa Matoari"), nan dipandang jo para sastrawan macam karya sastra klasik nan lah lamo ilang. Inyo mulai manulih carito-carito singkek jo dramanyo, sarato manggunoan namo lahianyo, sajak 1877. Sabagai surang humanis, universalis-internasionalis, jo anti-nasionalis (manantang bapacahnyo ranah India-Pakistan-Bangladesh) nan lantang, inyo mancalo kakuasoan Inggirih, sarato sangaik mandukuang kamardekaan India dari Inggirih. Inyo nan tamasuak seniman Renaisans Benggala lah malaian banyak karya nan barupo lukisan, sketsa jo corat-coret, baratuih karangan, jo labiah-kurang duo ribu lagu. Paninggalannyo dipaliaro taruih di lambago pandidikan nan diadoannyo, Universitas Visva-Bharati.

Tagore lah pulo mamoderenan seni Benggali jo caro maubah bantuak-bantuak klasik sarato bateh-bateh kabahasoan nan dirasonyo kaku. Babagai novel, carito, lagu, drama tari, jo esainyo manyuaroan bamacam-macam masaalah politik jo paribadi. Gitanjali ("Pasambahan Lagu"), Gora (Rupo Rancak"), jo Ghare-Baire ("Rumah jo Dunia") adolah karya-karyanyo nan dipandang tarancak. Babagai syair, carito singkek, jo novelnyo lai juo mandapek sorotan atau pangakuan urang rami karano pamiliahan katonyo nan elok, pamakaian istilah saari-arinyo nan rancak jo sapatuiknyo, sarato isi paranuangannyo nan manggugah. Duo karangannyo nan babedo, kudian dipilih dek duo bangso jadi lagu kebangsaan mareka: Jana Gana Mana dek India jo Amar Shonar Bangla dek Bangladesh.

Rujuakan[suntiang | sunting sumber]

  1. ^ "Tagore renounced his Knighthood in protest for Jalianwalla Bagh mass killing ", The Times of India, (Bennett, Coleman & Co. Ltd.), 13 April 2011. Diakses pado 17 Pebruari 2012.