Pasambahan

Pasambahan adolah pambaritahuan jo hormat, nan barasa dari kato sambah nan diagiah imbuhan "pa-an". Sambah dalam baso Indonesia bararti panyatoan hormat jo khidmat, kato jo pakatoan nan ditujukan kapado urang nan dimuliakan. Pasambahan marupokan pambicaroan duo pihak, dialog antaro si pangka jo si alek untuak manyampaikan makasuik jo tujuan jo hormat. Misanyo manyampaian makasuik mampasilahkan tamu manikmati makanan nan alah bahidangkan. Manuruik ciri bahaso, pasambahan digolongkan kapado puisi atau prosa bairama.

Pasambahan ko digunokan dalam upacaro adaik, di antaronyo 1) batagak gala, 2) upacaro nan bahubuangan jo pakawinan, 3) upacaro nan bahubuangan jo kamatian, 4) upacaro nan bahubuangan jo batagak rumah, jo 5) upacaro nan bahubuangan jo kalahian. Pasambahan ko biasonyo dilakukan dalam kaadoan duduak baselo.