Iriak onjai
Iriak Onjai iyolah suatu bantuak sastra lisan dari Rao, Pasaman Timur, tapeknyo di Koto Panjang jo Bangkak. Bantuak sastra lisan ko iyolah barupo pantun nan didendangkan sacaro bagantian dek sakalompok urang laki-laki. Tradisi ko dikarajoan katiko urang kampuang sadang panen padi. Caro mangarajoannyo iyolah jo laki-laki nan babaleh pantun jo sakalompok laki-laki nan lain.
Tradisi ko dikarajoan di tangah sawah, iko sasuai jo namonyo iyolah Iriak Onjai. Iriak atau mairiak iyolah mamisahkan padi dari tangkainyo nan sabalumnyo padi tu alah dikumpuakan di lampok. Lampok ditagakkan di tangah sawah nan leba, caronyo managakan tenda di atehnyo, dalam tenda tu lah padi-padi kumpuakan. Antaro tanah jo lantai diagiah jarak jo papan nan disusun agak bajarak-jarak, supayo ado lubang-lubang ketek tampek jatuah padi ka bawahnyo (ka tanah nan alah diagiah aleh). Caro mamisahan padi dari tangkainyo iyolah jo manggesek-gesekan kaduo kaki baganti-ganti sampai padi tapisah dari tangkainyo. Onjak kaki nan baganti-ganti ko lah nan dinamokan Onjai (sarupo jalan di tampek). Urangnyo dak manantu, antaro duo sampai limo baleh urang atau labiah.
Sambia mairiak, urang laki-laki bapantun nan diiriangkan jo rabano jo mamakai bahaso Minang, dialek Rao. Samantaro urang padusi bakarajo mangumpuaan padi jo manampinyo, anyo dak sato babaleh pantun. Bagi urang laki-laki nan alun punyo bini, tradisi ko dikarajoan sakaligus untuak mancari bini. Dek itulah pantun-pantun tu akan ditujukannyo ka padusi nan disukoinyo, sahinggo padusi tu akan malu. Kalau lai cocok, anyo baduo ka malanjuikan hubungannyo. Salain itu tradisi ko juo untuak parintang sahinggo dapek mailangkan raso latiah katiko mairiak.
Tapi, kini sastra lisan Iriak Onjai ko dak ado ditampilkan lai dek urang kampuang dek zaman lah bakambang jo ganarasi alah batuka. Salain tu ilangnyo tradissi ko dek banyaknyo urang kampuang nan indak ka sawah lai dek jauah dari rumah
Caliak juo
[suntiang | suntiang sumber]Rujuakan
[suntiang | suntiang sumber]- Amir, Adriyeti Dkk (2006). Pemetaan Sastra Lisan Minangkabau. Padang: Andalas University Presss. pp. 218. ISBN 979-1097-08-9.
