Bokoi
Bokoi atau bokkoi (Macaca pagensis) adolah spesies monyet nan manyebar tabateh (endemik) di Kapulauan Mentawai, di sabalah barat Sumatera. Namo iko biasonyo dipakai dek panduduak Kapulauan Mentawai untuak manyabuik binatang tu. Namo lainnyo adolah baruak Mentawai, sadangkan dalam bahaso Inggirih disabuik jo namo Pagai Island Macaque.[1][2] Epitet spesifiknyo, iolah pagensis, bararti "barasa dari Pagai"; marujuk kapado pulau-pulau Pagai di Kapulauan Mantawai sabagai habitat asa baruak iko.
Gambaran[suntiang | suntiang sumber]
Umumnyo bokoi mirip jo baruak pado umumnyo. Beda dari bokoi lain talatak pado rambuik bagian pipi jo mahkota. Bagian pipi bokoi labiah itam dari pado bagian pipi baruak lain, sadangkan mahkota bokoi bawarna coklat jo rambut di dahi nan labiah panjang. Bokoi punyo kantong pipi nan tampak jaleh. Pungguang jo tangannyo acok digunokan untuak mambawok barang jo makanan. Rambuik bokoi bawarna coklat kalam di bagian balakang, samantaro di bagian leher, bahu jo bagian bawah bawarna pucek. Kaki bokoi juo bawarna coklat.[3]
Bokoi jantan mampunyoi panjang badan antaro 45 sampai 55 cm. Sadangkan untuak bokoi batina punyo panjang badan antaro 40 hinggo 45 cm. Bokoi punyo ikua nan cukuik panjang, baik bokoi batino maupun jantan punyo ukuran panjangnyo antaro 10 sampai 16 cm. Baruak jiniah iko punyo ukuran nan cukuik gadang, bokoi jantan rata-rata punyo bobot antaro 6 sampai 9 kg. Bokoi batino punyo barek nan agak ringan antaro 4,5 sampai 6 kg.[3]
Parilaku[suntiang | suntiang sumber]
Bokoi adolah binatang nan aktif pado siang hari atau acok disabuik jo istilah diurnal. Bokoi iduik dalam kalompok, satiok kalompok tadiri dari limo sampai 25 ikua. Sakalompok bokoi nan biasonyo dipimpin dek saikua jantan. Kadang-kadang, ado cakak antaro pamimpin bokoi nan ciek jo nan lain untuka mamparabuikan bokoi batino.[4]
Bokoi bajalan jo caro marangkak untuak mancari makan. Makanan bokoi adolah daun, bungo, bijinya, sarato buah-buahan. Hewan iko biasonyo banyak ditamui di ateh batang kayu nan tingginyo antaro 24 sampai 36 meter. Kutiko inyo mancari makanan, kalompok bokoi bajalan samo-samo jo pajantannyo. Baruak jantan akan maagaiah tando untuak mangecek jo suaro nan khas ka batino atau kalompoknyo.[4]
Bokoi bakambangbiak jo cara beranak. Batino nan lah siap kawin, inyo ka manampakkan alat-alat kelaminnyonan lah bengkak. Maso kehamilan bokoi adolah limo sampai anam bulan, dan kabanyakan boki betina hanyo malahiakan ciek bayi. Sasudah inyo malayiekan anaknyo, bokoi batino akan mamakan plasentanyo. Satalah itu, anaknyo dibarasiahannyo jo caro manjileknyo.[4]
Habitat jo penyebaran[suntiang | suntiang sumber]
Bokoi adolah binatang endemik Kepulauan Mentawai. Hewan iko acok ditamui di babarapo habitat sarupo hutan bakau, hutan pantai, hutan sekunder, hutan primer, jo hutan dakek pamukiman panduduak.[5] Panyebaran bokoi hanyo dibatasi di Pulau Pagai Selatan, Pulau Pagai Utara, jo Pulau Sipora di Kapulauan Mentawai, Sumatra.[6]
Status konservasi[suntiang | suntiang sumber]
Bokoi kini kabaradoannyo terancam punah. Daftar Merah IUCN manyatokan bokoi dalam kategori Kritis (Critically Endangered). Paburuan bokoi nan balabiahan mambuat jumlah populasinyo semakin bakurang. Di sisi lain, paningkatan panduduak di Kapulauan Mentawai manyababkan paningkatan kebutuhan untuak tampek tingga jo lahan patani. Hal iko mampengaruhi tutupan hutan nan ado di pulau-pulau tu, iyolah banyak hutan nan dibukak manjadi daerah pamukiman jo ladang. Populasi bokoi kini hanyo tingga sakitar 2.100-3.700 ikua. Samantaro pado taun 1980-an populasi iko masih tacatat sabanyak 15.000 ikua.[7]
Predator dari bokoi adolah elang, ular bido, ular sanca, jo manusia. Manusia adolah predator nan sangaik parah nan dapek manyababkan populasi bokai manurun sacaro drastis.[6]
Mitos[suntiang | suntiang sumber]
Di Mantawai ado mitos atau carito rakyat yang bakaitan jo bokoi ko. Carito nan bakambang di tangah-tangah masyarakaik lokal iko mancaritoan tentang bokoi atau baruak nan pai mamanciang. Dalam bahaso Mantawainyo di sabuik Siteut siei murura. Carito rakyat iko barisikan tetang nasihat.[8]
Rujuakan[suntiang | suntiang sumber]
- ↑ "Melestarikan Alam Indonesia". Yayasan Obor Indonesia. Diakses tanggal 30 September 2023.
- ↑ Groves, C.P. (2005). Wilson, D.E.; Reeder, D.M.. eds. Mammal Species of the World: A Taxonomic and Geographic Reference (edisi ke-3rd). Baltimore: Johns Hopkins University Press. ISBN 0-801-88221-4. OCLC 62265494. http://www.bucknell.edu/msw3/browse.asp?id=12100558.
- ↑ a b "Mentawai macaque". Arkive. Diarsipkan dari versi asli tanggal 2015-09-23. Diakses tanggal 30 September 2023.
- ↑ a b c "Macaca pagensis". Encyclopedia of Life. Diakses tanggal 30 September 2023.
- ↑ "Population genetics of the two Mentawai macaques" (PDF). Siberut Island.org. Diarsipkan dari versi asli (PDF) tanggal 5 March 2016. Diakses tanggal 30 September 2023.[pautan nonaktif salamonyo]
- ↑ a b "Mentawai macaque". The Primata. Diarsipkan dari versi asli tanggal 2012-11-03. Diakses tanggal 30 Septermber 2023.
- ↑ "Macaca pagensis". IUCN Red List. Diakses tanggal 30 September 2023.
- ↑ Spina, Bruno (1981). Mitos dan Legenda Suku Mentawai. Jakarta: PN Balai Pustaka. pp. 201.