Abdul Karim
Abdul Karim adolah pajuang kamardekaan dari Minangkabau dan urang perbankan takamuko nan ikuik mandirian Bank Negara Indonesia (BNI). Inyo parnah manjabat Presiden Direktur BNI salamo taun 1953 sampai 1959. Abdul Karim lahia pado 6 Februari 1915 di Nagari Koto Gadang, Agam, dan maningga di Jakarta pado 4 Februari 1996.[1]
Kaluarga[suntiang | suntiang sumber]
Abdul Karim adolah anak paliang ketek dari pasangan H. Abdul Halim dan Zubaidah. Abdul Karim punyo anam dunsanak yaitu Zainal Gaoz, Gainan Razak, Halimah Djazil, Nizar Djaloes, A. Latief, dan H. Ramli. Pado taun 1945, katiko barusia 30 taun, Abdul Karim manikahi gadih sakampungnyo di Koto Gadang banamo Nazma nan bakarajo sabagai guru sakolah rakyat di Bukittinggi. Dari pakawinannyo jo Nazma, Abdul Karim dikaruniai limo urang anak, yaitu Linggakusuma Karim, Aswin Manwantara Karim, Komala Bahri Karim, Zakirman Karim, dan Nazti Hendraningsing Satrio Adji.[1]
Sakolah[suntiang | suntiang sumber]
Abdul Karim mulai basikola di HIS (Hollandsch-Inlandsche School) Koto Gadang pado taun 1921-1928. Sakolah iko mamakai bahaso Belanda. Ide pandiriannyo alah dimulai sajak mulo abaik ka-20 yaitu pado taun 1906 oleh sabuah studiefonds nan banamo SKG (Studiefonds Kota Gedang).[2] Lulusan HIS umumnyo manaruihan sakolahnyo ka MULO, AMS, dan HBS nan ado di babarapo kota di Sumatera jo Jawa, dan sakolah tinggi kedokteran, hukum, teknik di Jawa, bahkan ka Belanda. Demikian pulo Abdul Karim. Sasudah luluih HIS, inyo manaruihan baraja di MULO (Meer Uitgebreid Lager Onderwijs) Bukittinggi salamo taun 1928-1932.[1]
Sajak zaman kolonial, banyak urang Koto Gadang nan mandapek pendidikan tinggi dan manjabaik posisi penting di tangah masyarakaik. Katiko Sekolah Raja mulai dibukak, muriknyo banyak nan barasal dari Koto Gadang, bahkan guru bahaso Malayu partamo nan mangajar di sakolah itu adalah urang Koto Gadang. Koto Gadang juo tanamo karano karajinan tangan anak nagarinyo.[3]
Sasudah luluih dari MULO, Abdul Karim pai marantau ka Batavia untuak malanjuikan pendidikannyo di AMS (Algemene Middelbare School) pado 1932-1935 dan RHS (Rechtshoogeschool) pado 1942-1945.[1] Salain baraja hukum di RHS, Abdul Karim bisa pulo babarapo bahaso lua, di antaronyo bahaso Inggris, Perancis, jo Jerman. Katiko di bangku kuliah itu pulo, inyo manjadi aktivis mahasiswa Islam sarato parnah manjabat sabagai katua pakumpulan Studenten Islam Studieclub basamo sajumlah kawan-kawannyo sarupo Prawoto Mangunkusumo, Mr. Moh. Roem, jo Mr. Yusuf Wibisono. Sasudah luluih dari RHS, Abdul Karim bakarajo sabagai panasihat hukum di Jakarta.[1]
Karajo[suntiang | suntiang sumber]
Abdul Karim mulai bakarajo di dunia perbankan sajak akhir taun 1945, yaitu sasudah disahkannyo Keputusan Presiden tantang pandirian Bank Negara pado 16 September 1945. Inyo ditunjuak manjadi direktur sakaligus sekretaris Bank Negara nan partamo mandampingi Margono Djojohadikoesoemo nan manjabat sabagai direktur utama. Salain itu, Abdul Karim parnah pulo manjabat sekretaris Fonds Kemerdekaan nan badiri pado bulan Oktober 1945.[1]
Sasudah panyarahan kadaulatan dari Belanda ka Indonesia pado taun 1949, Abdul Karim tatap manjabat sabagai direktur Bank Negara sampai taun 1953. Samantaro itu, rencana ka manjadian Bank Negara sabagai bank sentral indak barhasil karano pamarintah mambali De Javasche Bank dari Belanda dan manjadikannyo sabagai Bank Indonesia (BI) pado taun 1953. Bank Negara kudian barubah manjadi bank umum milik negara nan banamo Bank Negara Indonesia (BNI) 1946. Pado 1953 itu, Abdul Karim diangkek manjadi Presiden Direktur BNI 1946 manggantian Margono Djojohadikoesoemo. Inyo kudian manjabat sampai taun 1959.[1]
Katiko manjabat sabagai direktur BNI, Abdul Karim mandirian CTC (Central Trading Company) dan sakaligus manjadi presiden komisaris. CTC adolah parusahaan dagang partamo milik negara nan baskala internasional. Salain itu, Abdul Karim tacatat pulo sabagai komisaris ISC (Indonesia Service Company) nan didirian oleh pengusaha Hasjim Ning. Inyo pulo mandirian Maskapai Asuransi Murni, parusahaan asuransi partamo milik negara, dan Djakarta Lloyd, parusahaan pakapalan partamo milik Indonesia.[1]
Abdul Karim kudian manjadi panasihat ahli Menteri Perdagangan katiko dijabat oleh Adam Malik dan panasihat ahli Menteri Perindustrian era Mayjen TNI M. Jusuf pado taun 1964-1966. Inyo parnah pulo manjabat panasihat ahli Menteri Keuangan salamo taun 1966 sampai 1972.[1]
Kagiatan Politik[suntiang | suntiang sumber]
Pado patangahan taun 1947, Abdul Karim jo Wakil Presiden Mohammad Hatta barangkek ka Bukittinggi untuk mamimpin pamarintahan republik di Sumatera sakaligus manyiapkan rancana pandirian BNI. Katiko barado di Bukittinggi itu, inyo parnah pulo mandampingi Hatta ka India dalam upayo mandapekkan dukungan dan pangakuan kamardekaan dari India. Pado maso itu, Indonesia barado dalam situasi parang malawan Belanda nan ingin manguasai balik wilayah Indonesia. [1]
Pado 17 September 1947, Abdul Karim diangkek oleh Hatta manjadi katua Panitia Pengumpulan Emas nan hasilnyo digunoan untuak mambali kapa tabang. Basamo jo sajumlah pamimpin di Sumatera Barat sarupo Sutan Mohammad Rasjid, Chatib Sulaiman, Ismael Lengah, dan lainnyo, Panitia itu barasil mangumpuan 15 kg ameh pahiasan dari kaum ibu di Minangkabau, tarutamo dari Bukittinggi, Batipuh dan X Koto, nan basimpati pado upayo mampatahankan kamardekaan. Hasilnyo dibalian ka sabuah kapa tabang Avro Anson VH-BBY di Singapura. Kapa tabang itu banomor register RI 003. Sabagian sumbangan nan takumpua dari Koto Gadang diuruih dek Abdul Karim.[1] Sayangnyo, kapa tabang itu jatuh di lapeh pantai Malaka, tapeknyo di Tanjung Hantu, Malaysia pado 14 Desember 1947,[2] dalam panabangan dari Songkla, Thailand manuju lapangan tabang Gadut di Bukittinggi. Kajadian itu maakibaikan gugurnyo duo perwira TNI AU, yaitu Halim Perdanakusuma jo Iswahjudi.[1]
Katiko Bung Karno bakunjuang ka Sumatera Barat pado Juni 1948, Abdul Karim dan sajumlah tokoh sarupo Dr. Soekiman, Dr. Asikin, Winoto Danuasmoro, dan lainnyo ikuik mandampingi. Pado bulan Juli 1948, Bung Karno dan Abdul Karim barangkek ka Koto Gadang. Bung Karno mangunjungi balai adaik Koto Gadang, rumah kediaman Abdul Karim, sarato waterleiding–parusahaan aia minum maso kolonial Belanda, nan diresmian pado taun 1933. Salamo patamuannyo di balai adaik Koto Gadang, Bung Karno manyampaian tarimo kasih untuak kabaikan masyarakat Koto Gadang nan alah mambantu pamarintah mambali kapa tabang Avro Anson.[4]
Referensi[suntiang | suntiang sumber]
- ↑ a b c d e f g h i j k Hasril Chaniago (Eds). (2023). Ensiklopedia Tokoh 1001 Orang Minang. Padang: UMSB Press-Yayasan Pusat Kebudayaan Minangkabau.
- ↑ Azizah Etek, Mursjid A.M., Arfan B.R. (2007). Koto Gadang Masa Kolonial. Yogyakarta: LKiS.
- ↑ Gusti Asnan. (2003). Kamus Sejarah Minangkabau. Padang: Pusat Pengkajian Islam dan Minangkabau (PPIM).
- ↑ "Jangan Lupakan Jasa Warga Koto Gadang, Warga Belikan Pesawat Avro Avron untuk RI". Republika Online (dalam bahasa Indonesia). 2023-08-17. Diakses tanggal 2023-12-17.