Monumen Panyarangan Pasa Banda Buek

Monumen Panyarangan Pasa Banda Buek

Monumen Panyarangan Pasa Banda Buek adolah monumen nan dibangun untuak maingek panyarangan pasukan Balando ka Pasa Banda Buek, pado tanggal 18 Januari 1947. Sangkek itu, tapeknyo sasudah proklamasi kamardekaan, Balando manguasoi Kota Padang. Indak ado surang alah juo urang Padang nan talok tingga di Padang, kacuali nan bagak bajuang untuak malawan pasukan Balando. Akibaik Balando manguasai Padang, mambuek pasa-pasa di Kota Padang, sabuiklah Pasa Raya Padang jo kadai-kadai urang Chino pun alah abih tutuik sadonyo katiko tu. Jadi, pasa Banda Buek lah nan satu-satunyo pasa nan manjadi tulang pungguang parekonomian masyarakaik di Padang.

Kajadian Panyarangan

Tapeknyo Sabtu tanggal 18 Januari 1947, Pasa Banda Buek rami pangunjuang karano hari balainyo. Pasa wakatu itu sadang sasak-sasaknyo. Dek sangaik raminyo, urang manggaleh sampai kalua pasa bagai. Sadang rami-rami cando itu, Balando manembaki pasa dari kapa tabang. Urang-urang di Pasa Banda Buek bagarayangan kian kamari dek takajuik jo takuik kanai tembak. Korban bajatuahan. Tarutamo amak-amak jo anak-anak. Ado sakitar 50 urang nan maningga, salabiahnyo banyak juo nan luko-luko, tu lansuang dilarian ka rumah sakik.

Panyabab Balando manyarang wakatu adolah dek karano mancaliak bendera sirah putiah bakibar di Kantua Camaik Lubuak Kilangan nan sarampia jo Pasa Banda Buek. Baitulah jaeknyo urang Balando. Kini puluahan maik tabujua, ado nan ndak babatuak lai karano ancua kadai ledakan. Ciek-ciek urang baransua-ansua maangkek maik nan tabujua untuak lansuang dikubuan.

Bisuaknyo, Balando manyarang baliak. Batambah banyaklah korban. Sampai limo hari masih banyak juo maik nan alun dapek dikubua, dek karano tanago sagetek jo ditambah payah mangubua di malam hari karano panarangan nan sadang sayuik. Ado nan mausulkan maik-maik tu dibaka sajo dek baun busuak alah sampai kama-kama. Takuiknyo kok tabik pulo panyakik-panyakik dek karano baun busuak tu. Syukurnyo, Abdoel Munaf, anggota Batalyon I pimpinan Anwar Badu maimbau sadonyo urang-urang di Pasa Banda Buek untuak manolong mangubua maik-maik tu. Dek karano usaho tu, siang tanggal 25 Januari 1947 sadonyo maik-maik tu salasai dikubua. Supayo kajadian tu dapek taruik diingek, mako dibangunlah monumen Tugu Panyarangan Pasa Banda Buek nan dirancang dek Drs. Amril M. Y. Dt. Garang.

Pranala lua

• https://padanglamo.com/banda-buek-berdarah Archived 2021-07-22 di Wayback Machine.