Marosok

Marosok (dalam bahaso Indonesia iolah meraba) iyolah suatu aktivitas jua bali antaro panjua jo pambali manggunoan bahaso isyaraik. Tanpa mangecek, kaduo balah pihak cukuik basalaman dan mamainan tiok-tiok jari tangan untuak batransaksi. Panjua dan pambali akan saliang bajabaik tangan layaknyo basalaman sambia mamainan jari-jari tangan jo manggunoan bahaso isyaraik dari nilai-nilai angko rupiah nan alah disatujui basamo. Saat transaksi balangsuang, biasonyo tangannyo batutuikan jo kain saruang atau kadang handuak, topi, dan lain-lainnyo. Hal iko batujuan supayo urang lain indak mancaliak proses jua bali tasabuik. Tradisi marosok dapek dijumpoi di Pasa Taranak Batusangkar, Kabupaten Tanah Datar, Sumatera Barat. Di pasa iko, kagiatan marosok dapek dijumpoi pado hari Salasa sajo.

Tradisi marosok iko dimulai katiko surang pambali alah mamiliah taranak nan disukoi. Lalu inyo akan maago harago jawi atau kabau jo panjuanyo. Dalam marosok, tiok-tiok jari malambangan angko puluahan, ratusan, ribuan, bahkan jutaan rupiah. Contohnyo, padagang nio manjua taranaknyo saharago Rp6.400.000, mangko inyo mamacik jari talunjuak pambali nan malambangan angko Rp10.000.000 dikurangan Rp4.000.000. Adopun untuak manunjuakan Rp 400.000, ampek jari nan digoyangan tadi diganggam baliak jo dihantakan. Kok alah disapakati, transaksi barakhia jo harago Rp6.400.000.

Para padagang marosok supayo harago ternak nan dibalinya indak diketahui dek banyak urang. Transaksi baduoan mode itu memang acok dilakukan di satiok pasa taranak, tantu sajo jo caro nan alah disepakati masyarakaik masiang-masiang daerah.

Asa usua

Indak ado nan mangatahui sacaro pasti, bilo marosok iko dimulai. Sajumlah padagang taranak hanyo mangakui, tradisi iko alah dimulai sajak zaman rajo-rajo di Minangkabau dan ditarimo sacaro turun-tamurun.

Makna simbol jari‐jari tangan dalam maago

1. Untuak bilangan satu simbolnyo jari talunjuak.
2. Untuak bilangan duo simbolnyo jari talunjuak jo jari tangah dipacik sacaro basamoan.
3. Untuak bilangan tigo simbolnyo jari talunjuak, jari tangah, jo jari manih dipacik sacaro basamoan.
4. Untuak bilangan ampek simbolnyo jari talunjuak, jari tangah, jari manih jo jari kalingkiang dipacik sacaro basamoan
5. Untuak bilangan limo simbolnyo mamacik jari talunjuak kudian dilapehan. Kuudian pacik kalimo jari sacaro basamoan sarato ditakan ka bawah.
6. Untuak bilangan anam simbolnyo mamacik jari talunjuak, jari tangah, jari manih, jo kalingkiang sacaro basamoan sarato ditakan ka bawah.
7. Untuak bilangan tujuah simbolnyo mamacik jari talunjuak, jari tangah jo jari manih sacaro bersamaan sarato ditakan ka bawah.
8. Untuak bilangan salapan simbolnyo mamacik jari talunjuak, jari tangah sacaro basamoan sarato ditakan ka bawah.
9. Untuak bilangan sambilan simbolnyo mamacik jari talunjuak kudian dilapehan, lalu pacik baliak jari talunjuak tadi sarato ditakan ka bawah.
10. Untuak bilangan satangah simbolnyo limo jari
11. Untuak bilangan saparampek simbolnyo ibu jari.

Caro garak-garik jari dalam hal pangurangan jo panambahan harago

Dalam hal mangurangi jo manambah harago dalam maago dilakukan jo caro manakan jari atau mamutas talapak tangan. Kalau jari nan dipacik ditakan ka ateh aratinyo mintak panambahan harago dan kalau ditakan ka bawah aratinyo mintak pangurangan harago. Barapo pamintaan panambahan jo pangurangan harago ko diwujuikan jo caro mamacik jari-jari tatantu sasuai jo nan diinginkan, misakan pambali nio mintak pangurangan harago kapado panjua sabanyak Rp. 250.000,- (duo ratuih limo puluah ribu rupiah), pambali mamacik ampu jari tangan panjua jo manakannyo ka bawah. Baitu juo sabaliaknyo kok mintak panambahan ampu jari ditakan ka ateh.