Benteng Fort de Kock

Benteng Fort de Kock kini iko manjadi tujuan wisata di kota Bukitinggi

Fort de Kock adolah benteng paninggalan Balando nan ado di Kota Bukittinggi , Sumatera Barat, Indonesia. Benteng iko ditagakan dek Kapten Bouer pado taun 1825 pado maso Hendrik Merkus de Kock sawakatu manjadi komandan Der Troepen sarato Wakie Gubernur Jenderal Hindia Balando, karano itulah benteng iko dikana jo namo Benteng Fort De Kock. Benteng nan talatak di ateh Bukit Jirek iko digunoan dek Tentara Balando sabagai kubu partahanan dari parlawanan rakyaik Minangkabau terutamo sajak malatuihnyo Parang Paderi pado taun 1821-1837. Di dakek benteng masih ado juo nampak badia-badia jaman saisuak tapeknyo pado abaik ka 19. Pado tahun-tahun selanjuiknyo, di dakek benteng iko tumbuah  pulo kota nan diagia namo Fort de Kock, kini Bukittinggi.

Sajarah

Poto benteng Fort de Kock, diambiak antaro taun 1900-1940

Benteng Fort de Kock digunoan dek Tentara Balando sabagai kubu partahanan dari parlawanan rakyaik Minangkabau tarutamo sajak malatuihnyo Parang Paderi pado taun 1821-1837 .Samaso pamarintahan Bealan­do, Bukittinggi dijadian sabagai  pusek pamearintahan, kota iko diseabuik seabagai Gemetelyk Resort pado taun 1828. Sajak taun 1825 pamarintah Kolonial Balan­do alah menagakan ciek benteng di kota iko sabagai tampek partahanan, nan sampai kini banyak urang asiang dapek maliek langsuang benteng nan banamo Fort de Kock tu. Salain tu, kota iko ndak hanyo dijadian sabagai pusek pamearintahan sarato jo tampek partahanan dek pamarintah kolonial Balando, tapi dijadiaan juo sabagai tampek malapeh panek dek para opsir Balando nan berado di wilayah jajahannyo.

Fort de Kock diba­ngun juo sabagai tando bahwasanyo Kolonial Balando alah dapek manduduki daerah di Sumatera Barat. Benteng itu maru­pokan tando panjajahan dan lawehnyo kakuasaan Balando untuak wilayah Bukittinggi,Agam, jo Pasaman. Balando yo bana cadiak untuak barado di Su­ma­tera Barat, inyo maman­faaikan konflik intern pado wakatu itu, yaitunyo konflik nan tajadi antaro kalompok adaik jo kalompok agamo. sarato Balando tu ikuik mambantu kalompok adaik, guno manakan kalompok aga­mo salamo Parang Paderi nan tajadi taun 1821 hinggo taun 1837.

Belando nan mambantu kaum adaik melahiekan sabuah kato sapakaik bahwasanyo Balando dibuliahan mambangun basis partahan militer nan dibangun Kapitain Bauer di puncak Bukit Jirek Hill, nan kamudian diagia namo Fort de Kock.

Sasudah mambangun di Bukit Jirek, Pamarintah Kolo­nial Belando pun melanjuikan rencananyo maambiek alih babarapo bukik lai mode Bukik Sarang Gagak, Bukik Tambun Tulang, Bukik Cubadak Bungkuak, jo Bukik Malam­bung. Di daerah tu juo dibangun gedung kantua, rumah dinas pamarintah, kom­pleks pamakaman, pasa, sarana transportasi, sakolah sarato jo tampek rekreasi. Pambangunan nan dilakuan dek pamarintahan Kolonial Balando tu dalam istilah Minangkabau disabuik jo “tajua nagari ka Bulando” nan artinyo dalam bahaso indonesia Terjual nagari pado Balando. Pado maso tu Kolonial Balando manguasai 75 persen wilayah dari limo desa nan dijadian pusek usaho jua bali..

Kaadaan kini

Sajak direnovasi pado taun 2002 lalu dek pamarintah daerah, Fort de Kock, kawasan benteng Fort de Kock kini barubah manjadi Taman Kota Bukittinggi (Bukittinggi City Park) jo Taman Buruang Tropis (Tropical Bird Park). sampai  kini, Benteng Fort de Kock masih ado sabagai bangunan bacat putih-hijau satinggi 20 m. Benteng Fort de Kock disaratoi jo badia ketek di kaampek suduiknyo. Kawasan dakek benteng alah dipuga dek pamarintah daerah manjadi sabuah taman jo banyak papohonan rindang sarato ado pulo mainan anak-anak.

Benteng iko barado di lokasi nan samo jo Kabun Binatang Bukittinggi sarato jo Museum Rumah Adaik Baanjuang. Kawasan benteng lataknyo di bukik sabalah kida pintu masuak sabaliaknyo kawasan kabun binatang jo museum baabantuak rumah gadang tu barado di bukik sabalah suok. Kaduonyo dihubungan dek Jambatan Limpapeh nan di bawahnyo adolah jalan gadang dalam kota Bukittinggi. Kawasan iko hanyo bajarak 1 km dari pusaek kota Bukittinggi di kawasan Jam Gadang, tapeknyo di jalan Tuanku nan Renceh.

Benteng iko adolah ciek dari 2 benteng belando nan ado di sumatera barat , nan ciek lai talatak di Batusangkar namonyo benteng Fort Van der Capellen karano 2 kota ikolah dahulunyo nan paliang payah dikalahan dek balando katiko Parang Paderi.

Sumbernyo

• Amir B, 2000, “Sejarah Sumatera Barat. Fakultas Ilmu Sosial”, UNP, Padang,

Liek Pulo

• Fort Van der Capellen