Bada masiak

Bada Masiak adolah makanan olahan nan tabuek dari sajinih ikan ketek, nan disabuik jo namo ikan Bada (Rasbora argyrotaenia). Ikan Bada Masiak adolah produk paliang tanamo dari Danau Maninjau. Spesies ikan ko ado ditamuan juo di danau jo batang aia lainnyo di Sumatera, Jawa, Kalimantan, bahkan di Samananjuang Malaysia, Thailand, jo Filipina; tapi lain pulo disabuik namonyo. Bantuak ikan Bada ukurannyo anyo sagadang jari kalingkiang jo jari manih, panjangnyo +/- 7 cm.

Dalam pangolahannyo, Bada ko mesti dibuang paruiknyo; sakalipun lah dibuang tapi kok basuah indak barasiah mako bada ko ka jadi paik, mungkin dek ampadunyo. Kaistimewaan Bada Masiak (Bada Basalai) iolah ka batuka warnanyo jadi pirau kaitam-itaman, baiak digulai atau digoreang, jo salapeh makantu taraso angek-angek diarakuangan. Salain tu, ikan Bada nan basah dapek juo lansuang digulai asam padeh atau basantan, atau bagoreang.