Surau Latiah

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Surau Latiah
Cagar budaya Surau Latiah.jpg

Surau Latiah

Latak Kampai Tabu Karambia, Lubuk Sikarah, Kota Solok, Sumatra Barat, Indonesia
Afiliasi agamo Islam
Kapamimpinan Wakaf
Deskripsi arsitektur
Jinih arsitektur Surau
Gaya arsitektur Minangkabau
Pambukoan tanah 1902
Spesifikasi
Panjang 21,5 meter
Leba 11 meter

Surau Latiah barado di Kampai Tabu Karambia, Lubuk Sikarah, Kota Solok, Sumatra Barat, Indonesia. Surau iko didirian pado awa abaik ka-19 dek Syekh Sihalahan. Bangunannyo babantuak manyarupoi rumah gadang, rumah adaik tradisonal Minangkabau. Sajak didirian sampai kini, konstruksinyo indak banyak mangalami parubahan, kacuali bagian dindiang nan alah diagia plester dan material atok nan alah baganti dari ijuak manjadi seng.[1][2]

Surau iko alah ditetapkan sabagai cagar budaya nan dilinduangi dek pemerintah pado 2007.[3][2]

Sijarah[suntiang | suntiang sumber]

Kabaradoan Surau Latiah bakaitan jo figur Syekh Sihalahan, saurang ulama Minangkabau nan mandakwahkan Islam di daerah Solok dan sakitarnyo. Inyo banamo asli Husin bin Mahmud, sadangkan Sihalahan marujuak pado namo daerah di Tanah Datar, tampek inyo dulunyo pernah badakwah sabalum pindah ke Solok. Samaso hiduiknyo, Syekh Sihalahan pernah baraja di babagai tampek, terakhir inyo baguru kapado Syekh Aminullah, cucu dari Syekh Supayang. Katiko badakwah di Solok, inyo mandapek hambatan dari kakaknyo surang, saurang pamuko adaik bagala Datuak Bandaro dengan jabatan Angku Lareh. Jabatan iko mambuek kakaknyo cenderung bapihak kapado Balanda.[2][4][5]

Manuruik panalusuran Balai Pelestarian Peninggalan Purbakala (BP3) Batusangkar, Surau Latiah didirikan pado 1902. Surau iko marupoan salah satu bangunan ibadah umaik Muslim tatua di Kota Solok.[6] Sacaro fisik, bantuak bangunan surau manyarupoi rumah gadang dengan atok gonjong. Satu-satunyo komponen ruang nan mancirian sabagai tampek peribadatan adolah mihrab di bagian tangah sisi barat.[7]

Katiko tagak, Surau Latiah awalnyo hanyo badindiang bambu nan dianyam atau disabuik sasak dan baatok ijuak. Sasudah Syekh Sihalahan maningga pado 9 Muharram 1336 (26 Oktober 1917), dindiang-dindiang bangunan diagia plester jo semen. Bagian lantai jo loteng alah diganti jo material baru pado 1997 dek BP3 Batusangkar. Pado bagian tonggak dalam surau (asli) alah dilapisi dek ahli warih jo papan guno mancagah rayap.[2][8]

Salain sabagai tampek ibadah sarato jo manuntuik ilmu, Surau Latiah dahulunyo digunoan sabagai tampek ibadah suluk. Suluk marupoan ajaran tasawuf dalam Islam nan artinyo jalan atau caro untuak mandakekan diri pado Allah. Indak kasado surau dapek manjadi tampek suluk, karano tabatehnyo ulama nan bisa mambimbing urang-urang nan ingin malakukan ibadah suluk. Para peserta suluk di Surau Latiah barasa dari babagai daerah, sarupo: Tanah Datar, Padang Panjang, jo Sijunjung. Namun tradisi basuluk di surau iko alah indak diadoan lai, tarakhie kali diadoan pado 2003.[5][9]

Konstruksi[suntiang | suntiang sumber]

Denah bangunan Surau Latiah baukuran panjang 21,5 meter dan leba 11 meter.[1] Dindiang bangunan tabuek dari kayu nan dikombinasian jo plester (pasir dan semen). Bagian atok babantuak gonjong dengan bahan tabuek dari seng, sadangkan karangkonyo tabuek dari kayu jo bambu. Atok ditopang dek 12 tonggak.[2][8]

Pintu masuak barado di sisi utara dan di sisi timur. Tadapek barupo jendela di sisi selatan, sisi barat, jo sisi timur. Ruangannyo tabagi ateh ruang salat dan babarapo kamar nan digunoan untuak kagiatan suluk. Kamar tasabuik barado pado sisi timur dari ruang utamo nan pintunyo indak panuah hinggo ka bagian bawah, dan sabuah ruangan dengan pintu panuah hinggo ka bagian bawah.[2][8]

Mihrab manjorok kalua bangunan dan mambujua dari arah utara ka selatan. Pado bagian ateh pintu dan jendela tadapek hiasan karawang. Hiasan tasabuik babantuak satangah lingkaran jo motif suluran nan di tangahnyo tadapek lambang mahkota. Motif mahkota tabantuak sabagai pangaruah nan dibawo dek bangsa Belanda.[7][8]

Peninggalan Syekh Sialahan[suntiang | suntiang sumber]

Di surau iko, tadapek manuskrip barupo naskah babahaso Arab dalam abjad gundul paninggalan Syekh Sialahan. Katiko ditamuan dek Dinas Perpustakaan dan Kearsipan Kota Solok pada April 2018, kondisinyo alah bacarai-carai dan dibungkuih jo karateh koran.[10]

Syekh Sialahan maningga pado 9 Muharram 1336 (sekitar Juli 1917). Di sisi timur dalam kompleks surau, tadapek makam Syekh Sialahan barupo susunan bata berplester. Nisannyo manyatu jo jirat, dengan bantuak nisan babantuk undakan, pado bagian kapalo nisan tadapek ampek buah undakan dan pado bagian kaki nisan tadapek tigo buah undakan. kiniko, makam Syekh Sihalahan alah diagia cungkup dan dibuekan bangunan nan disusun jo bata berplester dengan ukuran 4 x 3 meter. Atok cungkup tabuek dari seng.[11][2]

Salain itu, sarupo kabanyakan musajik jo surau tuo lainnyo di Minangkabau, surau iko punyo bedug atau disabuik tabua dalam bahasa Minang. Basubalahan jo surau, tadapek rumah gadang paninggalan Syekh Sihalahan.[7]

Rujuakan[suntiang | suntiang sumber]