Surau Balai, Lubuak Lintah, Kuranji, Padang
Surau Balai, Lubuak Lintah, Kuranji, Padang adolah kawasan tampek tingga panduduak nan pantiang di Kelurahan Lubuak Lintah, Kecamatan Kuranji, Kota Padang. Di kawasan iko, tagak Kampus Universitas Islam Negeri (UIN) Imam Bonjol Padang, walaupun banyak civitas akademikanyo nan indak tau atau kurang familiar jo namo tampek iko.[1]
Sejarah[suntiang | suntiang sumber]
Asa usul[suntiang | suntiang sumber]
Manuruik masyarakaik satampek, namo daerah Surai Balai barasa dari kabaradoan sabuah surau jo balai nan talatak di tapi jalan. Surau iko masih eksis hinggo kini, tapi namonyo alah baganti jadi Mushalla At-Taqwa, samantaro balai nan lataknyo basabalahan jo bangunan surau alah indak ado lai.[2]
Jelang kamardekaan Indonesia pado 1945, alah samakin banyak urang nan tingga di Surau Balai. Sajak itu, kawasan iko manjadi tampek tingga panduduak nan rami.[2]
Parjuangan kamardekaan[suntiang | suntiang sumber]
Katiko parang malawan Balando bakacamuak, persisnyo insiden di daerah Simpang Haru pado 27 November 1945, banyak rumah-rumah di siko nan dibaka dek Balando.[1]
Pado maso PRRI, parsitiwan pambakaan rumah di Surau Balai taulang baliak.[3]
Administratif[suntiang | suntiang sumber]
Sabagai kawasan tampek tingga panduduak, Surau Balai alah eksis sajak zaman Balando. Dulu, kawasan iko masuak kadalam Afdeeling Padang Pariaman, sahinggo banyak istilah-istilah Pariaman nan malakek di kaidupan sahari-hari masyarakaiknyo, takah cik elok (celok), one, jo ajo.[1]
Sasudah kamardekaan, daerah Surau Balai masuak ka dalam kawasan Padang Luar Kota. Manyusul dibalakuannyo UU No. 5 taun 1979 tantanf Pamarintahan Daerah, Surau Balai manjadi bagian dariKelurahan Anduring,Kecamatan Kuranji. Bateh kawasan iko dimulai dari Simpang Bangdes hinggo jambatan nan talatak di muko Gedung BLPT.[2]
Pada 1980-an, tagak Kampus UIN (dulu Institut Agama Islam Negeri, IAIN) Imam Bonjol di kawasan iko. Sajak itu, namo Lubuak Lintah acok dilakekan untuak manunjuakan kampusnyo nan barado di Surai Balai, sahinggo banyak urang nan indak tau kalau kawasan iko aslinyo banamo Surau Balai.[2]
Referensi[suntiang | suntiang sumber]
- ↑ a b c M. Danil Chaniago (2014). Asal Usul Nama Tempat di Kota Padang: Kajian Anomastika. Fakultas Adab dan Humaniora IAIN Imam Bonjol Padang. pp. 29.
- ↑ a b c d M. Danil Chaniago (2014). Asal Usul Nama Tempat di Kota Padang: Kajian Anomastika. Fakultas Adab dan Humaniora IAIN Imam Bonjol Padang. pp. 30.
- ↑ M. Danil Chaniago (2014). Asal Usul Nama Tempat di Kota Padang: Kajian Anomastika. Fakultas Adab dan Humaniora IAIN Imam Bonjol Padang. pp. 30-31.