Sudaga Minangkabau

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Saudagar Minangkabau marujuak pado profesi sakalompok masarakaik nan barasa dari Minangkabau.[1]

Sijarah[suntiang | suntiang sumber]

Salamo barabaik-abaik, padangangan hasia tambang jo partanian Minangkabau alah manjadi sumber utamo dalam kamajuan ekonomi Samudera Hindia nan dinamis. Padagang-padagang gadang Minangkabau alah mangarajoan padagangan sajak abaik ka-7. Urang-urang tu manjadi padagang bapangaruah baoperasi di pantai barat jo pantai timua Sumatra. Padagangan ameh pado mulonyo manjadi padagangan utamo masarakaik Minangkabau. Lambah Tanah Datar marupoan tampek nan paliang pantiang sabagai panghasia ameh untuak ekonomi Minangkabau.[2]:69 Upayo mancari ameh kadang-kadang mandorong tajadinyo papindahan panduduak. Kabaradioan urang Minangkabau di barat laut Jambi, disababkan dek upayo pancarian ameh.[3]:79

Diundang dek Rajo Regale jo pandahulunyo, banyak urang Minang manyabarang ka Selat Malaka manuju Johor untuak mangumpuakan abu ameh jo bongkahannyo. Padagang ameh Minangkabau acoknyo adolah wiraswastawan takamuko, nan mangandalkan sistem politik Tanah Datar untuak maagiahkan palindungan apobilo inyo mambaok kafilahnyo nan tadiri dari saratuih urang labiah bajalan manurun ka lereng babatu Bukit Barisan manuju palabuahan di pantai barat. Pado akhia abaik ka-18, tambang-tambang ameh mulai abih jo padagangannyo mancapai titik nadir.

Sasudah cadangan ameh mangalami panurunan, padagangan komoditas manjadi basis utamo bisnis urang-urang Minang. Padagangan marica, akasia, jo gombia bakambang gadang di abaik ka 15 sampai abaik ka 18.[4] Salanjuiknyo dilanjuikkan jo padangan kopi pado abaik ka 18 sampai 19. Padagang-padagang tu mambaok barang dagangannyo dari padalaman Minangkabau ka Selat Malaka atau Samudera Hindia untuak dijual ka padagang-padagang asiang. Ka pantai timur, padagangan banyak lewat ka sungai-sungai gadang takah Kampar, Siak, Indragiri, jo Batang Hari. Dari kagiatan padagangan ko, banyak padangan Minang nan pindah jo mandirikan koloni di sapanjang pasisia barat jo timur Sumatra, bahkan sampai ka semenanjung Malaysia. Di pantai barat padangang tu mandirikan pos-pos dagang di Meulaboh, Barus, Sorkam, Natal, Tiku, Pariaman, Padang, hinggo ka Bengkulu. Di pasisia timur, koloni dagang tabantang dari Batubara, Pelalawan, hinggo Jambi.

Jinih usaho[suntiang | suntiang sumber]

Restoran[suntiang | suntiang sumber]

Usaho rumah makan marupoan jinih usaho nan banyak dikarajoan dek padagang Minangkabau. Jaringan restoran Minang atau biasonyo labiah dikenal jo sabutan restoran Padang taseba ka saluruah kota nan ado di Indonesia, Malaysia, Singapura, Australia, bahkan sampai ka Eropa jo Amerika Serikat.[5] Disamping itu banyak juo usaho restoran nan mampunyoi ciri khas jo merek jua nan dijalani dek padagang dari daerah tatantu. Padagang asa dari Kapau biasonyo manjua nasi ramas nan tanamo jo Nasi Kapau. Padagang dari Pariaman jo Dangung-Dangung banyak nan manjua Sate Padang. Sadangkan padagang asa Kubang manjadi panjua martabak, jo merek dagangnyo adolah Martabak Kubang.

Restoran Sederhana nan dirintih dek Bustamam manjadi jaringan restoran Padang nan taseba 160 cabang di saluruah Indonesia jo Malaysia.[6] Salain Sederhana, jaringan restoran Minang lainnyo nan alah barekspansi ka banyak negara adolah Sari Ratu, Garuda, jo Natrabu.

Pangusaho Minang lainnyo nan bagerak di bidang makanan adolah kaluarga Bustanil Arifin nan marupokan pamacik lisensi Pizza Hut jo Marugame Udon. Kini ko jaringan restoran di bawah bendera Sriboga tu alah punyo labiah dari 350 cabang di saluruah Indonesia.[7] Pangusaho kuliner asa Batusangkar, Syamsalis, alah sukses pulo manyambangkan usaho ayam goreng Sabana Fried Chicken nan jumlah cabang kini ko mancapai 1.000 gerai.[8]

Restoran Padang jo Jumlah Cabang (2020)
Namo Restoran Jumlah Lokasi
Sederhana 160 Jabotabek, Bandung, Semarang, Denpasar, Surabaya, Makassar, Kuala Lumpur
Simpang Raya 46 Bukittinggi, Jabotabek, Bandung, Balikpapan, Cirebon
Sari Ratu 30 Jabotabek, Surabaya, Denpasar, Kuala Lumpur, Singapura[9]
Pagi Sore 18 Palembang, Jabotabek, Jambi, Pangkalpinang
Garuda 17 Medan, Jabotabek, Bandar Lampung, Singapura[10]
Duta Minang 12 Yogyakarta, Semarang, Kediri[11]
Martabak Kubang Hayuda 9 Padang, Jabotabek, Bandung, Bukittinggi
Natrabu 8 Jabotabek, Denpasar, Kuala Lumpur
SB Bintaro 8 Jabotabek, Bandung
Sarimande Metropolitan 8 Jabotabek[12]
Sari Bundo 7 Jabotabek, Makassar, Pekanbaru[13]
Sate Padang Mak Syukur 7 Padang Panjang, Jabotabek
Nasi Kapau Kedai Pak Ciman 5 Palembang, Jabotabek[14]

Rujuakan[suntiang | suntiang sumber]

  1. "Jejak Para Perantau" Kompas.com, 9 September 2013.
  2. Dobbin, Christine (2008). Gejolak Ekonomi, Kebangkitan Islam dan Gerakan Padri: Minangkabau 1784-1847. ISBN 979-373-126-5. 
  3. Marsden, William (1966). The History of Sumatra. London: Oxford University Press. 
  4. "Jejak Perdagangan Rempah" Kompas.com, 7 September 2013.
  5. Wow, Rumah Makan Padang Ada di New York!
  6. Hasril Chaniago, Kisah Hidup Haji Bustamam Pendiri Restoran Sederhana, 2019
  7. Dari Tepung Ke Jaringan Restoran
  8. Franchise Sabana Fried Chicken
  9. Situs Resmi Restoran Sari Ratu
  10. Situs Resmi Restoran Garuda
  11. Situs Resmi Duta Minang
  12. Situs Resmi Restoran Sarimande
  13. Situs Resmi Restoran Sari Bundo
  14. Dalam 3 Tahun, Ivan Mampu Buka 4 Kedai Nasi Kapau Pak Ciman