Sofyani Yusaf
Sofyani Yusaf (lahia di Bukiktinggi, Sumatra Barat, 1936 dan wafaik pado tanggal 4 Maret 2022 di Bukiktinggi, Sumatera Barat) adolah saurang seniman Indonesia dari Sumatra Barat, baliau basamo suaminyo, Yusaf Rahman (alm.) marupokan pandiri Sofyani Dance and Music Ensemble Group pado tahun 1953. Baliau tanamo sabagai panari pado maso mudonyo, kamudian manjadi panata tari (koreografer) karano umua nan indak mamungkin untuk manjadi panari.[1]
Riwayaik[suntiang | suntiang sumber]
Sofyani baraja manari sajak baumua anam tahun dari ayahnyo nan mampunyoi grup randai, ayahnyo marupokan saurang guru silek di kota Bukiktinggi, Sumatra Barat. Baliau dilatiah gerakan-gerakan tari piriang nan manganduang gerakan silek dek ayahnyo salamo duo jam, dalam satiok latihan nan dilakuan duo kali saminggu. Katiko umua baliau duobaleh tahun, Baliau mulai diajaan dek ayahnyo manari piriang di ateh pacahan kaco nan barasal dari ratuihan boto minum nan dipacahan kamudian dibarasiahan dan dilatakan diateh niru.
Di masonyo, Sofyani dikenal sabagai panata tari atau koreografer. Baliau alah mambuek 20 macam tarian Minangkabau, dan alah malakuan partunjukan tari di dalam jo lua nagari, sarupo di Pakistan, Yunani, Italia, Spanyol, Australia, Swiss, Balando, Korea, Japang, Brasil, Amerika Serikat, sarato saluruah nagari di ASEAN, jo lainnyo.
Pado tahun 2012 baliau jo Sanggar Tari Syofyani diundang ka Prancis untuak ikuik bapartisipasi dalam Festival De Montoire, nan marupokan festival seni tahunan bergengsi di kota Montoire, Prancis, nan alah baumua labiah dari 40 tahun. Masih di Prancis, dalam festival budaya paliang gadang di negara itu, anak-anak asuhannyo ikuik mampartunjukan tarian di festival folklore di kota Mentanon serta festival folklore ka-35 di kota Felletin.
Dalam pangabdiannyo pado dunia seni tari sampai saaik kini, Sofyani alah managakan sanggar tari di bara buah kota, yaitu di Bukittinggi, Padang, Jakarta, jo Banduang, dan malatiah tarian sakitar saratuih urang murid pado sanggar-sanggar tasabuik, dan alah maajaan ribuan murid sapanjang pangabdiannya di dunia seni tari.
Sofyani Yusaf menikah pado tahun 1965 jo saurang laki-laki banamo Yusaf Rahman (alm.), nan dikenal sabagai musisi jo seniman Minangkabau. Pernikahan baliau alah dikaruniai anam urang anak, yaitu Yosi, Yovi, Yosa, Soni, Sandra, dan Sofi Yuanita, sarato anambaleh urang cucu