Sijarah genetika
Sijarah genetika dimulai sajak era klasik jo kontribusi dari tokoh-tokoh sarupo Pythagoras, Hippokrates, Aristoteles, Epicurus, dan lainnya. Pado maso Yunani kuno Filsuf Yunani Aristoteles nan sangaik taliti dalam mangamati kahidupan sahinggo acok disabuik sabagai bapak biologi, mancataik bahwa kadang-kadang sasaurang labiah mirip jo leluhurnyo nan jauh daripado jo urang tuo surang. Inyo manganuik pandangan preformasi, yaitu gagasan bahwa ayah manyumbangan individu miniatur (calon anak) jo ibu hanyo manyadioan lingkungan pandukuang agar individu itu bisa tumbuah.[1] Genetika modern bamulo dari penalitian saurang biarawan agustinian banamo Gregor Johann Mendell. Penelitiannyo tahadok tanaman kacang polong, nan dipublikasian pado taun 1866, maagiah bukti awal tentang pola pewarisan sifaik kutiko hasil panalitiannyo ditamuan baliak pado awal 1990-an, teori pewarisan Mendel pun mulai ditarimo sacaro luweh.[2]
Sasudah pola dasar pewarisan sifaik dipahami, banyak ahli biologi mulai meneliti sifaik fisik gen itu surang. Pado taun 1940-an hinggo awal 1950-an, babagai eksperimen manunjuakan bahwa DNA marupokan bagian dari kromoson (atau mungkin protein nukleat lainnyo) nan manyimpan gen. Fokus panalitian pun bageser ka organisme model baru sarupo virus jo bakteri, dan panamuan struktur heliks ganda DNA pado taun 1953 manjadi tongak dimulainyo era genetika molekuler.
Pado taun-taun barikuiknyo, para ahli kimia mangambangan teknik untuak mambaco urutan (manyusun sekuens) asam nukleat (sarupo DNA dan RNA) dan protein. Di saat nan samo, banyak ilmuwan lainnyo manamuan hubuangan antaro kaduo jinih molekul iko jo barasil mangungkap kode genetik. Pangaturan ekspresi gen (bagaimano jo kapan gen "manyalo" atau aktif) manjadi topik pantiang pado taun 1960-an. Mamasuki taun 1970-an., ekspresi gen alah bisa dikendalian jo dimanipulasi malalui rekayasa genetika.
Pado dekade-dekade tarakhir abaik ka-20, fokus banyak ilmuwan bageser ka proyek-proyek genetika baskala gadang, sarupo manyusun urutan sedoalah genom (total materi genetik) suatu organisme.
Gagasan pawarisan sifaik sabalum Mendel
[suntiang | suntiang sumber]Teori kuno
[suntiang | suntiang sumber]Teori awal nan paliang bapangaruah manganai pawarisan sifaik barasa dari Hippokrates jo Aristoteles. Teori Hippokrates mirip jo gagasan Charles Darwin di kudian hari tantang pangenesis, yaitu ide bahwasanyo materi pawarisan takumpua dari sadoalah bagian badan. Samantaro itu, Aristoteles mangusulan bahwa prinsip pambantuak (nan basifaik nonfisik) dari suatu organisme diturunan malalui aia mani jo darah haid ibu, nan kudian barinteraksi di dlam rahim untuak mangarahan pakambangan awal makhluk hidup.[3]
Dek Hippokrates, Aristoteles, jo hampia kasadoalah cendekiawan Barat hinggo akhir abaik ka-19, pawarisan sifaik nan diparoleh salamo hiduik dianggok sabagai fakta nan alah pasti, jo teori pewarisan apo pun harus bisa manjalehan. Namun pado saat nan samo, satiok spesies juo dipacayo mampunyoi hakikat nan tetap, sahinggo parubahan sifaik diwarisan hanyo basifaik pamukaan atau indak mandalam.
Filsuf Athena, Epikuros, maliek pola dalam kaluarga jo mangamukokan bahwa elok laki-laki ataupun padusi manyumbang ciri-ciri katurunan malalui partikel katurunan nan disabuik "atom sperma". Inyo bahkan mancataik adonyo sifaik dominan dan resesif, sarato manggambaran pamisahan jo pangacakan bebas dari "atom sperma" tasabuik.[4]
Teori preformasi
[suntiang | suntiang sumber]Teori preformasi adolah sabuah teori dalam biologi pakambangan nan partamo kali dikamukoan pado zaman kuno dek filsuf Yunani, Anazagoras. Teori iko muncua baliak pado abaik ka-17 jo manjadi pandangan utamo hinggo abaik ka-19. Pado maso itu, istilah lain nan juo acok digunoan adolah "teori evolusi", maskipun makna kato "evolusi" kutiko itu babeda jauah jo pangartiannyo kiniko. Dulu badan makhluk hiduik alah tabantuak sacaro langkok sajak awal, baik di dalam sperma (disabuik juo animalculisme) maupun di dalam sel talua (disabuik ovisme atau ovulisme) maupun di dalam sel talua, dan makhluk tasabuik hanyo paralu bakambang jo gadang sajo. Pandangan iko babeda jo teori epigenesis, nan manyatoan bahwa struktur jo organ badan makhluk hiduik tabantuak sacaro batahap dalam proses pakambangan individu (ontogeni). teori epigenesis sabananyo alah manjadi pandangan dominan sajak zaman kuno hinggo abaik ka-17, namun kudian tageser dek teori praformasi. Baru pado abaik ka-19, teori epigenesis baliak ditarimo sacaro luweh, dan hinggo kini masih dianggok sabagai pandangan nan sahih dalam ilmu biologi.[5][6]
Sistematika tumbuahan jo pasilangan
[suntiang | suntiang sumber]Pado abaik ka-18, kutiko pangatahuan tantang babagai jinih tumbuahan jo hewan samakin batambah, para ilmuwan mulai tatarik pado caro pawarisan sifaik. Babarapo tokoh sarupo Linnaeus, Josep Gottlieb Kőlreuter, Carl Friedrich von Gärtner, jo Charles Naudi malakuan banyak pacobaan manyilangan tumbuahan, tarutamo antarspesies. Dari pacobaan iko inyo manamuan babagai hal, misalnyo bahwa babarapo hasil pasilangan indak bisa bakambang biak, jo bahwa hasil pasilangan baliak bisa sangaik bavariasi.[7]
Di saat nan samo, para petani jo pecinta tanaman mulai manciptoan babagai varietas tumbuahan nan labiah stabil jo unggul. Pado awal abaik ka-19. Augustin Sageret manamuan bahwa jikok duo jinih tanaman disilangan, biasonyo sifaik dari salah ciek induak akan labiah tampak pado katurunannyo. Inyo juo manyadari bahwa kadang-kadang muncua sifaik lamo dri nenek moyang nan indak taliek pado induaknyo. Walaupun baitu, para pamulia tanaman kiniko alum banyak mancubo mambuek teori tentang karajonyo atau manghubuangkannyo jo ilmu pangatahuan lain sarupo fisiologi.[7] Hanyo saketek, tarutamo para pamulia tanaman Garton di Inggirih, nan mancubo manjalehan sistem karajonyo sacaro ilmiah.[8]
Manamuan baliak panamuan Mendel
[suntiang | suntiang sumber]Hugo de Vries batanyo-tanyo tantang apo sabananyo hakikaik dari plasma germinal (germ plasm), khususnyo apokah plasma germinal iko bacampua sarupo cat ataukah diwarisan dalam bantuak paket-paket tapisah nan tetap utuah. Pado taun 1890-an. Inyo malakuan pacobaan pasilangan pado babagai spesies tumbuahan, dan pado taun 1897 inyo manabikan sabuah makalah badasaran hasil panalitiannyo. Dalam makalah tasabuik, inyo manyatoan bahwa satiok sifaik nan diwarisan dikandalian dek duo partikel informasi nan tapisah, masiang-masiang barasa dari ciek induak, jo partikel-partikel iko diwarisan sacaro utuah ka generasi barikuiknyo. Pado taun 1900, inyo sadang manyiapan makalah lain tentang hasil panalitiannyo nan labiah lanjuik, katiko saurang kawannyo manunjuakan salinan makalah Gregor Mendel taun 1866, nan dianggok mungkin relevan jo karajonyo. Maskipun baitu, de Vries tetap manabikan makalah taun 1900 itu tanpa manyabuikan bahwa Mendel labiah dulu manamuan hal tasabuik. Pado taun nan samo, saurang ahli botani lain, Carl Correns, nan sadang malakuan pacobaan hibridisasi pado jaguang jo kacang polong, manalusuri literatur untuak mancari panalitian takaik sabalum manabikan hasilnyo surang. Saati itu inyo manamuan makalah Mendel, nan tanyato hasilnyo mirip jo miliknyo. Correns lalu manuduah de Vries manggunoan istilah dari makalah Mendel tanpa memberi pangakuan atau manyabuikan bahwa Mendel adolah nan partamo. Pado saat nan basamoan, saurang ahli botani lain, Erich von Tschermak, juo malakuan pacobaan pasilangan kacang polong dan mamparoleh hasil sarupo jo Mendel, Inyo pun manamuan makalah Mendel kutiko manalusuri literatur panalitian nan relevan. Dalam makalah barikuiknyo, de Vries akhirnyo mamuji Mendel dan mangakui bahwa dirinyo hanya mampaluweh panelitian Mendel nan alah ado sabalumnyo.[9]
Rujuakan
[suntiang | suntiang sumber]- ↑ "The History of Genetics | Encyclopedia.com". www.encyclopedia.com. Diakses tanggal 2025-04-30.
- ↑ "Gregor Mendel | Biography, Experiments, & Facts | Britannica". www.britannica.com (dalam bahasa Inggris). 2025-04-15. Diakses tanggal 2025-04-30.
- ↑ Leroi, Armand Marie (2010). "Function and Constraint in Aristotle and Evolutionary Theory". In Föllinger, S. (ed.). Was ist 'Leben'? Aristoteles' Anschauungen zur Entstehung und Funktionsweise von Leben. Franz Steiner Verlag. pp. 261–284. ISBN 978-3-515-09244-9. OCLC 276334688.
- ↑ Yapijakis, C. (2017). "Ancestral Concepts of Human Genetics and Molecular Medicine in Epicurean Philosophy". In Petermann, H.; Harper, P.; Doetz, S. (eds.). History of Human Genetics. Springer. hal. 41–57. doi:10.1007/978-3-319-51783-4_3. ISBN 978-3-319-51783-4.
- ↑ Jacob, François (1972). Die Logik des Lebenden. Von der Urzeugung zum genetischen Code. Frankfurt am Main: Fischer. ISBN 3-10-035601-2. OCLC 1200295370.
- ↑ Jahn, Ilse; Löther, Rolf; Senglaub, Konrad (1985). Geschichte der Biologie: Theorien, Methoden, Institutionen, Kurzbiographien (2nd ed.). Jena: VEB Fischer. ISBN 3437203290. OCLC 19780133.
- 1 2 Mayr, Ernst (1982). The growth of biological thought : diversity, evolution, and inheritance. Belknap Press. hal. 640-9. ISBN 0674364457. OCLC 7875904.
- ↑ Untuk contoh, Notes penjelasan, Gartons Seed Catalogue for Spring 1901
- ↑ Mukherjee, Siddartha (2016). "Chapter 4". The Gene: An intimate history. Scribner. ISBN 978-1-4767-3353-1. OCLC 949803912.