Rumah adat rembang

Rumah adat Rembang atau Joglo Bocokan disabuik juo Joglo Rembang adolah rumah tradisional nan baasa dari Kabupaten Rembang. Rumah gadang tradisonal Rembang ko dahulunyo dindiangnyo tabuek dari ayaman buluah untuak golongan urang kelas bawah, sadankan untuk golongan kelas manangah ka ateh dindiangnyo tabuek dari papan kayu jati. Ciri lain nan labiah dari rumah tradisional ko adolah Lawang Lempit (pintu lipek) nan tasusun dari ampek daun pintu, duo di sabalah kanan jo duo di sabalah kida. Di sabalah kanan jo kida ado jendela jo palang kayu, pintu jo jendela lipek nan laweh sabagai tando basonyo urang rembang sangaik ramah jo namuah manarimo siapun urang nan nio datang.

Bagian muko rumah (serambi) di sabuik jo Telampik, di surambi muko rumah biasonyo ado kursi nan gadang jo panjang labiah mirip kasua muko/sampiang tampek tidua nan dijadian tampek malapeh taragak jo maota jo kaluarga sarato urang lain nan disabuik mBale. Atok muko rumah bisa dikatokan sangaik randah, iko manunjuakan indak ado strata sosial nan mancolok, siapo sajo nan nio bakunjuang harus manunduakan badannyo atau sopan santun. Babeda jo rumah bantuak bekuk lulang, karano rumah Rembang punyo tiang-tiang nan manopang atok sampiang nan labiah ketek jo labiah pendek.

Tata letak rumah Rembang ko paliang umum adolah bagian teras sabalah kida mampunyoi mBale untuak duduak jo malapeh taragak , bagian dalam rumah, sabalah tangah ado ruang tamu jo ruang kaluarga (manunjuakan karamahan, sadonyo dianggap kaluarga), bagian kanan jo kida di dalam rumah adolah kamar tidua dipisahan jo Kesel (pambateh papan jati babantuak ukiran jo lukisan kaco) bagian balakang ado Pawon (dapua). Di halaman balakang rumah salain pakarangan nan ditanami sayua-sayua jo pisang. biasonyo dipakai juo untuak tampek pangabek taranak sarupo jawi jo kambiang nan di buek an gubuak ketek nan tapisah dari rumah utamo. Di lahan balakang rumah ado juo Kiwan (kamar mandi tradisional nan bak mandinyo tabuek dari genuk (embe tanah nan gadang).