Rumah Percetakan Uang

Ado kategori tantang Rumah Percetakan Uang di Wikimedia Commons

Rumah Percetakan Uang adolah bangunan rumah gadang nan marupokan bekas rumah percetakan pitih. Bangunan ko alah tagak sajak taun 1800-an dan alah diduduaki sajak zaman panjajahan Balando jo Japang.^[1] Bangunan ko talatak di Koto Pulai, Nagari Kambang Timur, Kecamatan Lengayang, Kabupaten Pesisir Selatan. Bekas rumah percetakan uang ko alah manjadi situs warisan budaya Balai Pelestarian Warisan Budaya Sumatera Barat.^[2]

Bantuak bangunan

Bangunan ko dibuek dari kayu dan mamanjang dari utara ka selatan. Panjang bangunan ko baukuran 12,80 m, leba 10,6 m, jo tinggi 7,5 m. Lantai bangunan ko ditingkekkan 1,4 m di ateh pamukoan tanah, tadiri dari 22 tiang.^[1] Bangunan ko tadiri dari babarapo ruangan, yaitu:

Ruang rapek baukuran 12,8 m x 3,2 m
Biliak baukuran 3,2 m x 2,2 m
Ruang tampek palinduangan pangungsi baukuran 9,6 m x 3,2 m
Ruang dapua baukuran 3,2 m x 2,2 m

Jendela pado bangunan ko juo tabuek dari kayu dan bantuaknyo sarupo jendela biaso. Pintu masuak masih asli, tabuek dari pinil ukiran. Pintunyo baukuran 0,75 m x 1,85 m. Atok, dindiang, jo lantainyo indak asli lai, alah manjalani parbaikan dek pamarintah daerah. Babarapo ventilasi bangunan ko manampilkan ukiran kayu malingkar baukuran 37 cm. Namun, babarapo lubang ventilasi indak punyo ukiran lai, karano ilang dek pabaikan bangunan. Dindiang luanyo dipasang jo alur basilang, sadangkan dindiang dalamnyo polos. Terasnyo punyo paga papan, nan babantuak basilang jo mampunyoi nilai seni nan cukuik tinggi.^[1]