Rumah Gadang Karajaan Pulau Punjung
 |
Ado kategori tantang Rumah Gadang Kerajaan Pulau Punjung di Wikimedia Commons |
Rumah Gadang Karajaan Pulau Punjung atau biaso disabuik Rumah Rajo Pulau Punjung marupokan salah satu situs cagar budaya di Nagari Empat Koto Pulau Punjung, Kecamatan Pulau Punjung, Kabupaten Dharmasraya, Sumatera Barat.[1][2] Rumah Gadang ko dibangun pado taun 1838 pado zaman Rajo Timbalan, sabalun itu kaluarga karajaan tingga di Rumah Gadang Sungai Dareh. Sasudah Rumah Gadang di Pulau Punjung salasai, pusek karajaan dipindahan ka Pulau Punjung. Sampai kini, Rumah Gadang Kerajaan Pulau Punjung masih diduduki (dihuni) dek ahli waris Kerajaan Pulau Punjung.[3][4]
Bantuak bangunan
[suntiang | suntiang sumber]Rumah Gadang Karajaan Pulau Punjung marupokan rumah adaik khas Minangkabau nan batipe rumah pangguang, bangunannyo maadok ka arah utara. Sacaro kasaluruahan, bangunan ko tabagi manjadi duo ruang, yaitu ruang lua jo ruang dalam. Dindiang lua bangunan utamo di bagian muko tadiri dari duo bagian, iyolah bagian bawah jo bagian ateh. Bagian bawah (lantai) adolah bangunan nan tabuek dari dindiang bata. Bagian iko adolah bagian tambahan nan dibangun kudian dan sabananyo indak ado sabalunnyo. Bagian ateh, nan barado di ateh dindiang bata adolah dindiang kayu. Dindiang kayu ko juo bukan bangunan asli karano bangunan aslinyo adolah kayu ukiran sarupo nan acok ditamukan pado rangkiang.[5]
Di bagian muko bangunan utamo ado 6 jendela nan ukurannyo babeda-beda. Pintu utamo barado di tangah bangunan nan dihubuangkan dek janjang simin batingkek 6 jo panjang 3,40 cm jo leba 1,85 cm. Bagian dalam tadiri dari lantai, dindiang dalam, biliak, jendela jo tiang panyangga Lantainyo tadiri dari limo tingkek, nan masiang-masiang tingginyo 60 cm, 180 cm, 220 cm, jo 228 cm dari tanah. Manuruik Tuanku Sati, lantai-lantai nan tadiri dari babarapo tingkek manandokan baso rumah adaik iko disasuaian jo kaharmonisan suku Koto Piliang . Di lantai paliang bawah sasudah pintu masuak digunoan sabagai tampek duduak urang biaso. Di lantai tangah dakek biliak, dijadian tampek duduak tokoh masyarakaik jo dunsanak, sadangkan di lantai ateh dijadian tampek duduak Tuanku Sati, pajabat karajaan, jo niniak-mamak pamuko adaik.[3]
Bangunan utamonyo babantuak sagi ampek. Dindiang dalamnyo saluruahnyo tabuek dari kayu, sabagian alah diganti jo nan baru. Biliak nan asli kini dikurangi manjadi 5. Ado 6 jendela, 3 di tangah, 2 di suok, jo 1 di kida. Ado 30 tiang sacaro kasaluruahan, tadiri dari 12 tiang utamo di tangah bangunan, 6 tiang panunjang di bagian muko, jo 12 tiang panunjang di balakang bangunan. Salain itu, di sisi barat, tadapek bangunan nan bafungsi sabagai tabuah.[3]
Galeri poto
[suntiang | suntiang sumber]
Bagian muko
Bagian sampiang
Tiang
Jendela
Barando muko jo janjang naiak
Ukiran
Tabuah
Rujuakan
[suntiang | suntiang sumber]- ↑ Nusantara62 01, Tim. "Cagar Budaya di Sumatera Barat, Rumah Raja Pulau Punjung, Dibangun Raja Timbalan Tahun 1883, Bagian 1 - Nusantara 62". Cagar Budaya di Sumatera Barat, Rumah Raja Pulau Punjung, Dibangun Raja Timbalan Tahun 1883, Bagian 1 - Nusantara 62 (dalam bahasa Indonesia). Diakses tanggal 2025-09-29.
- ↑ Agency, ANTARA News (2019-12-13). "Merawat aset sejarah, Dharmasraya menuju destinasi unggulan". Antara News Sumbar. Diakses tanggal 2025-09-29.
- 1 2 3 "BPKWIL3". bpkwil3.kemdikbud.go.id. Diakses tanggal 2025-09-29.[pranala nonaktif permanen]
- ↑ "Pemerintah Kabupaten Dharmasraya". apkasi.dharmasrayakab.go.id. Diakses tanggal 2025-09-29.
- ↑ Nusantara62 01, Tim. "Cagar Budaya di Sumatera Barat, Rumah Raja Pulau Punjung, Jumlah Lantai Diselaraskan Suku Koto Piliang, 2 Habis - Nusantara 62". Cagar Budaya di Sumatera Barat, Rumah Raja Pulau Punjung, Jumlah Lantai Diselaraskan Suku Koto Piliang, 2 Habis - Nusantara 62 (dalam bahasa Indonesia). Diakses tanggal 2025-09-29.