Rumah Gadang Karajaan Padang Laweh

Rumah Gadang Kerajaan Padang Laweh, Dharmasraya.

Rumah Gadang Karajaan Padang Laweh adolah salah satu rumah gadang paninggalan Karajaan Padang Laweh di kabupaten Dharmasraya, Sumatra Barat, Indonesia. Lokasi rumah gadang iko labiah tapeknyo barado di Nagari Padang Laweh, Kecamatan Padang Laweh, Kabupaten Dharmasraya nan bajarak labiah kurang 30 km dari kantua Bupati Dharmasraya.

Sijarah

Karajaan Padang Laweh marupoan salah satu karajaan bawahan dari Karajaan Pagaruyung. Karajaan Padang Laweh iko barado di tapi Sungai Batanghari. Rajo-rajo nan mamarintah di Padang Laweh marupoan katurunan langsung dari rombangan nan datang dari Pagaruyung. Kiniko rajo Padang Laweh dipimpin dek Sutan Alif Tuanku Bagindo Sutan Mhammad. Karajaan Padang Laweh mampunyoi wilayah nan cukuik luweh mulai dari daerah sakitaran aliran Batanghari yaitu Padang laweh jo daerah Batu Rijal nan disabuik juo sabagai daerah induk/inti Padang Laweh. Karajaan iko mampunyoi 4 lareh yaitunyo Lareh Batanghari, Lareh Piruko, Lareh Siat, dan daerah rantau. Karajaan Padang Laweh punyo babarapo paninggalan sijarah nan masih dapek dicaliak dimaso kini ko dan masih batahan sampai kiniko, salah satunyo iolah Rumah Gadang Karajaan Padang Laweh.

Bantuak Rumah Gadang

Rumah Gadang Kerajaan Padang Laweh tabuek dari bahan kayu nan pado maso kini ko mampuyoi atok lah alah tabuek dari seng nan babantuak gonjong duo buah ditambah gonjong pado bangunan sampiang. Bangunan iko marupoan bangunan ketek nan alah manempe pado bangunan induak, bantuak bangunan dengan gonjongnyo mambujua arah mungko balakang, sadangkan bangunan induaknyo malintang atau manyampiang. Bangunan induknyo baukuran panjang 9,25 m dan leba 4,75 m. Adopun bangunan bilaik sampiang baukuran 6,5 m x 1,8 m, dengan katinggian panggung 50 cm, sarato tiang panyangga 20 buah babantuak pasegi. Panambahan lain pado bangunan adolah ukiran-ukiran dengan motif flora pado bagian depan bangunan. Kondisi Kiniko bangunan barado di antaro bangunan perumahan masyarakaik pado sisi kida jo suok.

Poto-Poto

• 
  Bagian muko
• 
  Janjang Rumah Gadang
• 
  Pintu Rumah Gadang
• 
  Ukiran Rumah Gadang
• 
  Rangkiang di Rumah Gadang