Persatuan Tarbiyah Islamiyah

Wikipedia Minangkabau - Lubuak aka tapian ilimu
(Dialiahkan dari Perti)
Loncat ke navigasi Loncat ke pencarian
Logo Partai Perti pado Pemilu 1971

Persatuan Tarbiyah Islamiyah (Perti; bahaso Minang: Pasatuan Tarbiyah Islamiyah) adolah namo sabuah organisasi massa Islam nasional nan berbasis di Sumatra Barat. Organisasi ko didirian pado 20 Mei 1930 di Sumatra Barat, dan barasa dari alim ulama Ahlussunnah wal jamaah. Kudian organisasi ko malaweh ka daerah-daerah lain di Sumatra, inggo ka Kalimantan jo Sulawesi.

Perti ikuik bajuang di dunia politik jo bagabuang ka dalam GAPI dalam aksi Indonesia Beparlemen, sarato turuik maagiah konsepsi kanagaraan kapado Komisi Visman pado taun 1939. Mamasuki taun 1944, pamimpin-pamimpin Perti malakukan gebrakan jo bagabuang ka Majilih Islam Tinggi (MIT) di Bukittinggi, suatu organisasi Islam untuak saluruah Sumatra nan dikapaloi dek Syekh Muhammad Djamil Djambek, surang ulama modernis nan pado maso lalu panah basitagang jo ulama tuo Perti.

MIT marupokan tampek untuak marujuak pasoalan-pasoalan agamo, tapi salamo Parang Pasifik, organisasi ko kurang dapek bafungsi sacaro elok. Pado bulan Desember 1945, MIT barubah manjadi Masyumi cabang Sumatra saubuangan jo edaran pamarintah sabalunnyo supayo rakyaik mandirian partai politik sabagai camin palaksanaan demokrasi.

Pado periode nan samo pulo Perti mamutuihan untuak manjadikan organisasinyo suatu partai politik surang. Kaputusan tasebuik diambiak pado tanggal 22 November 1945, dan dipakuek dek kongres di Bukittinggi tanggal 22-24 Desember 1945.[1]

Dalam Pemilihan Umum 1955 Perti mandapekan ampek kursi DPR-RI jo tujuah kursi Konstituante. Salapeh Konstituante jo DPR hasia Pemilu dibubaran dek Presiden Soekarno, Perti mandapek duo kursi di DPR-GR. Duo tokoh kunci Perti juo panah dipicayo manjabaik mantari nagara pado maso pamarintahan Soekarno. Kaduo ulama tasabuik adolah Sirajuddin Abbas sabagai Mantari Kasalamatan Nagara RI jo Rusli Abdul Wahid sabagai Mantari Nagara Urusan Umum jo Irian Barat.

Pado maso Orde Baru Perti bagabuang jon Partai Persatuan Pembangunan.

Rujuakan[suntiang | suntiang sumber]

  1. "http://wawasansejarah.com/persatuan-tarbiyah-islamiyah-perti/". wawasansejarah.com. Diakses tanggal 2016-12-24.  Hapus pranala luar di parameter |title= (bantuan)

Caliak pulo[suntiang | suntiang sumber]

Daftar pustaka[suntiang | suntiang sumber]