Paparangan Uhud

Muhammad jo pasukan Muslim pado Paparangan Uhud, dari Siyer-i Nebi, 1595

Paparangan Uhud adolah paparangan nan tajadi antaro kaum Muslim awal jo kaum Quraisy dalam rangkaian parang Muslim–Qiraisy, di sabuah lambah di utara Gunuang Uhud dakek Madinah, pado hari Sabtu, 23 Maret 625 M (7 Syawal 3 H).

Sasudah hijrahnyo kaum Muslim ka Madinah, pamusuahan jo kaum Quraisy samakin maningkek, tautamo akibaik sarangan kaum Muslim tahadok kafilah dagang Makkah. Pado tahun 624, kaum Quraisy mangalami kakalahan dalam Paparangan Badar, di mano babarapo pamimpin urang-urang tu tabunuah. Pado tahun barikuiknyo, Abu Sufyan bin Harb mamimpin pasukan sakitar 3.000 urang manuju Madinah untuak baleh dandam. Kaduo pihak batamu di dakek Gunuang Uhud, tapek di sabalah utara kota.

Pado awal paparangan, kaum Muslim maraiah kamanangan jo mamaso pasukan Quraisy mundur. Sajumlah pamanah Muslim nan ditampekan dek Muhammad di sabuah bukik tadakek untuak malinduangi bagian balakang pasukan mangiro paparangan alah baakhia jo maninggan tampeknyo untuak mangumpuan harato rampasan parang. Kalalaian ko maagiah kasempatan untuak pasukan Quraisy nan dipimpin Khalid bin al-Walid untuak malancaan sarangan baliak dari balakang, mambaliakan ka adaan paparangan, jo mangacauam barisan kaum Muslim. Kakacauan nan tajadi maakibaikan karugian gadang dari pihak Muslim, tamasuak maningganyo Hamzah bin Abdul Muthalib.

Paparangan ko dipandang sabagai kamunduan gadang bagi kaum Muslim jo kamanangan ketek bagi kaum Quraisy, nan kamudian babaliak baliak jo pasukan nan labiah gadang dalam Paparangan Khandaq.

Latar balakang

Muhammad mulo-mulo manyebaan ajarannyo di Makah indak mandapekan panantangan hinggo katiko badakwah manantang kapicayoan politeistis, nan mamicu katagangan. Muhammad kamudian mamimpin hijrah ka Madinah sasudah bamufakaik jo Bani Aus sarato Khazraj. Untuak maatasi kamiskinan pangikuiknyo, dilakuan panyarangan tahadok kafilah dagang Makah. Pado Maret 624, Muhammad marancanoan panyarangan tahadok kafilah dagang Quraisy nan dipimpin dek Abu Sufyan, namun katauan jo Abu Sufyan mamintak bantuan dari Makah. Pasukan bantuan batamu jo kaum Muslim di Badar, dan dalam paparangan nan tajadi, pasukan Muslim bahasia mamparoleh kamanangan maskipun kalah jumlah.

Kakalahan ko manjadi bancano gadang bagi kaum Quraisy karano banyak tokoh pantiangnyo nan tabunuah, sahinggo wibawa urang-urang tu hancua jo musuah lamo mulai mangancam baliak. Bagi Muhammad, kamanangan ko mampakuek pangaruah jo dukuangannyo. Abu Sufyan, pamimpin baru Quraisy, basumpah mambalehan dandam kaumnyo jo sempat manyarang wilayah sakitar Madinah dalam skala ketek. Paparangan-paparangan ketek acok tajadi kamudian, hinggo pado babarapo bulan kamudian Abu Sufyan mangarahan labiah dari 3.000 pasukan untuak manyarang kaum Muslim sabagai pambalasan ateh kakalahan di Badar.

Paparangan

Peta pasukan dalam Paparangan Uhud

Pagarakan kaum Quraisy

Jo mamimpin pasukan sabanyak 3.000 urang, Abu Sufyan mangarik manuju Madinah untuak mambaleh kakalahan kaumnyo di Badar. Urang-urang tu bakamah di padang rumpuik di sabalah utara kota, jo harapan kaum Muslim akan kalua untuak mahadoki urang-urang tu. Manuruik sijarawan Muslim awal Ibnu Ishaq, sajumlah padusi Makah turuik sarato dalam pasukan Abu Sufyan untuak mambangkikan sumangaik juang, tamasuak Hind binti Utbah, bini Abu Sufyan.

Pagarakan kaum Muslim

Sakalompok sakitar 1.000 laki-laki Muslim barangkek ka arah utara dari Madinah manuju Gunuang Uhud pado Juma’aik patang, 21 Desember 624. Pado subuah hari bisuaknyo, urang-urang tu maambiak posisi di lereang bawah bukik Uhud. Sasaat sabalum paparangan dimulai, Abdullah bin Ubay, pamimpin suku Khazraj, basamo 300 urang lainnyo, manariak dukuangannyo ka Muhammad jo babaliak baliak ka Madinah. Catatan manyabuikan bahwasannyo Ibnu Ubay indak pueh jo rancano untuak kalua dari Madinah guno mahadoki kaum Quraisy. Ibnu Ubay jo pangikuiknyo kamudian mandapek kacaman dalam Al-Qur'an ateh tindakan ko dalam surek Ali-Imran ayaik 166-168.

Pasukan Muslim, nan kini tingga sakitar 700 urang, bakamah di lereang Uhud mahadok ka Madinah, jo bagian balakang dilinduangi dek gunuang. Sabalum paparangan, Muhammad manampekan 50 urang pamanah di sabuah bukik babatu di sisi barat pakamahan. Iko marupokan kaputusan strategis untuak malinduangi sayok-sayok pasukan Muslim nan jumlahnyo saketek; pasukan pamanah ko batugaih malinduangi sayok kida, samantaro sayok suok dilinduangi dek Gunuang Uhud nan talatak di sisi timur pakamahan. Palinduangan tahadok kaduo sayok pasukan ko dimakasuikan agar pasukan Makah indak dapek mamutari pakamahan Muslim, sahinggo pasukan Muslim indak dapek dikapuang atau dikaliliangi dek kavaleri Makah, maingek jumlah kavaleri Makah malampaui kavaleri Muslim jo 50 bandiang 1. Muhammad mamarintahan pasukan pamanah untuak indak maninggan posisinyo kacuali ateh parintahnyo, jo manakanan hal iko malalui sabdanyo:

“Jikok kalian mancaliak kami manang jo mulai mangumpuan harato rampasan parang, jan datang manoloang kami. Kok kalian mancaliak kami kalah jo buruang-buruang mamakan kapalo kami, jan datang untuak manoloang kami.”