Money Heist (2017–2021)

Money Heist atau nan labiah dikenal subagai La casa de papel di Spanyol adolah serial televisi drama kriminal dari Spanyol . Diproduksi dek Álex Pina, mulonyo serial ko dibuek subagai serial tabateh untuak dicaritoan dalam duo bagian sajo. Jadi, awalnyo serial ko hanyo punyo 15 episode nan ditayangkan di jaringan televisi Spanyol Antena 3 dari 2 Mei 2017 inggo 23 November 2017. Kamudian pado akhia 2017 Netflix mandapek hak siaran global dan mambuek ulang serial ko manjadi 22 episode lalu marilisnyo di saluruah dunia. Dimulai jo bagian partamo pado 20 Desember 2017, diikuti dek bagian kaduo pado 6 April 2018. Pado bulan April 2018, Netflix mampabarui serial Money Heist ko jo paningkekan anggaran sacaro signifikan untuak mambuek 16 episode baru. Bagian 3 nan baisi 8 episode dirilis pado 19 Juli 2019. Bagian 4 nan baisi 8 episode dirilis pado 3 April 2020. Kamudian untuak dokumenter nan malibaikkan produser sarato pameran dirilis dek Netflix bajudul Money Heist: The Phenomenon.

Sinopsis

Bakisah tantang sakolompok urang nan punyo rencana untuak marampok bank paliang gadang di Spanyol. Kelompok ko dipimpin dek urang nan disabuik subagai "Profesor". Profesor mambuek sketsa perampokan ko sacaro mandetail. Walaupun Profesor jenius dalam marencanakan perampokan, inyo sangaik indak sapakaik jo nan namonyo pambunuahan. Inyo indak mambuliahan ado nyao nan malayang salamo perampokan tasabuik.

Untuak anggota kelompok ko pun diagiah namo samaran barupo namo-namo kota nan disukoi dek masiang-masiangnyo. Ado nan banamo Tokyo, Berlin, Nairobi, dan lain subagainyo. Namo-namo tasabuik diagiah karano manuruik Profesor akan labiah rancak kalau masiang-masiangnyo indak mangatahui identitas asli supayo hubungan urang ko memang hanyo sabateh rekan karajo.

Sayangnyo konflik sumakin manjadi-jadi dan datang dari sagalo arah. Kadang dari tawanan, polisi, profesor, bahkan dari anggota parampok itu surang.