Lompat ke isi

Makau

Wikipedia Minangkabau - Lubuak aka tapian ilimu
Peta Makau di Tiongkok

Makau adolah ciek daerah administratif kusuih dari Republik Rakyaik Cino (Tiongkok). Nan tamasuak wilayah Makau maliputi Samananjuang Makau, pulau-pulau Taipa jo Coloane, zona reklamasi Cotai nan talatak di antaro Taipa jo Coloane, sarato babarapo pulau ketek lainnyo. Makau babateh jo Zhuhai sabalah di utara jo barat; sadangkan dari arah Hong Kong, Makau talatak di baratnyo. Kaduo daerah itu tapisah jo muaro Sungai Mutiaro (Pearl River). Dek jumalah panduduaknyo mancapai 720.000 jiwa[1] jo laweh wilayah daratannyo nan 32,9 kilometer pasagi (12,7 mil pasagi), Makau kini adolah wilayah nan paliang padek di saluruah dunia.

Daulunyo Makau dijajah Portugih. Wilayah Makau Portugih tu awalnyo disewa dek Portugih dari panguaso Dinasti Ming, untuak bapakai sabagai pos padagangan pado taun 1557. Portugih mambayia sewa taunan jo mangatua wilayah tu tapi tatap di bawah kakuasoan Tiongkok sampai taun 1887, sasudah tu Portugih barasia mandapek hak kolonial dek ditandotanganinyo Pajanjian Tiongkok-Portugih di Peking. Daerah jajahan tu tatap di bawah kuaso Portugih inggo taun 1999, nan pado taun tu wilayah iko disarahan baliak ka Tiongkok. Makau kini babantuak daerah administratif kusuih dari Tiongkok, nan manjalanan sistim ekonomi jo pamarentahan nan balain jo apo nan balaku di daratan Tiongkok, yaitu dalam prinsip "satu nagara, duo sistim".[2] Gabuangan gaya arsitektur nan sabana unik dari Portugih, Parancih, Inggirih, Italia, jo Cino di pusek kota Makau alah mambueknyo dimasuakan sabagai Situs Warisan Dunia UNESCO pado taun 2005.[3]

Makau sabana tamusaua di saluruah dunia dek karano kasino-kasinonyo, nan mambueknyo disabuik sabagai ibu kota dari industri pajudian di saluruah dunia. Makau pulo adolah salah satu kota nan paliang banyak dikunjungi di dunia. Gadangnyo industri pajudian Makau mancapai tujuah kali lipek babandiang jo industri sarupo di Las Vegas, Nevada, Amerika Sarikaik.[4] Dek karano iko, kota Makau ko adolah salah satu nan Pandapatan Domestik Bruto (PDB) per kapitanyo paliang tinggi, bahkan PDB per kapita kok diukua sacaro pasamoan dayo bali (by purchasing power parity) di saluruah dunia.[5][6]

Makau punyo Indeks Pambangunan Manusia (Human Development Index) nan tinggi pulo (0,934) manuruik paretongan dek Pamarentah Makau,[7] jo tingkek harapan iduik katigo tatinggi di dunia.[8] Wilayah iko lah mangalami urbanisasi nan sabana tinggi, inggo mandapek status sabagai wilayah nan bapanduduak tapadek di bumi; nan mano duo partigo dari kasadonyo laweh wilayah Makau dibangun di ateh tanah nan direklamasi dari lauik.[9]

  1. ↑ "Macao Population (2026)". Worldometer (dalam bahasa Inggris). Diarsipkan dari versi asli tanggal 18 February 2026. Diakses tanggal 22 February 2026.
  2. ↑ Landler 1999.
  3. ↑ "Historic Centre of Macao". UNESCO World Heritage Centre. United Nations Educational, Scientific, and Cultural Organization. Diarsipkan dari versi asli tanggal 9 April 2021. Diakses tanggal 10 April 2021. </r<ref>
  4. ↑ Sheng & Gu 2018, p. 72.
  5. ↑ "'GDP per capita, PPP (current international $)', World Development Indicators database". Diarsipkan dari versi asli tanggal 6 October 2014. Diakses tanggal 15 September 2014.
  6. ↑ Sheng & Gu 2018, pp. 77–78.
  7. ↑ "Macau in Figures, 2025" (dalam bahasa Inggris). 澳門統計暨普查局(DSEC). hlm. 4. Diakses tanggal 2025-06-30.
  8. ↑ "Macau". The World Factbook. Central Intelligence Agency. Diarsipkan dari versi asli tanggal 24 January 2021. Diakses tanggal 7 February 2019.
  9. ↑ Grydehøj 2015, p. 102.