Johanna Masdani

Johanna Tumbuan Masdani (29 November 1910 – 13 Mei 2006), disabuik juo Jo Masdani, marupoan tokoh parintih kamardekaan Indonesia. Baliau lahia jo namo Johanna Tumbuan . Inyo juo hadir pado kajadian-kajadian pantiang dalam sijarah Indonesia, yaitu Kongres Pemuda Kaduo pado taun 1928 jo Proklamasi Kamerdekaan Indonesia pado taun 1945.

Riwayaik Hiduik

Johanna tamasuak di antaro 71 pamuda nan hadir pado Kongres Pamuda Kaduo pado bulan Oktober 1928 dan ikuik dalam manyatoan Ikrar Pamuda . Sabagai aktivis pamudo dalam manjalang kamardekaan, Johanna basobok jo banyak tokoh lain sarupo Mohammad Yamin, Rusmali, jo Assaat . Inyo juo basobok jo suaminyo nan juo tokoh dalam gerakan kamardekaan nan banamo Masdani.

Salain dari itu, Johanna juo manjadi saksi sajarah pado momen-momen Proklamasi Indonesia nan dilakukan dek Bung Karno jo Bung Hatta pado tanggal 17 Agustus 1945. Dalam catatannyo inyo pernah manulih, "Roda revolusi Indonesia indak dapek bajalan tanpa padusi. Demi kamardekaan sampai titiak darah tarakhir, Mardeka atau Mati, sacaro indak pamrih mampatahankan bangso jo negara tanah air Indonesia kito nan tacinto." Baliau juo ikuik mangambangkan konsep untuak pambangunan Tugu Proklamasi sederhana di muko rumah Bung Karno di Jalan Pegangsaan Timur No. 56 (kini Jalan Proklamasi) di Jakarta. Tugu iko kudian dibongka dek Bung Karno, tapi dibangun baliak pado taun 1980-an.

Johanna juo manjadi guru di Perguruan Tinggi Rakyat di Gang Kenari, Jakarta, kutiko bantuan dari urang tuonyo di kampuang halamannyo baranti. Inyo juo aktif di Palang Merah Indonesia, sabagai mentor untuak Pramuka Rakyat Indonesia, jo sabagai aktivis sosial untuak Pemuda jo Anak Gadih Indonesia.

Dalam dunia kamardekaan, Johanna manjadi mahasiswa psikologi di Fakultas Psikologi, Universitas Indonesia . Sasudah luluih, inyo mangabdikan diri sabagai dosen psikiatri di almamaternyo sajak 1961. Pado taun 1970-an, inyo juo maambiak pandidikan labiah lanjuik di Amerika Serikat jo Inggirih sasudah suaminyo maningga pado Oktober 1967.

Pangaharagoan

Ampia samo jo suaminyo, Johanna alah banyak mandapek panghargaan dari Pamarentah RI. Pado taun 1953, inyo mandapek Medali Ulang Tahun Kalapan Angkatan Basanjato Indonesia dari Mantari Partahanan jo Kaamanan Ali Sastroamidjojo . Pado taun 1958, inyo mandapek Bintang Pajuang Gerilya dari Presiden Soekarno. Pado taun 1967 pado zaman Soeharto, inyo mandapek Bintang Satyalancana Penegak . Baliau dianugerahi panghargaan Bintang Mahaputera Utama pado taun 1998 dek Presiden BJ Habibie . Sacaro kasaluruahan, Johanna mandapek bintang lapan dari Pamarentah Indonesia.

Maningga

Johanna maningga pado 13 Mei 2006 dan inyo dimakamkan di Kuburan Pahlawan Nasional Utamo Kalibata, Jakarta Selatan pado 15 Mei 2006.