Franz von Benda-Beckmann
Franz von Benda-Beckmann (lahia 1941 – maningga Januari 2013) adolah surang sarjana jo peneliti hukum nan banyak manulih tantang hukum adaik Minangkabau. Dari tahun 2000 inggo 2012, von Benda-Beckmann adolah panaliti senior di Institut Kajian Budayo Sosial Max Planck di Halle, Saxony-Anhalt, Jerman.
von Benda-Beckmann lahia dan tumbuah di bagian utaro Jerman. Inyo mandapek gala sarjana hukum dari Mahkamah Tinggi Schleswig pado tahun 1967 dan doktor pado tahun 1970 dari Universitas Kiel; disertasinyo mambahas tantang pluralisme hukum di Malawi. Basamo istrinyo Keebet, inyo malakuan studi lapangan di Sumatera Barat pado tahun 1974 inggo 1975. Salapeh dari Sumatera Barat, von Benda-Beckmann mandapek gala Habilitation dari Universitas Zurich pado tahun 1979 dan manjadi asisten dosen di Universitas Leiden.[1]
Di Sumatera Barat, pasangan von Benda-Beckmann malakuan kajian tantang hukum adaik nan balaku pado bidang tanah, agraria, jo properti. Salain itu, inyo basamo Keebet juo pernah malakuan panalitian di Malawi, Maluku, India, jo Nepal.[1]
Pado tahun 2000, von Benda-Beckmann pulang ka Jerman untuak manjadi kapalo kalompok panalitian tantang pluralisme hukum di Institut Max Planck sainggo pensiun pado tahun 2012. Inyo wafaik pado bulan Januari 2013.[2]
Karya
Rujuakan
- ↑ a b Profil Franz von Benda-Beckmann (✝ 2013) pado laman Institut Max Planck. Diakses 6 Oktober 2019.
- ↑ Wiber, Melanie (2014). EDITORIAL: In memoriam – Franz von Benda-Beckmann (1941–2013). The Journal of Legal Pluralism and Unofficial Law, Vol. 46, No. 1.