Surau Gadang Bintungan Tinggi

Surau Gadang Bintungan Tinggi talatak di Nagari Padang Bintungan, Kecamatan Nan Sabaris, Kabupaten Padang Pariaman. Surau iko ditagakkan dek Syekh Abdul Rahman pado tahun 1864.

Bantuak surau iko hampiang samo jo surau-surau lainnyo di Minangkabau. Hal iko ditandoi jo bangunan nan badenah bujua sangka, atok babantuak tungkuih nasi baundak-undak, jo lantai nan ditinggian mambantuak kolong.

Pambangunan

Komponen bangunan tabuek dari kayu, sadangkan atok bangunan tabuek dari ijuak. Bangunan nan tagak saat ini  kini marupakan hasil pamugaran Balai Pelestarian Peninggalan Purbakala pado tahun 2004.

Bangunan utamo nan badenah bujua sangka baukuran panjang 11 m jo leba 11 m. Lataknyo ditinggikan satinggi 1,2 m dari ateh tanah, mambantuak kolong.

Tadapek sambilan tiang nan mangaliliangi sabuah tunggak macu di dalam ruang sumbayang. Tunggak ko baukuran 55 cm, babantuak sagi lapan, jo bamotif hias ukia sulua.

Pado bagian mihrab, ado ampek tunggak nan mandukuang sarato ciek tunggak utamo. Tiang-tiang ko indak ado nan dipaku, tapi disanggo dek pasak nan babantuak mato-mato angin.

Pintu masuak surau talatak di sisi timur sabanyak duo buah. Manuruik tamuan BPCB Sumbar, engsel-engsel pintunyo masih asli.

Di sisi selatan pintu masuak talatak sabuah tabuah nan masih acok diguguah untuak mamanggia warga bakumpua mangaji.