Lambretta

Wikipedia Minangkabau - Lubuak aka tapian ilimu
Skuter Lambretta Li 150

Lambretta adolah namo merek motor nan bajinih skuter. Kandaraan ko paratamo kali diproduksi di kota Milan, Italia. Parusahaan nan mamproduksi kandaraan ko banamo Innocenti. Namo kandaraan Lambretta ko barasa dari kato Lambrate, yaitunyo namo sabuah tampek nan dilalui dek batang aia nan barado di pinggia kota milan. Namo Lambretta ko dipicayoi dek masayarakaik satampek yaitunyo sabuah batang aia nan mambawo berkah sahiinggo aia nan mengalia dapek di jadian panunjang sarana untuak pabrik pambuek kandaraan ko.[1][2][3]

Sijarah[suntiang | suntiang sumber]

Awal nyo pado tahun 1922, saurang panguhaso nan banamo Ferdinando Innocenti nan barasa dari kota Pescia mambangun pabrik tabuang baja di kota Roma, Italia. Kamudian pado tahun 1931, inyo mambawo bisnis parusahaan baja nyo ko ka kota Milan. disinan, Milan, inyo mambangun pabrik baja nan labiah gadang dari nan sabalumnyo nan dapek mamproduksi pipa baja nan rancak. Inyo dapek mampakarajoan sakitar 6.000 urang di pabrik tasabuik. Salanjuiknyo, pabrik tasabuik dibom dek panjajah sarato hancua salamo tajadinyo Parang Dunia ka duo. Katiko Parang Dunia ka duo ko alah salasai, pihak pabrik malakuan sarato jo mansurvei raruntuahan bangunan. Innocenti, sabagai nan punyo parusahaan kamudian maliek paluang usaho lain di maso nan akan datang. Kamudian inyo mamutuihan jo mambuek kaputusan untuak salnjuiknyo mamproduksi motor skuter. Pimpinan parusahaan ko maliek celah untuak dapek basaing jo pabrik-pabrik motor nan lainyo baiak itu dalam hal biaya atau harago sarato jo katahanan masin motor skutier ko.[2][1]

Motor skuter produksi Lambretta ko kini ko indak hanyo ado di Milan, Italian, namun tadapek juo di babarapo negara lainnyo. Pado tahun 1972, pamarintah negara India, mambali masin pabrik pambuek motor skuter ko nan barado di kota Milan. Kamudian pamarintah India mambuek motor skuter nan banamo Scooters India Limited (SIL). Motor skuter nan di buek dek India ko mampunyoi tigo buah roda. Untuak panamoanyo di pasa domestik atau di dalam negara india, motor skuter ko agia namo jo Vikram. Salain di India, skuter Lambretta ko diproduksi juo dek babarapo parusahaan dari negara-negara lainyo, sarupo Fenwick di Perancis, NSU di Jerman, Serveta di Spanyol, Yulon di Taiwan, Pasco di Brasil, Auteco di Kolombia dan Siambretta di Argentina. Kini, parusahaan induak dari motor skuter ko iolah Innocenti S.A, disabuik jo sabagai Konsorsium skuter Lambretta nan barado di kota Lugano, Swiss. Parushaan ko kini adolah nan punyo merek dagang internasional Lambretta dan alah malisensi merek tasabuik di saluruah dunia.[1][4]

Produksi[suntiang | suntiang sumber]

Pado mulonyo, Innocenti mamulai produksi motor skuter Lambretta ko pado tahun 1947, setahun sasudah motor skuter jo merek Piaggio mamulai produksi model Vespa-nyo. Lambretta diproduksi di bawah lisensi babagai pabrik nyo di babarapo negara yaitunyo Argentina, Brasil, Chili, Kolombia, India, dan Spanyol, kadang-kadang mamakai namo lain salain Lambretta, tatapi salalu jo desain nan dapek dikatahui atau dikana dek urang-urang. Babaro namo lain dari Lambretta ko adiolah mis. Siambretta di Amerika Selatan Serveta di Spanyol. Parusahaan ritel Amerika, Montgomery Ward, kamudian maimpor motor skuter Lambretta Li125 sarato jo manjuanyo malalui katalog parusahaan tasabuik nan barado di bawah nauangan merek dagang impor Riversid.[5] Pengimpor Lambretta nan barado di negara Prancis, Henri Willame, memulai mandirian sabuah parusahaan nan manjual kandaraan-kandaraan ketek impor nan diagia label "Willam". Banyak dari kreasi iko manggunoan masin Lambretta. Kamudian hasia produksi inyo ko dijua malalui jaringan Lambretta Prancis. Kandaraan-kandaraan nan di produksinyo sarupo "Lambretta Lisa" (dibangun dek DECSA di San Marino), nan punyo masin 123 cc. Ad pulo produksi lainyo yaitunyo kandaraan ketek nan ba roda empat, dijua juo di Prancis jo mamakai namo Willam Bretta nan dimuali pado tahun 1980.[6] [7] [8]

Bantuak[suntiang | suntiang sumber]

Bantuak motor skuter Lambretta ko saroman jo bantuak Vespa. Lambretta ko punyo duo roda jo tigo buah roda. Untuak presneling atau giginyo, motor skuter ko punyo ampek gigi. Motor skuter ko punyo masin bajinih duo tak. Untuak kapasitas masinnyo, skuter Lambretta ko mampunyoi masin mulai dari 49 cc hinggo masin ba kapasitas 198 cc. Sarupo jo kabanyakan motor nan di jalanan dek masin nan duo tak, motor skuter Lambretta ko bajalan mamakai bensin campuran, yaitunyo bensin nan di campua jo saketek oli atau pelumas nan digunoan untuak piston jo silinder.[9][7]

Samo jo vespa, skuter Lambretta ko adolah kendaraan nan unik pado tahun 1950-an hinggo 1960-an. Kandaraan ko banyak di pakai dek panduduak Inggris katiko itu. Salain tu, kandaraan ko manjadi kandaraan piliahan anak mudo di Inggris katiko tu pulo. Tadapek babarapo jinih kandaraan skuter Lambretta ko nan disukoi katiko tu, yakninyo TV (Turismo Veloce), Special (125 dan 150), SX (Special X) dan GP (Grand Prix). Kandaraan-kandaraan tasabuik mampunyoi tanago jo masin nan rancak sarato di lengkapi jo asesoris-asesoris lainyo. Sarupo jo model Lambretta Turismo Veloce, iko iolah kandaraan roda duo nan di produksi pertama di dunia nan punyo rem cakram di roda mungko.[10][6]

Tadapek motor skuter Lambretta ko nan di agia namo jo Luna, nan aratinyo adolah bulan. Namo iko di agia ka skuter Lambretta ko karano katiko tu sadang balangsuang kajadian urang amerika nan pai ka bulan nan manjadiannyo urang partamo nan berhasil pai ka bulan. Skuter nan banamo luno ko sangai di minati masyarakai katiko tu. Skuter jo dapek juo di adu di lintehan balap skuter. Motor skuter ko cocok untuak balap di karano rangko masinnyo nan ketek. Rangko skuter ko dilapisi jo baja baik itu di bagian mungko jo bagian belakangnyo, sarato jo tadapek pulo palinduang kaki si pengendara.[1][10]

Pado kini ko, Lambretta ko manjadi incaran dek para kolektor. Samo jo vespa, skuter Lambretta ko dapek pulo di modifikasi. Untuak mamodifikasi skuter ko mambutuahan biaya nan sangaik gadang. Untuak nan punyo hobi tantu modifikasi ko adolah kagiatan nan disukoinyo. Biasonyo nan dimodifikasi tu iolah masin sarupo mamasang salinder jo crankshaft aftermarket nan dapek maningkekan volume masin hinggo 250 cc, akibaiknyo tanago skuter ko samakion kuek jo kancang jalanyo. Kamudian, rem cakram di bagian mungko jo dibagian balakang nan mamakai tanago hidrolik. Salain tu dan di tingkekan iolah suspensi skuter ko, tujuannyo untuak pangandara labiah nyaman katiko mambawo skuter Lambretta ko.[2][3]

Mode dari Lambretta[suntiang | suntiang sumber]

Poto-poto Lambretta[suntiang | suntiang sumber]

Rujuakan[suntiang | suntiang sumber]

  1. a b c d Motor Cycle 17 November 1966 p.517 On the Four Winds by Nitor. Accessed 27 April 2020
  2. a b c Scootermania: A Celebration of Style and Speed Sims, Josh at Google Books. Retrieved 27 April 2020
  3. a b "GET REAL ⦿ GO REAL" (dalam bahasa Inggris). Diakses tanggal 2020-04-27. 
  4. "Lambretta Indonesia - Latest Price List of All Lambretta Motorcycles". Oto (dalam bahasa Inggris). Diakses tanggal 2020-04-27. 
  5. Ramirez, Marc (August 10, 1995). "Close To The Vespa". Phoenix New Times. Diakses tanggal 27 April 2020. 
  6. a b Dahlan, A.B., ed. (dalam bahaso Indonesian)Mobil & Motor (PT Informedia Indonesia) 11 (10): 12. ISSN 0047-7591. 
  7. a b Sundfeldt, Björn. (dalam bahaso Swedish)Teknikens Värld (Specialtidningsförlaget AB) 34 (22): 46. 
  8. "1977 Willam Sulky". The Bruce Weiner Microcar Museum. 2002. Diarsipkan dari versi asli tanggal 2020-04-27. 
  9. "Lambretta Indonesia - Latest Price List of All Lambretta Motorcycles". Oto (dalam bahasa Inggris). Diakses tanggal 2020-04-27. 
  10. a b "Lambretta Scooters". Lambretta (dalam bahasa Inggris). Diarsipkan dari versi asli tanggal 2020-04-17. Diakses tanggal 2020-04-27. 
  11. "Home". www.britishlambrettaarchive.co.uk. Diakses tanggal 2020-06-29. 
  12. "Home" (dalam bahasa Inggris). Diakses tanggal 2020-06-29.