Talempong

Patunjuakan talempong.

Talempong, atau disabuik juo jo namo canang, calempong (Kuantan Singingi), atau caklempong (Malaysia), adolah saparangkek alaik musik (ansambel) sarupo gong ketek nan tabuek dari logam kuniangan atau parunggu. Kasenian talempong Minang dapek dimainan sacaro diam atau bagarak, tagantuang tujuan panyalanggaraannyo. Talempong biasonyo tadiri dek tigo atau ampek pasang gong sajaja, atau duo pasang jo gong tungga, sapasang gandang basisi duo, gandang basisi tungga atau gandang rebana, sarato kok di daerah Sawahlunto-Sijunjung ditambah jo gong baukuaran sadang atau sapasang gong (disabuik juo aguang) nan tagantuang.

Dalam patunjuakan talempong nan dibaoan sacaro bagarak, satiok pamain mamainan ciek atau duo talempong nan tadapek di langan jo tangan kirinyo. Talempong umumnyo dimainan sacaro baarak-arak dalam upacaro adaik kampuang sabalun mulai maso tanam padi, atau mairiangan panari piriang pado alek pakawinan, atau upacaro malewakan gala surang datuak atau pangulu.

Dalam patunjuakan talempong nan indak bagarak nan umumnyo untuak patunjuakan dalam ruangan, limo atau anam gong ketek dilatakan pado suatu karangko nan balapih bahan lambuik, untuak mampajaleh danguang alaik musiak ko. Para pamain bapasang-pasangan mamainan babagai jinih talempong manuruik urutan masuaknyo, nan dapek balain antaro satiok nagari. Pangaturan nada, kombinasi alaik, sarato alaik musik kusuih nan bapakai dalam parangkek talempong, lai babedo dari nagari ka nagari.