Istano Siak

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Istano Siak atau Istano Sri Indrapura adolah istano nan talatak indak jauah dari palabuahan Siak, tapeknyo di jalan Sultan Syarif Kasim, Kabupaten Siak, Provinsi Riau. Istano Siak marupokan paninggalan Kasultanan Siak Sri Indrapura nan salasai pado tahun 1893. Istano Siak marupokan tampek tingga resmi Kasultanan Siak, nan kini alah majadi tampek wisata sarato tampek panyimpanan barang-barang karajaan. [1]

Asa Mulo[suntiang | suntiang sumber]

Kasultanan Siak sabananyo marupokan pacahan dari karajaan Melayu. Sultan Abdul Jalil Rahmat Syah sabagai rajo ketek, basalisiah jo Sultan Sulaiman nan ditolong dek urang Bugih. Karano kalah, Sultan Abdul Jalil Rahmat Syah pai dari karajaan Melayu.[2]

Bangunan Istano Siak

Sultan Abdul Jalil Rahmat Syah  pai ka Johor, Bintang, Bengkalis dan akhirnyo ka padalaman Siak nan kamudian mambuek karajaan atau kasultanan. Ibukota kasultanan siak pun babarapo kali pindah, diantaranyo ka Buantan, Mempura, Sanapelan, Mempura, tarakhia di Kota Tinggi atau Siak Sri Indrapura. Di Kota Tinggi ko lah sultan Abdul Jalil Rahmat syah mandirikan istano Siak. [3]

Bangunan[suntiang | suntiang sumber]

Komplek bangunan kasultanan Siak mamiliki laweh sakitar 32.000 m2 nan tadiri ateh ampek buah istano, yaitu: istano Siak, istano Baroe, istano Padjang, jo istano Lima. Istano Siak mampunyoi laweh sakitar 1000 m2 nan mamiliki corak campuran arsitektur Malayu, Timur Tangah jo Eropa. Istano siak badindiang keramik, di ateh nyo ado ampek buah patuang alang nan malambangkan keberanian, jo di halamannyo ado salapan buah sanjato, yaitu: sanjato mariam.[3][2][1]

Istano Siak tadiri ateh duo lantai. Lantai partamo mampunyoi 6 ruang sidang, ruang tunggu tamu, ruang tamu kehormatan, ruang tamu laki-laki, ruang tamu padusi, tu di sampiang kanan untuak ruang pesta. Di lantai kaduo ado 9 ruangan khusus untuak sultan sarato ciek ruangan sabagai tuang tamu karajaan.[2]

Barang-Barang Nan Ado di Istano[suntiang | suntiang sumber]

Ado banyak barang paninggalan kasultanan Siak di dalam istano. Diantaro barang-barang tu adolah: singgasana ameh, patuang parunggu Ratu Wihelmia, tombak, brangkas, duplikat mahkota bahkan ado pulo komet. Kini babarapo barang istano Siak ado juo nan tasimpan di Museum Nasional.[1][3]

Rujuakan[suntiang | suntiang sumber]

  1. a b c "Wisata Sejarah Istana Siak, Koleksi Peninggalan Sultan Awet dan Terawat" (dalam bahaso id-ID). https://pekanbaru.tribunnews.com/2018/10/19/wisata-sejarah-istana-siak-koleksi-peninggalan-sultan-awet-dan-terawat. Diakses pado 10 Nopember 2019. 
  2. a b c Elsara, Deasy (2012-10-15). "Sepenggal sejarah Melayu Islam di Istana Siak" (dalam bahaso en-US). https://www.wego.co.id/berita/sepenggal-sejarah-melayu-islam-di-istana-siak/. Diakses pado 10 Nopember 2019. 
  3. a b c Rudi (2019-10-02). "Istana Siak, Jejak Sejarah Kesultanan Siak Sri Inderapura" (dalam bahaso en-US). https://www.nativeindonesia.com/istana-siak/. Diakses pado 10 Nopember 2019.