Gulai Pangek Masin

Dari Wikipedia baso Minang, ensiklopedia bebas
Loncat ke navigasi Loncat ke pencarian
Gulai Pangek Masin

Gulai Pangek Masin atau gulai masin ikan adolah makanan tradisional dari Minangkabau, Sumatera Barat, Indonesia, nan barupo gulai bakuah kuniang karano mamakai kunyik. Pangek masin biasonyo tabuek dari lauak tongkol nan dipaduan jo bumbu-bumbu khas daerah padang. Di gulai pangek masin, nan paliang lamak jikok tadapek kapalo ikan gadang didalamnyo. Sensani manikmatinyo sangaik sero, jikok manyantap kapalo ikanyo tu. Rasonyo nan asin jo guriah dari santan mambuek lamak mamakanyo katiko angek-angek jo nasi angek. Gulai pangek masin biasonyo di masak bisa di hari biaso, dan kabanyakan ado pulo di acara-acara baralek. Karano gulai pangek masin murah dibuek sarato bahan-bahanyo mudah lo di dapekan.

Gulai pangek masin indak hanyo lauak nan ado didalamnyo, di sampiang tu bisa juo dicampua pakai tahu, taruang, tempe, toge, lado hijau bulek, jo masih banyak lai. Nan labiah lamak lai, bilo di dalam pangek masin tu di campua pakai asam talunjuak (asam balimbiang). Asam talunjuak batujuan untuak manambah raso lamak. Raso asam, asin, saketek manih dari lauaknyo sarato guriah dari santannyo manjadikan daya tarik urang-urang untuak mancubonyo.[1]

Resep[suntiang | suntiang sumber]

Bahan :[suntiang | suntiang sumber]

  • Sakilo lauak tongkol, potongnyo sasuai salero se;
  • 6 buah bawang merah, irih-irih tipih;
  • 4 siuang bawang putiah, irih tipih lo;
  • 700 ml santan kental;
  • 10 buah lado kutu ( sasuai salero, buliah banyakan jikok nyio padeh);
  • asam kandih (sacukuiknyo, jan talampau banyak bana);
  • daun limau sacukuiknyo;
  • aia asam kapeh, sacukuiknyo;
  • asam balimbiang (asam talunjuak) sacukuiknyo;
  • tomat merah, sacukuiknyo;
  • daun ruku-ruku, sacukuiknyo;
  • daun salam sacukuiknyo;
  • batang sarai, sacukuiknyo (di tokok sampai pinyak);
  • daun kunyik, sacukuiknyo (ikek simpul);
  • minyak manih sacukuiknyo;
  • garam, sacukuiknyo.

Bumbu aluih :[suntiang | suntiang sumber]

  • 9 buah bawang merah;
  • 6 siuang bawang putiah;
  • 10 buah lado merah;
  • 4 buah kamiri;
  • 5 senti kunyik;
  • 3 senti simpadeh (jahe);
  • sasendok teh lada bubuak;
  • duo sendok teh garam;
  • duo satangah sendok teh gulo pasie.

Caro mambueknyo :[suntiang | suntiang sumber]

  1. Cuci barasiah lauak tongkol, sasudah tu galimangan aia asam kapeh jo garam di ikan tu. Anokan agak sabanta, sudahtu cuci barasiah baliak;
  2. Angekan minyak di kuali sampai manggalagak, sudahtu tumih lado merah jo bawang-bawang nan alah diirih tadi sampai mangaluaan baun kamak. Sudahtu masuakan bumbu-bumbu nan alah di aluihan tadi sarato daun salam, daun limau, daun kunyik jo daun sarai. Aduak marato;
  3. Sasudah bumbu masak, kamudian masuakan santan kadalamnyo. Masak sampai mandidiah, jan lupo aduak taruih bia santanyo indak pacah;
  4. Sasudah manggalagak, masuakan lauak sarato asam kandih kadalamnyo. Masak sampai santan kental jo dagiang lauaknyo ampuak. Kamudian, masuakan irihan tomat samo asam talunjuak (asam balimbiang) sampai tomat jo asam talunjuak manjadi layua. Jikok alah bangkik dari kompor, matian kompor;
  5. Hidangi samba gulai pangek masin di piriang samba atau cambuang samba. Gulai siap untuak di makan.

Kabaradoan[suntiang | suntiang sumber]

Salain bisa dibuek di rumah-rumah, gulai pangek masin bisa pulo kito jumpai di sadoalah rumah makan (lapau nasi) Padang. Gulai pangek masin banyak disukoi urang, sabab salain rasonyo lamak, sansasi mamakan kapalo lauak di samba ko sangaiklah sero. Kadang indak paralu mambali sambanyo, kuahnyo sajo bisa juo manjadi palamak makan campua jo samba-samba nan lain. Takadang urang banyak maraso kurang lamak jikok ndak ado diagiah kuah gulai pangek masin di hidangan nasinyo. Salain ado di rumah-rumah makan padang, gulai pangek masin ado pulo pas acara-acara panikahan (baralek, mando'a, manikah jo lainyo).

Bacoan lanjuik[suntiang | suntiang sumber]

  • lifestyle.harianterbit.com
  • resepmasakanterbaru95.blpgspot.com
  • www.kebudayaanindonesia.com

Rujuakan[suntiang | suntiang sumber]

  1. [resepmasakanterbaru95.blpgspot.com "Makanan Khas Sumatera Barat"]. 24 September 2018. resepmasakanterbaru95.blpgspot.com.