Benteng Bukik Tak Jadi

Wikipedia Minangkabau - Lubuak aka tapian ilimu
(Dialiahkan dari Benteng Bukik Tajadi)

Benteng Bukik Tak Jadi adolah bekas benteng patahanan Kaum Padri nan talatak di Kampuang Chaniago, Nagari Ganggo Hilie, Kecamatan Bonjol, Kabupaten Pasaman, Sumatra Barat, Indonesia atau Tuanku Imam Bonjol wakatu itu manamoinyo Alahan Panjang. Sadangkan manuruik urang Balando dulu, pamukiman tampek Imam Bonjol ko barado disabuik juo banamo Vallei Van Alahan Panjang yang mano namo iko diambiak dari batang aia nan mangalia di tampek itu nan banamo Batang Alahan Panjang.[1] Katiko malatuihnyo Parang Padri, benteng iko manjadi pusek komando pasukan Padri. Lokasi benteng maliputi bukik babantuak persegi panjang nan punyo kamiriangan hampia tagak luruih ka ateh. Di ateh bukik, pasukan Padri dulunyo mambangun struktur manyarupoi benteng sabagai basis patahanan Tuanku Imam Bonjol jo pangikuiknyo dari sarangan pasukan Balando sahinggo pado literatur Balando benteng iko disabuik juo sabagai Benteng Bonjol.[2]

Pado catatan harian saurang prajurit Balando nan bapangkek Letnan I Boelhouwer, Benteng Bonjol digambarkan punyo tembok-tembok nan tabuek dari batu-batu gadang nan teknik mambueknyo hampia samo jo benteng-benteng di Eropa. Sisi bukik dikalialingi dek parik patahanan dan rumpun aua baduri nan sulik ditembus. Sajak 1833, pasukan Balanda bakali-kali manyarang untuak manaklukan Benteng Bonjol, tapi ruponyo manuai kagagalan. Balando baru dapek manjatuhan Benteng Bonjol dek karano sarangkaian sarangan nan batubi-tubi pado 15 Agustus 1837.[3]

Pado 2007, Balai Pelestarian Cagar Budaya (BPCB) Sumatra Barat manatapkan bekas Benteng Bonjol sabagai cagar budayo. Namun, kondisinyo kini ko indak tarawaik jo indak ditamuan lai struktur bangunan nan manandoan adonyo sabuah bangunan patahanan. Untuak manandoannyo di maso kini, mako didirianlah monumen di puncak bukik untuak mangana pajuangan Tuanku Imam Bonjol. Dari ateh bukik, nampak panorama nagari Bonjol dan sakitaranyo.[4]

Deskripsi[suntiang | suntiang sumber]

Bukik Tajadi ko mamanjang sakitar 3 Palen (4,5 kilometer) panjang dan lebanyo 1 Paal (1,5 kilometer).[1] Topografi tanahnyo barundak hinggo katinggian 400 sampai 500 meter. Sisi bukik mampunyoi suduik kamiriangan nan curam, bahkan hampia tagak luruih. Barisan rumpun aua baduri ditanam rapek-rapek mangaliliangi sisi bukik nan dulunyo baguno sabagai sistem patahanan nan sulik ditambuih dek musuah, sadangkan Kaum Padri dapek mangamati garak musuah tapi indak taliek.[5][4][6]

Lukisan Bonjol pado tahun 1839.

Bukik Tajadi babantuak segi ampek nan dipisahan dek sabuah batang aia nan aruihnyo dareh. Dalam buku Kenang-kenangan Sewaktu di Sumatera Barat tahun 1831–1834, saurang prajurit Balando bapangkek Letnan I Boelhouwer manyabuik Benteng Bonjol dibangun jo teknik nan hampia samo jo benteng-benteng di Eropa. Tigo sisi Bonjol dikaliliangi dek dindiang patahanan duo lapih satinggi kurang labiah 3 meter. Tembok lua tadiri dari batu-batu gadang nan manuruik Boelhouwer, marupoan tembok benteng nan kokoh. Di antaro kaduo tembok benteng, dibuek parik nan dalam jo lebanyo 4 meter. Di ateh tembok benteng, ditanam aua baduri "nan alah hampia sarupo rimbo duri nan indak dapek ditembus", salain itu benteng iko cukuik kuek dikaranokan juo dek akses masuak ka daerah Bonjol ko dikaliliangi bukik nan indak bisa dilalui dek Balando, cuman ado babarapo labuah masuak yang biso di lalui, kalau itu di jago rapek dek Pabri mako Balando bisa dikecean indak ka bisa masuak ka dalam benteng Bonjol.[1] Urang-urang Padri, manuruik kato Boelhouwer marujuak pado Kaum Padri, manampekkan pangintai dan panembak jitu dibaliak aua baduri untuak mamantau pagerakan pasukan Balando.[7]

Di babarapo tampek tampak mariam-mariam kaliber 12 pon jo padati baroda kayu nan indak bajari-jari untuak maangkuik mariam tasabuik. Ado pulo batu-batu bulek sabagai pangganti paluru. Boelhouwer manulih, "Sungguh mengherankan bagaimana mereka dapat membawa meriam sebesar itu ke atas bukit, sedangkan kami (maksudnya Belanda) hanya mampu membawa meriam kaliber tiga pon. Itu pun harus dipereteli."[8]

Di lua Bonjol, ado musajik basegi ampek nan dibangun indak bapaku jo basi nan atoknyo tadiri dari limo lapih nan makin lamo makin ketek sarato tatutuik sirap, Bahan nan samo juo dipakai untuak atok gareja-gareja di Eropa dan dapek manampuang kurang labiah 3.000 urang. "Dengan teknologi yang begitu sederhana, mereka dapat menciptakan bangunan yang sebegitu besar," tulih Boelhouwer.[9]

Pangapuangan Bonjol[suntiang | suntiang sumber]

Jatuahnyo Bukit Tajadi ka tangan Balando, diilustrasikan dek G. Kepper.

Pamarintah kolonial manuai sajumlah kagagalan dalam usahonyo untuak manaklukan Benteng Bonjol, pusek komando pasukan Padri nan dipimpin dek Tuanku Imam Bonjol. Gagalnyo panyarangan ka Bonjol dimuek dalam laporan Gubernur-Jenderal Hindia Balando Van den Bosch tanggal 21 September 1833. Suliknyo manambuih Benteng Bonjol adolah salah satu faktor nan mampalambek garak laju sarangan Balando dalam malumpuahkan Kaum Padri.[10]

Pado 21 April 1835, operasi militer ka Bonjol dilancarkan baliak, dipimpin dek Letnan Kolonel Bauer. Pado tangah malam 16 Juni 1835, pasukan Balando bahasia mandakek ka Bonjol "dalam jarak kiro-kiro hanyo 250 langkah".[11] Babarapo kubu patahanan Kaum Padri nan barado di sakitar Bukik Tajadi dirabuik pado awa September 1835, tapi pasukan Balando alun bahasia manguasoi Bukik Tajadi. Pasukan Balando justru manuai kagagalan baliak sasudah Kaum Padri kalua benteng manyarang pasukan Balando dan mahancuakan kubu-kubu patahahan Balando nan dibuek di sakitar Bukik Tajadi.[12]

Balando baru dapek manjebol sabagian Benteng Bonjol pado akhia 1836, tapi Kaum Padri bahasia mausia baliak pasukan Balando dari benteng. Sasudah kagagalan panaklukan Bonjol tu, Gubernur-Jenderal Hindia Balando nan baru Dominique Jacques de Eerens manunjuak Mayor Jenderal Cochius, saurang pawira tinggi Balando nan punyo kapandaian dalam strategi parang Benteng Stelsel, untuak mamimpin sarangan nan labiah gadang ka Benteng Bonjol untuak kasakian kalinyo.[13]

Pado 16 Maret 1837, sarangan intensif ka Bonjol dek pasukan Balando dimulai. Pado 3 Agustus 1837 dipimpin dek Letnan Kolonel Michiels, Balando saketek-saketek manguasoi kaadaan. Benteng Bonjol jatuah pado 15 Agustus 1837, dan bisuak harinyo, Benteng Bonjol dapek ditaklukkan sacaro kasaluruahan. Walaupun baitu, Tuanku Imam Bonjol lolos dari pangapuangan dan kalua dari benteng dikawani dek babarapo pangikuiknyo. Imam Bonjol mancubo maadoan konsolidasi kapado pasukannyo nan alah tacarai-barai jo lamah, sasudah labiah dari tigo taun baparang malawan Balando. Hanyo saketek sajo lai pasukan nan siap baparang. Mancaliak kondisi nan cando tu, Imam Bonjol manyarukan kapado pasukannyo nan alah tacarai-barai untuak baliak ka kampuang laman masiang-masiang.[3][14]

Kondisi kini ko[suntiang | suntiang sumber]

Manuruik panalusuran Kompas pado 2010, area Bukik Tajadi nan manjadi bakeh Benteng Bonjol kondisinyo alah tak tarawat dan ditumbuahi samak baluka. Jalan mandaki ka ateh bukik masih dapek diliek barupo jalan satapak, tapi "samakin mandaki ka ateh, jalan tu samakin sulik dilalui". Babarapo bangunan masih dapek diliek bakehnyo, sarupo tabek, gudang untuak ransum makanan pasukan, rumah patahanan, kandang kudo, jo lubang suruak. Salain tu, tadapek area nan punyo lubang-lubang ketek di ateh tanah sabagai siso tungku, nan dipakirokan marupokan bagian dari dapua nan digunokan pado maso pajuangan Tuanku Imam Bonjol.[5][4][15]

Di kaki salah satu sisi Bukik Tajadi, tapeknyo di balakang Pasa Nagari Ganggo Hilia, ditamukan mariam nan tatimbun dalam tanah sadalam 2 meter. Mariam tu kini dikana jo namo "Sutan Palembang", ditutuik karamik di dalam ruangan baukuran 4 × 4 meter. Hanyo muncuang atau ujuang bagian ateh mariam nan tampak dari lua. Salain mariam, adopulo lasuang untuak manumbuak masiu jo babarapo buah palurunyo.[15][16]

Pada 1985, dibangun sabuah tugu paringatan sarato jo tulisan nan dikutip dari Tuanku Imam Bonjol di ateh Bukik Tajadi. Tulisan tu barupo ungkapan kakacewaannyo kapado masyarakaik Bonjol nan tapacah dan indak namuah basatu: "Menghadapi kolonial Belanda bukan persoalan bagiku. Tapi, mempersatukan Bonjol, aku terluka karenanya."[5]

Pado 2007, kabaradoan Bukik Tajadi sabagai bekas Benteng Bonjol dimasuakan dalam daftar inventaris cagar budayo dek Balai Pelestarian Cagar Budaya (BPCB) Sumatra Barat. Salain sabagai objek wisata sijarah, pamanfaaikan Bukik Tajadi diarahan sabagai objek wisata olahraga. Sajak 2015, Pamarentah Kabupaten Pasaman manyiapkan Bukik Tajadi untuak wisata olahraga paralayang.[17]

Catatan kaki[suntiang | suntiang sumber]

Rujuakan[suntiang | suntiang sumber]

  1. ↑ a b c Asnan, Gusti (2023). 200 Tahun Perang Padri. Yogyakarta: Tanda Baca. pp. 32-33. 
  2. ↑ Jeffrey Hadler 2010.
  3. ↑ a b Radjab 1964, hlm. 394–395.
  4. ↑ a b c BPCB Sumatera Barat 25 Januari 2016.
  5. ↑ a b c Kompas 12 Juli 2010.
  6. ↑ Boelhouwer 1841.
  7. ↑ Boelhouwer 1841, hlm. 95.
  8. ↑ Boelhouwer 1841, hlm. 96.
  9. ↑ Boelhouwer 1841, hlm. 96–97.
  10. ↑ Radjab 1964, hlm. 265.
  11. ↑ Radjab 1964, hlm. 319–320.
  12. ↑ Radjab 1964, hlm. 312–315.
  13. ↑ D.J.M. Tate 1971, hlm. 156.
  14. ↑ Radjab 1964, hlm. 399–402.
  15. ↑ a b Antara 22 April 2012.
  16. ↑ Jabarekspres.com 11 November 2015.
  17. ↑ Antara 26 Januari 2016.

Daftar pustaka[suntiang | suntiang sumber]

Diambiak dari "https://min.wikipedia.org/w/index.php?title=Benteng_Bukik_Tak_Jadi&oldid=3150425"