Batu basurek Ponggongan

Batu basurek Ponggongan
Batu basurek Ponggongan
Jinih	Batu basurek
Bahan baku	Batu tuf
Ukuran	150 cm × 90 cm × 30 cm
Ditamuan	Akia abaik ka-19
Tampek ditamuan	Ponggongan, Pagaruyung, Tanjung Emas, Tanah Datar, Sumatera Barat
Lokasi kini	Ponggongan, Pagaruyung, Tanjung Emas, Tanah Datar, Sumatera Barat (in situ)
Koordinat	0°28′24,7″S 100°36′32,4″E
Registrasi	04/BCB-TB/A/12/2007
Batu basurek Ponggongan I Batu basurek Ponggongan (Sumatra) 4km 2.5miles Ponggongan I    Lokasi Batu basurek Ponggongan I

Batu basurek Ponggongan adolah sabuah paninggalan arkeologis barupo batu basurek nan ditamuan di situs Ponggongan, wilayah kanagarian Pagaruyung, Kecamatan Tanjung Emas, Kabupaten Tanah Datar, Sumatera Barat. Batu basurek iko, nan disabuik juo batu basurek Ponggongan I, dipakiroan barasa dari abaik ka-13 atau ka-14 Masehi, pado maso pamarentahan Rajo Adityawarman. Kaberadaan batu basurek ko masih di lokasi tampeknyo ditamukan (in situ), di tangah-tangah daerah sawah panduduak. Batu basurek iko lah marupoan salah satu paninggalan basijarah nan mandapek status bando cagar budaya dek BPCD Sumatera Barat.

Batu basurek ko tabuek dari batu tuf, sarato mampunyoi kondisi tulisan nan alah mangalami erosi nan cukuik parah, sainggo payah dibaco. Alun ado panafsiran nan langkaik tantang isi batu basurek ko, namun fungsinyo dipakiroan sabagai sabuah tugu paringatan. Sajak taun 2010, Batu Basasti Ponggongan alah dinyatoan sabagai Warisan Budaya Nasional yang nomor inventaris 04/BCB-TB/A/12/2007 dek Kementerian Kebudayaan dan Pariwisata RI.

Panamuan jo lokasi

Batu basurek ko dilaporkan dek ahli epigrafi jo arkeolog N. J. Krom dalam Oudheidkundig Verslag ( Bahaso Indonesia : Laporan Barang Purba) nan ditabikan dek Bataviaasch Genootschap van Kusten en Wetenschappen (Asosiasi Ilmu Pengetahuan dan Seni Batavia) pado taun 1912. Laporan koleksi purbakala ko datanya banyak disadioan dek L.C. Westenenk, Asisten Residen Balando nan batugas di Fort de Kock (kini Bukiktinggi ).

Batu basurek Ponggongan sandiri disobokan di daerah sawah irigasi, tapeknyo di Ponggongan, Jorong Balai Janggo, Nagari Pagaruyung, Kecamatan Tanjung Emas, Kabupaten Tanah Datar, Sumatera Barat. Ponggongan dapek dijangkau jo maikuikan sungai Batang Selo ka hulu, nan indak jauah di utara Bukik Gombak. Latak batu basurek ko barado di dataran tinggi nan katinggiannyo labiah kurang ± 430 meter di ateh pamukoan lauik. Kawasan sawah ko marupoan dataran aluvial jo topografi nan data jo kemiringan 2%. Akses ka lokasi batu basurek dapek dijangkau jo bajalan kaki sakitar 30 meter malintasi tanggul sawah. Katiko ditamuan, batu basurek ko lah tarandam dalam aia sawah, tapi kini alah dilatakkan di ateh palantako jo dilinduangi dek atok 6,2 m × 6,3 m (39,06 m ² ) sarato dipaga jo basi.

Kompleks Batu Basurek Adityawarman, di mano duo batu basurek lain ditamukan juo di Ponggongan (Batu Basa Batu Pagaruyung V jo Batu Basa Basa Pagaruyung VIII)

Batu basurek Ponggongan marupoan salah satu dari limo batu basurek nan dicatat dek Krom sabagai inventaris di Ponggongan—nan ampek lainyo disabuik Batu Basurek Pagaruyung V, Batu Basurek Pagaruyung VIII (atau Ponggongan II), Batu Basurek Pagaruyung IX, jo Batu Basurek Pagaruyung X. Batu Basurek Pagaruyung V jo Pagaruyung VIII kini disimpan di Komplek Batu Basurek Adityawarman, samantaro itu Batu Basurek Pagaruyung IX disimpan di Ruang Koleksi Balai Pelestarian Peninggalan Batusangkar. Kato ponggongan itu sandiri tadapek dalam bahaso asanyo, nan sacaro harfiah bararti "pambakaran" atau "tampek mambaka". Sabuah tampek bengke tukang ameh kuno ditamuan indak jauah dari situ dalam panggalian nan dipimpin dek Budi Istiawan pado taun 2010-2011, nan dipakiroan barasa dari abaik ka-16 atau ka-17. Panggunoan api di tampek ko kamungkinan nan manjadi alasan untuak namo lokasi ko.

Paparan fisik

Ado duo batu basurek nan basuo di sawah Ponggongan. Salah satunyo disabuik Batu Basurek Ponggongan, nan manuruik laporan Krom, batu basurek ko punyo ampek baleh barih inkripsi nan alah takikih. Samantaro batu nan ciek lai talatak indak jauah dari batu basurek di ateh indak ado tulisannya.

Batu basurek iko tabuek dari batu tuf, nan marupoan bahan umum untuak batu basurek pado maso pamarintahan Rajo Adityawarman. Ukuran batu basurek ko tingginyo 150 cm, leba 90 cm, jo taba 30 cm. Batunyo data tapi alah lapuak bana ko agak taangkek sisi kanan atehnyo. Karusakan nan parah jo abrasi pado pamukoan batu basurek ko tajadi akibaik pangaruah cuaco jo wakatu, sarato jinih batunyo nan mudah rapuah, nan mambuek tulisannyo payah untuak dibaco. Sampai kini, alun ado kajian mandalam untuak manafsirkan isi batu basurek ko karano kondisinyo nan alah rusak parah.

Pamaknaannyo

Batu basurek ko ditamukan pado situs nan takaik jo maso pamarintahan Adityawarman dan acok tacantum di dalam batu basurek-batu basurek nan dipakiroan dikaluaan dek Adityawarman. Tapi, dek kondisi batu basurek nan alah usang nan mambuek batu ko indak dapek dibaco, alun ado informasi nan dapek diambiak dari isi Batu Basurek Ponggongan ko.

Tampek panamuannyo barado di area sawah Ponggongan, nan didukuang dek panamuan bengke tukang ameh kuno di situs tasabuik, iko manunjuakan baso daerah iko marupoan bagian dari pusek kagiatan ekonomi jo karajinan nan pantiang pado maso itu. Batu basurek iko, basamo jo batu basurek lainnyo dari maso nan samo ditamukan taseba di babagai daerah Tanah Data (sarupo di Pariangan, Rambatan, Bukit Gombak, Gudam, Saruaso, jo Ombilin); iko mampakuek bukti kakuasoan Adityawarman nan indak hanyo bapusek pado ciek tampek (ibukota) sajo, tapi mambantuak wilayah nan laweh nan mancakup babarapo daerah jo jariangan kagiatan ekonomi jo ritual nan manyeba.

Upayo pamaliharoan

Batu basurek ko marupoan aset punyo kaum Datuk Bunsu, nan pangurusannyo di bawah pangawasan Balai Pelestarian Kebudayaan Wilayah III (sabalunnyo Balai Pelestarian Cagar Budaya Sumatera Barat). Batu basurek ko alah diakui sacaro sah sabagai Benda Cagr Budaya paringkek Nasional. Panetapan status cagar budayo ko dilakukan malalui Surek Kaputusan (SK) Nomor PM.05/PW.007/MKP/2010, nan dikaluakan pado tanggal 8 Januari 2010 dek Kementerian Kebudayaan dan Pariwisata RI.

Galeri

• 
  Batu basurek Ponggongan (poto koleksi KITV k. 1890)
• 
  Lokasi panamuan Batu basurek Ponggongan di tangah sawah. Kini ko lah batutuik jo atok palinduang
• 
  Batu basurek Ponggongan, tampak sampiang
• 
  Batu basurek jo plakat katarangannyo di bawah atok palinduang
• 
  Plakat batu basurek Ponggongan sabagai Benda Cagar Budayo, tampak muko

Caliak juo

• Adityawarman
• Daftar batu basurek di Sumatera Barat
• Bangso Minangkabau
• Nicolas Johannes Krom
• Pagaruyung, Tanjung Emas, Tanah Datar

Rujuakan

Bacaan lanjutan

• Istiawan, Budi (2006). "Selintas Prasasti dari Melayu Kuno" (PDF) (edisi ke-1). Balai Pelestarian Peninggalan Purbakala Batusangkar (Wilayah Kerja Provinsi Sumatera Barat dan Riau): 39–40. 
• Krom, Nicolaas Johannes (1912). "Inventaris de Oudheden in de Padangsche Bovenlanden". Oudheidkundig verslag (dalam bahasa Belanda). Weltevreden: Albrecht & Co. 49: 33–50. 
• Reichle, Natasha (2007). Violence and serenity: late Buddhist sculpture from Indonesia. University of Hawai'i Press. ISBN 978-0824829247. https://www.google.co.id/books/edition/Violence_and_Serenity/7Y4BEAAAQBAJ?hl=id&gbpv=1&dq=kuburajo+inscription+in+english+language&pg=PA253&printsec=frontcover. 
• Suleiman, Satyawati (1977). "The Archaeology and History of West Sumatra" (PDF). Bulletin of the Research Center of Archeology of Indonesia. Jakarta: Pusat Penelitian Purbakala dan Peninggalan Nasional Departemen P & K (12). 
• Tjoa-Bonatz, Mai Lin (2019) (dalam bahaso en). A View from the Highlands: Archaeology and Settlement History of West Sumatra, Indonesia. ISEAS-Yusof Ishak Institute. ISBN 978-981-4843-02-7. https://www.google.co.id/books/edition/A_View_from_the_Highlands/QIDRDwAAQBAJ?hl=id&gbpv=1&dq=ponggongan&pg=PA57&printsec=frontcover. 
• Utomo, Bambang Budi; Sudarman (2018). "Budaya India di Minangkabau: Studi Analisis Terhadap Artefak di Tanah Datar dan Wilayah Sekitarnya". Khazanah: Jurnal Sejarah dan Kebudayaan Islam. UIN Imam Bonjol Padang. VIII (16). doi:https://doi.org/10.15548/khazanah.v0i0.76 . eISSN 2614-3798. ISSN 2339-207X.