Lompat ke isi

Batu basurek Pagaruyuang III

Wikipedia Minangkabau - Lubuak aka tapian ilimu
Batu basurek Pagaruyuang III
Batu basurek Kapalo Bukik Gombak I
JinihBatu basurek
Bahan bakuBatu andesit
Tinggi190 cm
Leba66 cm
Sistem panulisanAksara Pasca Pallawa)[1]
PeriodePado maso pamarentahan Adityawarman
Tampek ditamuanKapalo Bukik Gombak, Jorong Bukik Gombak, Kab. Tanah Datar, Sumatera Barat
Lokasi kiniKompleks Prasasti Adityawarman
Koordinat0°27′35″S 100°36′28″E / 0.4597310°S 100.6077240°E / -0.4597310; 100.6077240
BahasoBahaso Sanskerta
KabudayaanBudaya Pagaruyuang
Batu basurek Pagaruyuang III di Sumatra
Pagaruyuang III
Pagaruyuang III
Batu basurek Pagaruyuang III (Sumatra)
2km
1.2miles
Pagaruyuang III
Paguruyuang III
Peta
Lokasi Paguruyuang III

Batu basurek Pagaruyuang III, atau disabuik juo Batu basurek Kapalo Bukik Gombak I, adoleh ciek batu basurek dari periode maso pamarentahan Rajo Adityawarman, ditulih dalam bahaso Sanskerta mamakai uruf Pasca Pallawa, nan batarikh 1269 Saka atau 1347 Masehi.[2] Batu basurek ko ditamuan di Kapalo Bukik Gombak, Nagari Baringin, Limo Kaum, Tanah Datar, Sumatera Barat, kini ko lah disimpan di Kompleks Prasasti Adityawarman, banomor No.Inv. 26/BCB-TB/SMB.[2]

Batu basurek ko tingginyo 190 cm, lebanyo 66 cm, jo tabanyo 15 cm, tapahek pado batu pasia.[2] Candrasengkala takadang takaik sacaro metafora jo kajadian nan ditunjuakan wakatunyo.[3] Jadi, dvare rasa bhuje rupe (1269) nan apobilo ditajamahan kato parkato adolah 'pintu gabang / niaik / langan / bantuak', mungkin sajo marujuak pado bangunan kaagamoan nan dibangun pado wakatu tu.[3]

Batu basurek Pagaruyuang III jo batu basurek Saruaso I sabalunnyo panah dianggap marupoan bagian dari "batu basurek Batu Beragung" nan panah didokumentasikan sabalunnyo. Namun, panalitian Dr. Krom manyimpuakan baso batu basurek Batu Beragung tasabuik indak panah ado dan sabananyo adolah duo batu basurek nan tapisah.[4] Batu basurek Pagaruyuang III adolah bukti aktipitas karajaan nan bacorak Hindu-Buddha di maso Adityawarman, sarato banilai pantiang sabagai warisan budayo jo pandidikan sijarah bagi masyarakaik satampek maupun publik pado umumnyo.[5]

Lata balakang

[suntiang | suntiang sumber]

Ahli purbakala Dr. Nicolaas Johannes Krom lah ditugehan dek Pamarentah Kolonial Hindia Belanda malalui Peraturan Pemerintah No. 12 tanggal 23 Maret 1912 untuak malakuan panalitian pado babagai artefak jo batu basurek di sakita Fort Van der Capellen, di pantai baraik Sumatera. Inyo mancatat kabaradoan batu basurek ko dalam Oudheidkundig Verslag pado taun 1912 jo namo Kapalo Bukit Gombak I, sarato manyabuikan pulo baso batu basurek ko dinamoi juo Pagaruyuang III.[4] Panamoan tasabuik dek karano pado awanyo batu basurek ko ditamuan di situs Kapalo Bukik Gombak, tapeknyo di Jorong Bukik Gombak, Nagari Baringin, Kecamatan Limo Kaum, Kabupaten Tanah Data, Sumatera Barat.[6]

Batu basurek tasabuik kamudian dipindahan dari lokasi asanyo ka Komplek Prasasti Adityawarman di Jorong Gudam, Nagari Pagaruyuang, Kecamatan Tanjung Emas, Kabupaten Tanah Datar, basamo koleksi babarapo batu basurek lainnyo.[1] Jarak lokasi awa batu basurek iolah sakita 2 kilometer ka arah utara dari komplek panampatannyo kini ko di Jorong Gudam.[6]

Batu basurek ko tadaftar sacaro administratif sajak taun 1977,[6] sarato pado taun 2019 lah masuak dalam daftar cagar budaya jinih bando di Kabupaten Tanah Datar, jo Surat Keputusan Menteri Pendidikan dan Kebudayaan nomor 77/M/2019.[7] Batu basurek ko basarato batu-batu basurek lainnyo di Komplek Prasasti Adityawarman tacataik dalam Inventarisasi Balai Cagar Budaya jo nomor inventaris 26/BCB-TB/SMB, sarato baparingkek Cagar Budaya Nasional.[1]

Bantuak

[suntiang | suntiang sumber]
Tampak dakek batu basurek Pagaruyuang III. Pado pinggia paliang kiri tadapek ukiaran ornamen bonggo sulua.

Pisik

[suntiang | suntiang sumber]

Batu basurek Pagaruyuang III diukia pado batu andesit nan bawarno abu-abu kacoklatan, nan bantuak batunyo lonjong alami (non artifisial). Ukuaran batu tasabuik iolah panjang 1,9 meter, leba 66 sentimeter, jo taba 15 sentimeter.[6] Tulisan pado batu basurek ko bapahaik pado sisi nan manonjol di pamukoan batu nan mamanjang. Agaknyo batu ko indak dibantuak talabiah dahulu maso proses panulisannyo, nan mano bantuaknyo mirip jo menhir.[8]

Anyo tadapek satu barih tulisan sajo pado batu basurek ko.[1][8] Pado sisi kiri ateh, tadapek ragam iasan nan babantuak bonggo sulua.[9]

Naskah jo tajamahan

[suntiang | suntiang sumber]
Faksimili tulisan pado batu basurek Pagaruyuang III


Barikuik iko naskah batu basurek tasabuik manuruik transkripsi Hardjowardojo (1966), sbb.:[10]

Dvare rasa bhuje rupe gatau varsacca Kartike suklah pancatithis Some bajrendra

Nan ditajamahan dek Hardjowardojo sbb.:[10]

Pada tahun 1269, nan telah lalu, pada bulan Kartike, bahagian bulan terang, pada hari kelima, Isnin, vajra Yoga, Indra Karana Bava.

Isi batu basurek

[suntiang | suntiang sumber]

Patanggalan

[suntiang | suntiang sumber]

Batu basurek Pagaruyuang III anyo baisi katarangan tangga ditulihnyo, iolah ari Soma tangga 5 Suklapaksa bulan Kartika taun 1269 Saka,[6] atau sasuai jo tangga 8 Oktober 1347 Masehi.[8][11][12] Bilangan taun didapek jo mambaco candra sengkala (sistim lambang almanaik) dware rasa bhuje rupe— aratinyo gapura, mukasuik, langan, rupo. Kato dware banilai sambilan, rasa banilai anam, bhuje banilai duo, sarato rupe banilai satu. Jikok dibaco dari balakang, mako ka manjadi 1269 Saka atau 1347 Masehi. Maniliak taun tasabuik, gadang kamungkinan batu basurek ko dikaluaan pado maso pamarentahan Rajo Adityawarman.[1]

Panapsiran

[suntiang | suntiang sumber]

Istiawan bapandapaik baso batu basurek Pagaruyuang III saaruihnyo baisi katarangan tambahan manganai suatu kajadian tatantu, tapi kajadian tasabuik indak dapek dikataui dek ado bagian batu basurek nan ilang. Paristiwa nan ilang tasabuik kamungkinan bakaik jo suatu ajaran tantang kaagamoan jo kaidupan, hal tasabuik ditapsiran dari kalimaik nan tasusun pado candra sengkala.[6]

Kato rasa dapek baarati kato ati, bhuje atau langan baarati pancapaian atau alaik untuak mancapai sasuatu, rupe atau wajah/muko baarati dapan, sarato dwara atau gapura baarati nan tampia di muko. Istiawan manapsiran baso makna dari rangkaian kato-kato tasabuik adolah manusia dalam kaidupannyo mampunyoi raso sabagai panggarak sumangaiknyo dalam batindak, nan dilakuan jo tangannyo untuak mancapai suatu tujuan atau sabagai pintu masuak supayo salalu manjadi nan tabaik.[13][14]

Isi batu basurek nan manyabuik katarangan patanggalan tanpa manyabuikan suatu paristiwa tatantu mambuek dugaan baso batu basurek ko mungkin takaik jo konteks candi atau bangunan kaagamoan lainnyo. Bantuak pisik batu basurek nan manyarupoi dorpal (ambang pintu) mandukuang dugaan baso patanggalan tasabuik mungkin marupoan paringatan ateh tagaknyo suatu bangunan atau tampek. Salain itu, pamakaian kato dware (gapura) dapek manandoan gunonyo sabagai gapura atau bagian dari suatu bangunan. Jo itu, batu basurek ko kamungkinan gadang ditagakan untuak mamparingati tagaknyo suatu bangunan atau tampek suci kaagamoan, tapi alun dikataui sacaro jaleh kabaradoannyo inggo kini ko.[1][13]

Arati pantiang

[suntiang | suntiang sumber]

Walaupun anyo mamuek taun, batu basurek Pagaruyuang III marupoan salah satu bukti nan manunjuakkan kabaradoan Adityawarman di wilayah Pagaruyuang.[5] Sadangkan sacaro budayo, batu basurek ko paguno sabagai alaik pandidiakan bagi masarakaik Pagaruyuang maupun urang rami pado umumnyo untuak manganal sijarah di maso tasabuik.[15]

Kasuih "batu basurek Batu Beragung"

[suntiang | suntiang sumber]
Iko identifikasi "batu basurek Batu Beragung" manuruik Dr. Friedrich. Namun, Dr. Krom manamuan baso iko adolah gabuangan dari batu basurek Pagaruyuang III jo batu basurek Saruaso I.

Sabuah batu basurek nan dinamoi "batu basurek Batu Beragung" lah didokumentasikan dek Vitzthum von Eckstaed di Nagari Batu Baraguang, kamudian ditajamahan dek Dr. R. Friederich sarato ditabikan dalam Verhandelingen van het Bataviaasch Genootschap van Kunsten en Wetenschappen (Jurnal Ikatan Kesenian dan Ilmu Batavia) volume 26 taun 1857. Batu basurek iko dilaporkan baisi limo barih naskah, nan dipakiroan marupoan bagian lanjuikan dari batu basurek Pagaruyuang III.[16]

Dr. N.J. Krom, salaku Katua Komisi Panalitian Arkeologi di Jawa jo Madura, lah baupayo mancari kabaradoan pisik batu basurek ko di antaro babagai artefak jo batu basurek lainnyo nan barado di sakita Fort Van der Capellen pado pakan tarakia bulan April 1912 inggo awa bulan Mei 1912. Dalam paroses panalitiannyo, inyo indak barasia manamuan sabuah batu basurek utuah nan sarupo jo nan didokumentasikan Dr. Friedrich tasabuik, malah inyo manamuan duo batu basurek lain nan mampunyoi kamiripan nan samo bana (identik) jo bagian-bagian dari batu basurek Batu Beragung ko.[4]

Batu basurek Pagaruyuang III tanyato identik jo barih partamo "batu basurek Batu Baraguang" ko, sadangkan batu basurek Saruaso I tanyato identik jo ampek barih salanjuiknyo. Kamiripan nan ditamuan tasabuik bahkan sampai ka susunan naskah, iasan bonggo sulua, sarato bagian batu nan takikih. Badasa kamiripan tasabuik, Krom akianyo bapandapaik baso kaduo batu basurek lainnyo tasabuik marujuak kapado obyek nan samo, sainggo inyo bakasimpulan baso "batu basurek Batu Beragung" sabananyo indak panah bana-bana ado, malainan suatu kasalahan panyalinan samato.[4]

Caliak pulo

[suntiang | suntiang sumber]
Search Wikimedia Commons Ado kategori tantang Batu basurek Pagaruyuang III di Wikimedia Commons

Rujuakan

[suntiang | suntiang sumber]
  1. 1 2 3 4 5 6 Kusumadewi 2012, hlm. 35-36.
  2. 1 2 3 Kusumadewi, Sri Ambarwati (2012). Adityawarman (1347-1374 Masehi): Kajian Epigrafi. Depok: Fakultas Ilmu Pengetahuan Budaya, Program Studi Arkeologi, Universitas Indonesia. http://lib.ui.ac.id/file?file=digital/20322904-T-PDF%20Adityawarman-full%20text.pdf. Diakses pado 30 Agustus 2016.
  3. 1 2 Kozok, Uli (2015). A 14th Century Malay Code of Laws: The Nitisarasamuccaya. Vol. 16 dari Nalanda-Sriwijaya Series. Institute of Southeast Asian Studies. p. 37. ISBN 9814459747, 9789814459747. https://books.google.co.id/books?id=35lqBgAAQBAJ&pg=PA403&dq=kapalo+bukit+gombak&hl=id&sa=X&ved=0ahUKEwjy_demw-jOAhUBvI8KHdRXAIkQuwUIJjAB#v=onepage&q=kapalo%20bukit%20gombak&f=false.
  4. 1 2 3 4 Krom 1912.
  5. 1 2 Suhadi 1990, hlm. 218-232.
  6. 1 2 3 4 5 6 Istiawan 2006, hlm. 12.
  7. ↑ Pusdatin Kemendikbudristek (2022). "Prasasti Pagarruyung III". Budaya Kita. Diakses tanggal 2025-10-19.
  8. 1 2 3 Utomo & Sudarman 2018, hlm. 88.
  9. ↑ Setiawan et al 2006, hlm. 14.
  10. 1 2 Salleh, Abdul Razak (Prof. Dato. Dr.); Ramza, Harry (Ir., MT); Abdul Kadir, Mohammad Alinor (Dr.) (2015). Diaspora Adat dan Kekerabatan Alam Minangkabau: Sebuah Kepelbagaian Kajian Pemikiran. Vol. 1. Penerbit Kemala Indonesia. p. 83. ISBN 6021478126, 9786021478127. https://www.slideshare.net/hramza/diaspora-adat-dan-kekerabatan-alam-minangkabau-sebuah-kepelbagaian-kajian-pemikiran.
  11. ↑ Kusumadewi 2012, hlm. 34.
  12. ↑ Damais 1952, hlm. 102-103.
  13. 1 2 Istiawan 2006, hlm. 12-13.
  14. ↑ Kurnia & Monanda 2015, hlm. 29.
  15. ↑ Kurnia & Monada 2015, hlm. 30.
  16. ↑ Friedrich 1857.

Bacoan lanjuik

[suntiang | suntiang sumber]
Diambiak dari "https://min.wikipedia.org/w/index.php?title=Batu_basurek_Pagaruyuang_III&oldid=3349442"