Balastiang pado Maso Parang Paderi

Balastiang pado maso Parang Paderi marupoan balastiang (pajak) yang dibalakuan oleh pamerintah Hindia Balando kapado urang Minang pado maso Parang Paderi. Pado awalnyo, jinih balastiang yang diterapan dek pamerintah Hindia Balando hanyo saketek. Namun, jumlahnya semakin lamo samakin baragam. Salain tu, jumlah urang yang kanai balastiang pun samakin banyak. Panerapan balastiang pado maso Parang Paderi manimbuan baragam tanggapan dari masyarakaik. Ado yang manolak bahkan mambarontak, tapi ado pulo yang mandapek kauntungan dari panerapan kabijakan Balando tu.

Latar balakang

Balastiang mulai dikenalan pamerintah Hindia Balando di daerah padalaman Minangkabau pado tahun 1823, atau dua tahun satalah malatuihnyo Parang Paderi (1821). Panerapan balastiang ko diawali usua Resident van Padang, Du Puy, jo komandan tantara di daerah tu yang banamo Letkol A.T. Raaff, kapado Gubernur Jendral Hindia Balando. Manuruik duo urang tu, balastiang kapado warga karesidenan bisa manjadi pamasukan pamerintah Hindia Balando. Dengan kato lain, balastiang marupoan bantuak kawajiban masyarakaik kapado pamerintah Hindia Balando.

Dalam usuanyo pulo, Du Puy dan Raaff mangamukoan katerangan dari duo katurunan Rajo Suaso yang mangatoan, bahasonyo panghulu jo masyarakaik padalaman sacaro umum mandukuang kabijakan Balando. Salain balastiang, duo patinggi tantara jo sipil tu mausualan ka Gubernur Jendral takaik pambantukan pamerintah daerah di Minangkabau. Pajabaik yang diangkek diharokan bisa manjadi ujuang tombak pamungutan balastiang.

Usua Du Puy dan Raaf tu dibaleh Gubernur Jendral Hindia Balando dengan manabiakan surek kaputusan tatanggal 4 November 1823. Duo di antaro isinyo adolah panerapan balastiang jo panataan pamerintahan daerah di Minangkabau. Gubernur Jendral indak langsuang manerapan banyak jinih balastiang kapado urang Minangkabau, tapi cukuik duo yaitu hoofdgeld (pajak kapalo) dan gebowde eigendommen (pajak bangunan).

Kaputusan tu didasari dek kenyataan sosial jo budayo daerah khususnyo di padalaman Minangkabau bahaso urang Minang alun pernah mangenal atau kanai balastiang sabalunnyo. Manuruik Gubernur Jendral, paneranpan duo jinih balastiang tu marupoan bantuak pangenalan balastiang ka urang Minang. Dikatoan pulo, kalau alah sampai maso e, baragam jinih balastiang pun akan dibalakuan.

Pajak kapalo atau parseorangan yang dibalakuan pamerintah Hindia Balando yaitu f.1 (satu gulden) untuak tiok urang Minang yang alah gadang satiok tahun, baiak laki-laki atau padusi. Sadangkan pajak bangunan paliang gadang f.6 dan paling ketek f.1 per tahun. Balastiang tu bisa dibayia pakai pitih kontan, hasia bumi, atau malalui tanago karajo yang digunoan untuak mambuek proyek pamerintah sarupo jalan, jambatan, dan sabagainyo.

Ado sakitar 800.000 panduduak di Resident van Padang pado maso tu. Pamerintah Hindia Balando baharok dapek mamajaki 2/5 sajo dari jumlah tu. Samantaro 2/5 lai dipakiroan marupoan anak-anak di bawah 16 tahun, dan 1/5 lai urang miskin yang ndak mungkin dibalastiang.

Salain panerapan balastiang, pamerintah Hindia Balando malalui surek kaputusan tu manyutujui pulo pambantukan pamerintah daerah. Pajabaik urang awak diangkek sabagai hoofdregent, regent, kapalo lareh, kapalo nagari, atau kapalo kampuang. Urang-urang tu diharokan bisa bahasia manariak balastiang dari masyarakaik. Sabagai informasi, pajabaik urang awak yang diangkek manjadi pajabaik tu marupoan urang-urang yang baperan gadang dalam bakuasonyo Balando di daerah padalaman Minangkabau jo malawan kaum Paderi. Salain tu, diputusan pulo, balastiang bisa dikumpuan urang Tionghoa yang alah manang lelang pamerintah Hindia Balando.

Salain pajak kapalo jo pajak bangunan, pamerintah Hindia Balando manerapkan pulo balastiang untuk panjualan opium (candu) di daerah darek. Balastiang jinih ko dipunguik dek panghulu. Tujuannyo sabagai bantuak baleh budi kepado panghulu yang alah mandukuang pemerintah Hindia Balando bakuaso di Minangkabau. Salain tu, untuak maadu domba panghulu jo kaum Paderi. Pasalnyo, panjualan candu marupoan praktik yang dibanci dek kaum Paderi. Dengan maagiah hak manariak balastiang panjualan candu ka panghulu, Balando barusaho sacaro langsuang atau indak untuk mambanturan panghulu jo kaum Paderi.

Tanggapan Urang Minang

Urang Minang pado umumnyo manolak panerapan tigo jinih balastiang, yakni pajak kapalo, pajak bangunan, jo balastiang untuk panjualan candu, yang dikenalan dek Balando pada tahun 1823 tu dengan indak amuah mambayia. Laporan resmi pamerintah Hindia Balando mangatoan mandeknyo panagiahan balastiang dek akibaik masih bakacamuknyo Parang Paderi sahinggo hasianyo pun jauah di bawah target.

Pado tahun 1825, tensi Parang Paderi agak manurun dek karano pamerintah Hindia Balando mambuek pajanjian damai jo kaum Paderi sabagai taktik agar tantaranyo yang ado di Minang bisa dialihan ka Jawa untuk mambaranteh palawanan Pangeran Diponegoro. Namun anehnyo kaum Paderi manyatujui sajo pajanjian tu. Salah satu dari sekian banyak poin pajanjian tu adolah kawajiban mambayia babarapo jinih balastiang [kayak pasa, candu, tambakau, pajak kain, pajak minuman kareh (suri atau tuak), pajak jalan, pajak panyembelihan, pajak garam (balastiang tahadok garam yang didatangan dari Jawa), dan sabagainyo]. Salah satu alasan pangenaan balastiang tu bia hasianyo bisa dinikmati masyarakaik pulo nantinyo.

Kawajiban mambayia babarapo jinih balastiang tu dikukuahkan pulo dek Resident van Padang en Onderhoorigheden (Karesidenan Padang jo Daerah Taklukannyo) yang banamo Stuers malalui surek kaputusan. Dalam surek kaputusan tu ditegaskan pulo bahaso hak pangumpulan balastiang, khususnyo pajak pasa, dipacik oleh saurang pamuko Tionghoa di Padang banamo Lau Tiang King salamo tigo tahun. Urang tu lalu mansubkontrakan hak panarikan balasting tu kapado urang Tionghoa lainnyo.

Pamerintah Hindia Balando mambalakuan pulo angkergeld atau uang janka di pulau-pulau di lapeh pantai baraik. Hal itu karano wilayah administratif karidenan mancakup pulau-pulau tu, tamasuak pulau-pulau Batu jo Kapulauan Mentawai. Salain tu, ado pulo balastiang untuk sarang buruang.

Pamerintah Hindia Balando salain tu malanjuikan pulo panarikan bea palabuhan, jo balastiang untuak ekspor-impor babagai komoditas padagangan yag kalua-masuak palabuhan, indak hanyo di Kota Padang, tapi masuak pulo kota-kota lainnyo saperti Pariaman, Pulau Cingkuak, Aia Haji sarato palabuahan-palabuahan di Kapulaun Batu Jo Mentawai.

Sabagai informasi, di Sumatra Baraik, pangenaan balastiang marupoan bagian dari ekspansi politik ka daerah padalaman. Itu karano sajak awal alah dipahituangan bahaso balastiang akan manjadi salah satu sumber pamasukan Balando di daerah ko.

Sajak patamo kali dipakenalan, pamerintah Hindia Balando bahkan alah mampahituangan bara pandapatan yang diperolehnyo dari balastiang ko. Untuak 1825, pahituangan dimulai dari mampakirokan jumlah panduduak yang akan kanai hoofdgeld. Pahituangan dilakuan pulo dengan mampakiroan bara banyak konsumsi candu, garam, pakaian, minuman kareh, atau banyaknyo urang bapagian, banyaknyo urang bajualan jo mandatangi pasa, dan sabagainyo. Umumnyo, jumlah untuak tiok jinih balastiang sakitar f.1.500 hinggo f.20.000 per tahun dengan total kasaluruhannyo kurang saketek dari f.200.000 per tahun.

Sabagaimano pangalaman pado tahun 1823, panarikan balastiang pado tahun 1825 oleh pamerintah Hindia Balando indak sasuai hasia yang diharokan. Sacaro umum, masyarakaik manolak mambayia balastiang. Hanyo balastiang, bea komoditas, atau kagiatan yang indak bahubungan langsuang dengan masyarakaik (hanyo dengan saudagar) yang hampia sautuahnyo bisa ditariak, saperti uang jangka, balastiang untuak garam jo sarang buruang, dan sabagainyo. Namun, jumlahnyo indak lho banyak bana. Pado tahun 1825-1826, jumlah balastiang tang takumpua f.98.500, lebih saketek sebab pado tahun 1820 di kawasan pantai takumpua balastiang sabanyak f.60.000. Padahal, wilayah yang dikuasai pado 1825/1826 jauah labiah laweh, panduduaknyo banyak, dan umumnyo daerahnyo kayo.

Pajanjian Plakat Panjang

Balando mulai maubah kabijakan politiknyo di Sumatra Baraik pado 1830-an sasudah Parang Diponegoro usai. Tantara pamerintah Hindia Balando didatangkan baliak dari Jawa ka Sumatra Baraik untuak maningkekan kampanye militer malawan Paderi. Urang Minang yang dianggok musuah atau bakhianaik ka Balando sagaro ditumpeh atau dibuang ka daerah lain. Basamaan dengan itu, sajumlah tokoh yang dulunyo pro-Paderi bapihak ke Balando, bahkan diangkek manjadi pajabaik saperti regen. Akibaiknyo, Balando samakin balanteh angan tahadok Urang Minang.

Sikap tegas jo kareh tu diwujudkan pulo dek Balando dalam panarikan balastiang. Aparaik tamasuak pajabaik bimiputra diminta untuak mandukuang upayo tu. Hal itu mambuek masyarakaik manjadi tabebani. Apolai parang yang alah balangsuang batahun-tahun alah mambuek ekonomi masyarakaik jatuah ka tingkek paliang randah. Sikap pajabaik dari kalangan Urang Awak ko paambiak balastiang dari urang Tionghoa mambuek masyarakaik batambah muak. Hal itu yang membuek mamunculan palawanan di masyarakaik.

Palawanan patamo ditujuan kapado para panarik balastiang dari kalangan Tionghoa. Sajumlah laporan manyatoan bahasonyo masyarakaik mamburu atau bahkan manyerang panarik balastiang tu di sajumlah pasar di Tanah Datar jo Agam. Ado dari inyo yang luko-luko atau kanai babak belur kanai dihajar massa sarato ado pulo yang tapaso manyalamaikan diri ka rumah panghulu yang marupoan kaki tangan Balando.

Palawanan kaduo ditjuan kapado pamerintah Hindia Balando. Masyarakaik daerah, baik kaum Paderi maupun non-Paderi, malawan sacaro sarantak. Malawan ko dalam artian manyarang atau mambunuah aparaik pamerintah, baiak tantara ataupun pihak sipil tamasuak pajabaik Urang Awak. Palawanan tu tajadi di banyak daerah dan manimbuaan banyak korban di pihak Balando. Contoh, di Lubuk Sikaping jatuah korban sakitar 60 urang, di Bonjol sabanyak 40-an urang, di Suliki 20-an urang, dan di sajumlah daerah di Agamjo tanah Datar jatuah pulo korban yang jumlahnyo puluahan urang.

Palawanan tu membuek pamerintah Hindia Balando takajuik sahinggo sampai-sampai Gubernur Jendral Hindia Balando sangkek tu, Johannes van den Bosch manyempatan datang ka Sumatra Baraik. Pamerintah Hindia Balando pun mambuek pajanjian Plakat Panjang yang salah satu isinyo adalah panghapusan babagai macam balastiang jo karajo wajib pado proyek-proyek pamerintah (kacuali balastiang untuak cando jo bea palabuahan). Panjanjian Plakat Panjang tu mambuek masyarakaik sanang karano dianggap sabagai kamenangan urang Minang, baik Paderi maupun non-Paderi.

Balando Ingkar Janji

Sasudah Plakat Panjang, untuak babarapo lamo, Balando memang mamatuhi pajanjianyo. Namun, pado 1908, janji tu dilanggar dek Balando dengan mambalakuan balastiang liak ka urang Minang. Bahkan, balastiang yang dibalakuan labiah banyak di antaronyo pajak kapalo, pajak panghasilan, pajak pasa, pajak jalan, pajak ganti karajo rodi, pajak tanah, pajak kauntungan, pajak paralatan rumah tanggo, pajak rumah gadang, pajak tambakau, bahkan ado pulo pajak anjiang jo pajak hewan taranak.

Ado babarapo panyebab Balando malangga janji Plakat Panjang. Patamo, Balando maalami kasukaran ekonomi di Sumatera Baraik. Tanam paksa kopi indak lagi manjadi sumber pamasukan. Salain tu, potensi niaga jo ekonomi Sumatera Baraik manurun drastik. Kaduo, babeda dengan maso Parang Paderi, pado awal abaik ka-20, Balando batua-batua alah manguasoi Sumatera Baraik sacaro politik. Raso pacayo diri pamerintah Hindia Balando tinggi pulo dek baru mamenangan Parang Aceh.

Panarikan balastiang pado awal abaik ka-20 manimbuan palawanan dari masyarakaik, saperti di Manggopohm Padang Panjang, Batu Sangka, Talawi, dan sabagainyo, tapi indak mambuahan hasia. Balando bahasia manumpeh palawanan tu. Dek itu banyak korban di kalangan panduduak sarato pimpinannyo ndak saketek pulo nan dibunuah, dipanjaro, atau dibuang ka daerah lain.

Palawanan masyarakaik sacaro fisik bahkan masih balanjuik hinggo tahun 1920-an. Salain tu, palawanan dilajuikan pulo dengan caro non-fisik, kayak imbauan sabagai hasia rapek yang diadoan dek partai politik. Namun, indak juo mambuahan hasia. Sejak tu, balastiang alah manjadi bagian dari hiduik masyarakaik.