Baju pangulu

Wikipedia Minangkabau - Lubuak aka tapian ilimu
(Dialiahkan dari Baju pengulu)


Baju nan dipakai pangulu

Baju pangulu adolah baju nan dipakai dek pangulu di Minangkabau, manuruik aturan adaik nan ado. Ciri-ciri baju nan digunoannyo sarupo baju lapang ndak basaku, balangan panjang, saketek di bawah saku.

Makna[suntiang | suntiang sumber]

Ado babarapo makna atau lambang dari baju pangulu ko. Nan partamo, malambangkan baso pangulu ko adolah urang nan gadang, bailimu laweh, jo balapang dado. Nan kaduo, pangulu ko musti tabukak pado masyarakaiknyo. Nan katigo, pangulu ko musti mangana jo amanaik, manjago adaik, sarato mangarati jo nilai-nilai moral nan takanduang di dalamnyo. Nan kaampek, bailimu, bijak, bamakrifaik, sarato tawakal pado Allah. Nan kalimo imaik jo taliti apo nan balakuan. Nan kaanam, saba jo rido dalam maadoki masalah nan ado di masyarakaik. Nan katujuah, malambangkan urang Minang baraso jo pareso. Nan kalapan, malambangkan baso pangulu indak sombong jo indak baduto dan indak mampunyoi sipek maambiak kesempatan dalam kesempitan. Kasambilan, malambangkan pangulu indak ado marugian urang lain tau kawan surang. Nan kasapuluah, warna hitam di baju pangulu malambangkan bahwa sapatah kato indak dapek di ubah  karano kato pangulu ko alah di sapakati dalam musyawarah.

Jiniah kain[suntiang | suntiang sumber]

Baju pangulu ko tabuek dari beletru atau shaten nan di taburi banang pado baju pangulu nan malambangkan kayo alam minangkabau jo kamampuan saurang pangulu barusao untuak manabuang, taburan ameh juo mancaminkan bahwa dalam masyarakaik minangkabau tadapek banyak ragam pabedaan namun basatu dalam wadah adaik alam minangkabau. Warno hitam pado baju pangulu marupoan warna dasar. Warna hitam bararti bahwa sorang pengulu haruih mampunyoi katabahan hati dalam mangarajoan suatu hal nyo.

Langan nan gadang[suntiang | suntiang sumber]

Langan nan gadang panjangnyo hanyo saketek di bawah saku. Baju tasabuik di buek agak gadang dan langan nan lapang. Manunjuak’an sorang pangulu ko mampunyoi sipek nan dinamis dan sorang pengulu ko indak kaku dalam mamimpin di dalam suatu wilayah. Baju hitam nan ndak ado buah baju jo ndak basaku liyianyo lapeh sampai ka dado tanpa ado buah baju jo indak bakolopak.

Warno hitam[suntiang | suntiang sumber]

Baju pangulu nan bawarna hitam nan di artikan kepemimpinan nan hitam tahan tempa jo putiah tahan suci. Nan artinyo apo sajo nan manimpa bayiak tu buruak maupun elok harus di tarimo dek pangulu sabagai pemimpin. Adopun ararti lain nyo sarupo “ baju hitam gadang langan, langan tasenseng bukan dek bangih , pangipeh angek nak nyo dingin, pahampeh kabuik nak nyo habih.

Banang baju[suntiang | suntiang sumber]

Banang baju di agiah makau, banang gadang di apik dek banang kaciak nan mampunyoi arti urang nan gadang mampunyoi pandampiang. Jadi baju nan mampunyoi lihie nan gadang mampunyoi pandampiang itu di katokan lihie nan lapeh tak bakatuak , babalah hampia ka dado nan mampunyoi arti sorang pangulu ko harus mampunyoi alam nan lapang jo bumi nan laweh. Gunuang ndk runtuah dek kabuik, lawik tak karuah dek ikan, rang gadang martabatnyo saba , tangan nyo bajelo-jelo, kaduonyo badantiang-dantiang, paik manih pandai malulua, di situ martabat bahimpunnyo.nan aratinyo pangulu ko harus bamartabaek   nan bahipun apo masalah elek jo buruak dapek manyalasaian.

Ndak Basaku[suntiang | suntiang sumber]

Baju panghulu ndak basaku, melambangkan saurang panghulu ndak dapaik manggunting dalam lipatan, ndak bisa manjua harato pusako tenggi, jo indak bisa mambawok harato anak kamanakan ka rumah istri.

Ndak babuah[suntiang | suntiang sumber]

Baju surang pangulu juo ndak mamiliki buah nan malambangkan bahwa surang pangulu pandangannyo luas jo alamnyo lebar. Baju pangulu mampunyoi langan nan laweh, iko malambangkan surang pangulu wajik salalu maagi nasihat pado anak kamanakan, jo satiok hal-hal nan buruak indak bisa disampean kapado kamanakan.

Rujuakan[suntiang | suntiang sumber]