Ahmad Fuadi

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Identitas Singkek[suntiang | suntiang sumber]

A. Fuadi atau Ahmad Fuadi (untuak sataruihnyo ditulih Fuadi) laia di Bayua, kampuang ketek di tapi Danau Maninjau taun 1972, indak jauah dari kampuang Buya Hamka. Fuadi marantau ka Jawa dek patuah kapado pinto Ibunyo untuak manaruihan sakulah agamo. Fuadi manimbo ilmu agamo di Pondok Modern Gontor. Di situ Fuadi baraja baso Arab, baso Inggrih, sarato Al-qur'an jo Hadist. Di Pondok ko Fuadi basobok Kiai jo Ustad nan indak parnah pilik mambagi ilmu. Tiok ari Fuadi basamo kasado murid di Pondok Modern mandapek nasiaik atau pengetahuan nan mampakayo pamikiaan Fuadi. Gontor pulo nan maajaan Fuadi sabuah mantra sadarhano tapi sabana kuek, man jadda wa jada, siapo sajo nan basungguah-sungguah pasti sukses.


Sipak Tajang Fuadi di Dunia Pendidikan[suntiang | suntiang sumber]

Sasudah manyalasaian anam taun baraja di Pondok Modern Gontor, Fuadi malanjuikan kuliah ka Universitas Padjadjaran, Bandung, jurusan Hubungan Internasional. Katiko alah luluih kuliah S1, Fuadi manjadi wartawan majalah Tempo. Kaleh jurnalistik patamonyo di bawah bimbiangan sado wartawan senior Tempo. Tahun 1999, Fuadi mandapek beasiswa Fullbright untuak kuliah S-2 di School of Media and Public Affairs, George Washington University, Amerika Serikat Fuadi marantau ka Washinton DC basamo Yayi, bini Fuadi-nan wartawan pulo-adolah mimpi Fuadi nan manjadi nyato. Sambia kuliah Fuadi baduo jo bininyo manjadi koresponden Tempo sarato wartawan Voice of Amerika. Barito sejarah sarupo tragedy 11 September inyo baduo dan malaporkan langsuang dari Pentagon, White House, jo Capitol Hill. Tahun 2014, Fuadi mandapekan beasiswa Chevening award untuak baraja di Royal Holloway, University of London untuak bidang film dokumenter. Sabagai scholarship hunter, Fuadi basamangaik taruih malanjuikan sakolah jo mancari beasiswa. Sampai kini, Fuadi alah mandapekan 8 beasiswa untuak baraja ka nagari urang. Fuadi alah mandapek kasampatan tingga jo baraja di Kanada, Singapura, Amerika Serikat sarato Inggris. Panyuko fotografi ko parnah manjadi Direktur Komunikasi The Nature Conservacy, sabuah NGO konservasi internasional. Kini, Fuadi sibuk manulih, jadi pangecek jo motivator.

Fuadi di Dunia Tulih-manulih[suntiang | suntiang sumber]

Namo Ahmad Fuadi mulai malambuang tinggi katiko novel patamonyo tabik. Novel tu bajudul Negeri 5 Menara. Novel iko saraik jo nasiaik sarato motivasi tantang baa ka baa impian musti diwujuikan. Novel iko alah banyak mandapek penghargaan bahkan di tahun 2012 novel Negeri 5 Menara difilmkan. Salain tu, novel Negeri 5 Menara dicetak pulo dalam versi bahasa Inggris, judulnyo The Land of Five Tower. Novel Negeri 5 menara adolah novel patamo dari trilogi Negeri 5 Menara; duo novel lai adolah Ranah 3 Warna jo Rantau 1 Muara. Trilogi Negeri 5 Menara ko sukses manjadi novel best seller, alah babarapo kali dicetak. Tahun kini novel Ranah 3 Warna dijadian film pulo, kabanyo shooting film tu alah salasai, katonyo film Ranah 3 Warna siap ditonton taun bisuak, 2020. Salain novel trlogi Negeri 5 Menara, novel Fuadi nan lain masih manjadi best seller, takah Anak Rantau contohnyo. [1]

  1. Fuadi, A., 1972- (2011). Negeri 5 Menara. Gramedia Pustaka Utama. OCLC 871579408. http://worldcat.org/oclc/871579408.