Tari Piriang

Wikipedia Minangkabau - Lubuak aka tapian ilimu
Tari Piriang di kota Bukittinggi, Sumatra Barat.

Tari piriang adolah suatu jenis tari tradisional nan populer di masyarakaik Minangkabau.[1] Tari piriang ko mangisahkan kahidupan rakyaik nan batani, kisah dimuloi sajak musim batanam sampai panen dan gembiranyo maso panen. Musiknyo diawali jo irama nan syahdu, lalu lamo-lamo barubah riang dan capek, bantuak iko pulo garakan panari. Panari tari piriang mamakai cincin untuak manimbulkan bunyi-bunyian nan asyik.[2]

Sijarah[suntiang | suntiang sumber]

Pado awanyo, daulu kala tari piriang ko dibuek untuak mambari pasambahan-pasambahan kapado para dewa katiko masuak maso panen rayo.[3] tapi sasudah datangnyo atau masuak nyo agamo islam ka minangkabau, tari piriang indak lai diparuntuakan untuak pasambahan ka dewa-dewa namun diparuntuakan untuak patunjuakan di karamaian nan dihadiri dek rajo-rajo jo pamuko adaik. Tari piriang ko tapakai juo di acara lainyo sarupo acara adaik panikahan.[4]

Awa mulo bilo tari piriang ko dipatunjuakan indak ado nan tau pasti. Namun baaitu, tari piriang ko lah ado di kapulaun melayu sajak labiah dari 800 tahun nan dulu. Tari piriang ko dipacayo juo alah ado di Sumatera Barat dan bakambang hinggo pado jaman karajaan pagaruyuang jo karajaan sriwijaya. Sasudah muncuanyo karajaan majapahit pado abaik ka 12 yang maruntuakan karajaan sriwijaya, alah mandorong tari piriang ko bakambang ka nagari-nagari malayu nan lainyo basamoan jo palarian urang-urang sriwijaya katiko itu.[4]

Garakan[suntiang | suntiang sumber]

Katiko tari dimulai, panari piriang maambiak piriang nan alah talabih daulu di latakaan basusun di mungko para panari. Kamnudian panari maayunkan piriang nan alah di paciknyo pado kaduo tanganyo tadi karah suak jo arah kida.[5] Panari taruih manari dan salanjuiknyo mulai batapak atau mamijak ciek-ciek piriang nan alah disusun sabalumnyo. pado umumnyo panari piriang akan mamastian bahwasanyo piriang nan alah disusunnyo tadi alah dipijak. Katiko manari, panari tari piriang indak buliah mambalakangi panonton. Dalam garakan tari piriang ado maso dimano kadua tangan nan mamacik piriang tadi diayunan ka suok jo ka kida dan manhasilkan bunyi sarupo ting ting ting nan barasa dari ketukan jari-jari panari nan sabalumnya alah disaruangi jo cincin. Sasakali, kaduo talapak tangan panari bagarak saolah-olah mamuta-muta piriang dari ateh ka bawah sahinggo kalau dicaliak mambuek kapalo agak paniang dek nyo.[4]

Alaik parago[suntiang | suntiang sumber]

Alaik utamo parago pado tari piriang ko iolah piriang, Salain tu, ado juo pakaian panari jo alaik musik pangiriang tari sabagai alaik palangkok tari piriang ko. Pado umumnyo, pakaian nan bawarna-warni jo rancak adolah hal nan wajib dipakai untuak sabuah tarian. Namun baitu, pado tari piriang cukuik jo babaju melayu sajo. Warna baju pun tasarah kapado panari warna baju apo nan kan dipakainyo. Namun, warna-warna tarang sarupo merah jo kuniang acok manjadi pilihan dek panari tari piriang karano warna-warna ko labiah murah untuak dicaliak dek panonton.[4]

Alaik musik nan digunoan untuak mangiriangi tari piriang ko cukuik jo rebana jo gong sajo. Pukualan gong sangaik paralu karano iko nan manjadian paduan antaro panari untuak manantuan garak jo langkahnyo katiko manari. Pado umumnyo katiko di acara baralek, kumpulan rebana nan mangiriangi jo mangarak pasangan nan baralek diagia tangguangjawab juo untuak mangiaringi pasambahan tari piriang. Numun, dalam kaadaan tatantu tari piriang ko buliah juo diiriangi dek alaik musik lain sarupo talempong jo gandang.[4]

Rujuakan[suntiang | suntiang sumber]

  1. http://www.tandfonline.com/doi/abs/10.1080/17411912.2014.926632?journalCode=remf20#.U7T_tShy5So
  2. Yunita, Niken Widya. "Mengenal Tari Piring yang Melegenda". detikTravel (dalam bahasa Indonesia). Diakses tanggal 2020-10-27. 
  3. http://www.tandfonline.com/doi/abs/10.1080/17411912.2014.926632?journalCode=remf20#.U7T_tShy5So
  4. a b c d e Piliang, Edison (2013). Tambo Minangkabau, Budaya dan Hukum Adat di Minangkabau. Bukittinggi: Kristal Multimedia. pp. 369-374. ISBN 978-979-18327-1-7. 
  5. www.detiknews.com Orang Rusia Tak Percaya Tari Piring Asli

Caliak pulo[suntiang | suntiang sumber]