Siti Manggopoh

Wikipedia Minangkabau - Lubuak aka tapian ilimu
Siti Manggopoh
Lahia1880
Maningga1960 (umua 80)
KabangsaanBendera Indonesia Indonesia
Dikana dekPajuang kamardekaan Indonesia
AnakDalima

Siti Mangopoh (laia taun 1880 - maningga taun 1960 pado umua 80) adolah surang pajuang padusi dari Manggopoh, Agam, Sumatera Barat. Pado taun 1908, baliau malakuan palawanan kapado kabijakan ekonomi Balando malalui pajak pitih (balastiang) nan disabuik jo Parang Balastiang. Paraturan balastiang dianggap batantangan jo adaik Minangkabau. Sabab tanah adolah kapunyoan komunal atau kaum di Minangkabau.[1]

Pado tanggal 16 Juni 1908, Balando sangek kawalahan mahadok-i tokoh padusi Minangkabau ko, sahinggo mamintak bantuan ka tantara Balando nan ado di lua nagari Manggopoh.

Jo siasaik nan diatur sadamikian rupo dek Siti, baliau jo pasukannyo bahasil manewasan 53 urang sardadu panjago benteang. Sabagai padusi, Siti Manggopoh cukuik mandiri nan indak tagantuang kapado urang lain. Baliau mamanfaatan naluri kepadusiannyo sacaro cerdas untuak mancari informasi tantang kakuatan Balando tanpa hanyuik dibuai rayuan mareka. Inyo pernah mangalami konflik batin katiko ka maadoan panyarbuan ka benteang Balando. Konflik batin tu adolah antaro raso kaibuan nan dalam kapado anaknyo nan sadang arek manyusu di satu pihak jo panggilan jiwa untuak malapehan rakyaik dari kazaliman Balando di pihak lain. Namun baliau capek kalua dari situ jo mamanangan panggilan jiwanyo untuak mambantu rakyaik. Tangguang jawabnyo sabagai ibu dilaksanaan baliak sasudah malakuan panyarangan. Bahkan anaknyo, Dalima, baliau bawo malarian diri ka hutan salamo 17 hari lalu salanjuiknyo dibao pulo katiko baliau ditangkok sarato dipanjaro 14 bulan di Lubuak Basuang, Agam, 16 bulan di Pariaman, sarato 12 bulan di Padang. Mungkin karano anaknyo masih ketek atau karano alasan lainnyo, akhianyo Siti Manggopoh dibebasan. Namun suaminyo dibuang ka Manado.

Rujuakan[suntiang | suntiang sumber]

  1. Tamar Djaya (dkk). 70 Tahun Perang Kamang, Manggopoh (1978). Jakarta: Panitia Besar Peringatan Perlawanan Rakyat Minangkabau Menentang Penjajah.

Pautan lua[suntiang | suntiang sumber]