Sumatera

Dari Wikipedia baso Minang, ensiklopedia bebas
(Dialiahkan dari Pulau Sumatera)
Lompek ka: navigasi, cari
Sumatera
سوماترا
Sumatra Topography.png
Topografi pulau Sumatera
Geography
Lokasi Asia Tenggara
Koordinat 0°00′N 102°00′E / 0°N 102°E / 0; 102
Archipelago Kapulauan Nusantara
Area 470.000 km2 (181,468 sq mi)
Area rank 6th
Elevasi tatinggi 3,805 m (12.484 ft)
titiak tatinggi Kerinci
Negara
Indonesia
Provinsi Aceh, Bengkulu, Jambi, Lampung, Riau, Sumatera Barat, Sumatera Selatan, Sumatera Utara, Kepulauan Bangka Belitung, Kepulauan Riau
Koto paliang gadang Medan (pop. 2,392,922 (as of 2003))
Demografi
Populasi 45,000,000 (as of 2005)
Kapadatan 96 /km2 (249 /sq mi)
Group etnis Aceh, Batak, Lampung, Melayu, Minangkabau, Rejang

Sumatera atau Sumatra marupoan sabuah pulau nan kaanam tagadang di dunia nan talatak di bagian barat Indonesia, nan lawehnyo 470,000 km² dan pakiroan populasinyo sakita 45,000,000 jiwa. Pulau iko tanamo pulo jo namo lain yaitu Pulau Percha, Andaleh, atau Suwarnadwipa (bahaso Sanskerta, bararti "pulau ameh"). Kamudian pado Prasasti Padang Roco tahun 1286 dipahaikkan swarnnabhūmi (bahaso Sanskerta, bararti "tanah ameh") jo bhūmi mālayu ("Tanah Malayu") untuak manyabuik pulau iko. Salanjuiknyo dalam naskah Negarakertagama dari abaik ka-14 juo baliak manyabuik "Bumi Malayu" untuak pulau iko.

Etimologi[suntiang | suntiang sumber]

Asa namo Sumatera barawal dari kabaradoan Karajaan Samudera (talatak di pasisia timur Aceh). Diawali jo kunjuangan Ibnu Batutah, patualang asa Maroko ka nagari tasabuik pado tahun 1345, baliau malafalkan kato Samudera manjadi Samatrah, dan kamudian manjadi Sumatra atau Sumatera, salanjuiknyo namo iko tacantum dalam peta-peta abaik ka-16 buatan Portugis, untuak dirujuak pado pulau iko, sahinggo kamudian dikana laweh sampai kini[1].

Namo asli Sumatera, sabagaimano tacataik dalam sumber-sumber sijarah dan carito-carito rakyat, adolah "Pulau Emas". Istilah Pulau Ameh kito jumpo dalam carito Cindua Mato dari Minangkabau. Dalam carito rakyat Lampuang tacantum namo tanoh mas untuak manyabuik pulau Sumatera. Surang musafir dari Cino nan banamo I-tsing (634-713), nan batahun-tahun manatap di Sriwijaya (Palembang kini) pado abaik ka-7, manyabuik Sumatera jo namo chin-chou nan baarati "nagari ameh".

Dalam babagai prasasti, Sumatera disabuik dalam bahaso Sanskerta jo istilah: Suwarnadwipa ("pulau ameh") atau Suwarnabhumi ("tanah ameh"). Namo-namo iko alah dipakai dalam naskah-naskah India sabalun Masehi. Naskah Buddha nan tamasuak paliang tuo, Kitab Jataka, mancaritokan palauik-palauik India manyubarangi Taluak Benggala ka Suwarnabhumi. Dalam carito Ramayana dikisahkan pancarian Dewi Sinta, istri Rama nan diculik Rahwana, sampai ka Suwarnadwipa.

Para musafir Arab manyabuik Sumatera jo namo "Serendib" (tapeknyo: "Suwarandib"), transliterasi dari namo Suwarnadwipa. Abu Raihan Al-Biruni, ahli geografi Persia nan mangunjuangi Sriwijaya tahun 1030, mangatokan baso nagari Sriwijaya talatak di pulau Suwarandib. Namun ado juo urang nan mangidentifikasi Serendib jo Srilangka, nan indak pernah disabuik Suwarnadwipa.

Di kalangan banso Yunani purba, Sumatera alah dikana jo namo Taprobana. Namo Taprobana Insula alah dipakai dek Klaudios Ptolemaios, ahli geografi Yunani abaik kaduo Masehi, tapeknyo tahun 165, katiko baliau manguraikan daerah Asia Tenggara dalam karyanyo Geographike Hyphegesis. Ptolemaios manulih baso di pulau Taprobana ado nagari Barousai. Mungkin sakali nagari nan dimakasuk adolah Barus di pantai barat Sumatera, nan tanamo sajak zaman purba sabagai panghasia kapur barus.

Naskah Yunani tahun 70, Periplous tes Erythras Thalasses, mangungkapkan baso Taprobana juo dijuluaki chryse nesos, nan aratinyo ‘pulau ameh’. Sajak zaman purba para padagang dari daerah salingka Lauik Tangah alah mandatangi Nusantara, tautamo Sumatera. Di sampiang mancari ameh, mareka mancari kemenyan (Styrax sumatrana) jo kapur barus (Dryobalanops aromatica) nan wakatu itu hanyo ado di Sumatera. Sabaliaknyo, para padagang Nusantara pun alah manjajakan komoditi mareka sampai ka Asia Barat jo Afrika Timur, sabagaimano tacantum pado naskah Historia Naturalis karya Plini abaik patamo Masehi.

Dalam kitab umaik Yahudi, Melakim (Rajo-rajo), fasal 9, ditarangkan baso Nabi Sulaiman a.s. raja Israil manarimo 420 talenta ameh dari Hiram, rajo Tirus nan manjadi bawahan baliau. Ameh itu didapek dari nagari Ofir. Kitab Al-Qur’an, Surat Al-Anbiya’ 81, manarangkan baso kapa-kapa Nabi Sulaiman balayia ka “tanah nan Kami barakati atehnyo” (al-ardha l-lati barak-Na fiha).

Banyak ahli sajarah nan bapandapaik baso nagari Ophir itu talatak di Sumatera (Gunuang Ophir di Pasaman Barat, Sumatera Barat nan kini banamo Gunuang Talamau?). Paralu dicataik, kota Tirus marupoan pusek pamasaran barang-barang dari Timur Jauah. Ptolemaios pun manulih Geographike Hyphegesis badasakan informasi dari surang padagang Tirus nan banamo Marinus. Dan banyak patualang Eropa pado abaik ka-15 dan ka-16 mancari ameh ka Sumatera jo anggapan baso di sinanlah latak nagari Ofir Nabi Sulaiman a.s.

Samudera manjadi Sumatera[suntiang | suntiang sumber]

Kato nan patamo kali manyabuikkan namo Sumatra barasa dari gala surang rajo Sriwijaya Haji (rajo) Sumatrabhumi ("Rajo tanah Sumatra"),[2] manuruik barito Chino baliau mangirimkan utusan ka Chino pado tahun 1017. Pandapaik lain manyabuikkan namo Sumatera barasa dari namo Samudera, karajaan di Aceh pado abaik ka-13 dan abaik ka-14. Para musafir Eropa sajak abaik ka-15 manggunokan namo karajaan itu untuak manyabuik saluruah pulau. Samo halnyo jo pulau Kalimantan nan disabuik Borneo, dari namo Brunai, daerah bagian utara pulau itu nan mulo-mulo didatangi urang Eropa. Damikian pulo pulau Lombok tadinyo banamo Selaparang, sadangkan Lombok adolah namo daerah di pantai timur pulau Selaparang nan mulo-mulo disinggahi palauik Portugis.

Paraliahan Samudera (namo karajaan) manjadi Sumatera (namo pulau) menarik untuak ditalusuri. Odorico da Pordenone dalam kisah palayarannyo tahun 1318 manyabuikkan baso baliau balayia ka timur dari Koromandel, India, salamo 20 hari, lalu sampai di karajaan Sumoltra. Ibnu Bathutah bacarito dalam kitab Rihlah ila l-Masyriq (Pangambaroan ka Timur) baso pado tahun 1345 baliah singgah di karajaan Samatrah. Pado abaik barikuiknyo, namo nagari atau karajaan di Aceh itu diambiak aliah dek musafir-musafir lain untuak manyabuikkan saluruah pulau.

Pado tahun 1490 Ibnu Majid mambuek peta daerah sakitar Samudera Hindia dan di sinan tatulih pulau "Samatrah". Peta Ibnu Majid iko disalin dek Roteiro tahun 1498 dan maunjualah namo "Camatarra". Peta buatan Amerigo Vespucci tahun 1501 mancantumkan namo "Samatara", sadangkan peta Masser tahun 1506 mamaunjuakan namo "Samatra". Ruy d’Araujo tahun 1510 manyabuik pulau itu "Camatra", dan Alfonso Albuquerque tahun 1512 manulihkannyo "Camatora". Antonio Pigafetta tahun 1521 mamakai namo nan agak ‘bana’: "Somatra". Tatapi sangaik banyak catatan musafir lain nan labiah ‘kacau’ manulihkannyo: "Samoterra", "Samotra", "Sumotra", bahkan "Zamatra" dan "Zamatora".

Catatan-catatan urang Balando jo Inggirih, sajak Jan Huygen van Linschoten dan Sir Francis Drake abaik ka-16, salalu konsisten dalam panulisan Sumatera. Bantuak ikolah nan manjadi baku, dan kamudian disasuaikan jo lidah Indonesia: Sumatera

Sijarah[suntiang | suntiang sumber]

Urang nan babahaso Austronesia mulo-mulo tibo di Sumatera kurang labiah 500 SM, sawakatu migrasi Austronesia dari Taiwan ka Asia Tenggara. Dek posisinyo nan manjadi lalu lintas padagangan lauik India-Chino, babarapo kota-kota padagangan bakambang utamonyo di pantai timur Sumatera dan dipangaruahi dek agamo Hindu jo Buddha. Salah satu karajaan nan paliang awal dikatahui adolah Kantoli, nan bakambang di abaik ka-5 Masehi di selatan Sumatera. Kantoli tagantikan dek Karajaan Sriwijaya dan kudian dek Karajaan Samudra Pasai.

Sriwijaya marupoan monarki Buddha, bapusek di kota nan kini ko adolah kota Palembang. Karajaan iko manguasoi kapulauan Melayu sarato malakukan padagangan dan panakluakan dari abaik ka-7 hinggo ka-9, sarato mambantu manyebarkan kabudayoan Melayu ka saluruah Sumatera, Samananjuang Melayu, dan bagian barat Borneo. Karajaan Sriwijaya marupoan karajaan maritim (thalassocracy) nan mampalaweh pangaruahnyo dari pulau ka pulau. Palembang pado maso itu marupoan pusek pambalajaran nan tanamo, dan marupoan tampek patualang Chino I-Tsing baraja bahaso Sanskrit sabalun pai ka India pado 671 Masihi. Dalam pajalanan baliaknyo ka Chino, baliau juo manghabihkan maso salamo ampek tahun di Palembang untuak manarjamahkan teks agamo Buddha dan manulih dua manuskrip.

Peta Sumatera abaik ka-16

Pangaruah Sriwijaya bakurang pado abaik ka-11 salapeh diserang Karajaan Chola nan katiko itu mamarintah di India Selatan. Sumatera salanjuiknyo takluak kapado karajaan-karajaan di Jawa, yaitu patamo dek Singhasari dan kamudian dek Majapahit. Pado maso nan samo Islam masuak ka Sumatera di abaik ka-6 dan ka-7 Masehi malalui saudagar Arab dan India.[3] Manjalang akhia abaik ka-13, rajo-rajo karajaan Samudra alah mamaluak agamo Islam. Iko disaksikan dek Marco Polo nan singgah di pulau iko di tahun 1292 dan dek Ibnu Battuta nan singgah duo kali sapanjang 1345-1346. Karajaan Samudera digantikan dek Kasultanan Aceh nan kuek, nan tagak hinggo abaik ka-20.

Kadatangan Balando alah mambuek banyak nagari-nagari di pulau Sumatera sacaro baransua-ansua jatuah di bawah kuaso mareka, namun Kasultanan Aceh di utara pulau marupoan halangan utamo, nan manyababkan Balando talibek dalam Parang Aceh (1873-1903) nan lamo jo maha. Kabanyakan Sumatera jatuah di bawah pamarintahan Hindia Balando, dan manjadi pangasia utamo lado, gatah, jo minyak. Pado awal jo patangahan abaik ka-20, ahli akademik dan pamimpin Sumatera manjadi tokoh-tokoh pantiang dalam pagerakan kamardekaan Indonesia.

Geografis[suntiang | suntiang sumber]

Gunuang Kerinci, titiak tatinggi di Sumatera

Pulau Sumatera talatak di bagian barat gugusan kapulauan Nusantara. Di sabalah utara babatehan jo Teluk Benggala, di timur jo Selat Malaka, di sabalah selatan jo Selat Sunda, sarato di sabalah barat jo Samudra Hindia. Di sabalah timur pulau, banyak ditamui rawo nan dialiri dek sungai-sungai gadang nan bamuaro di sinan, antaro lain Asahan (Sumatera Utara), Sungai Siak (Riau), Kampar, Inderagiri (Sumatera Barat, Riau), Batang Hari (Sumatera Barat, Jambi), Musi, Ogan, Lematang, Komering (Sumatera Selatan), jo Way Sekampung (Lampung). Samantaro babarapo sungai nan bamuaro ka pasisia barat pulau Sumatera di antaronyo Batang Tarusan (Sumatera Barat), jo Ketahun (Bengkulu).

Di bagian barat pulau, tabantang pegunungan Bukit Barisan nan mambujua dari utara hinggo selatan. Sapanjang bukik barisan tadapaik gunuang-gunuang barapi nan masih aktif, saroman Geureudong (Aceh), Sinabung (Sumatera Utara), Marapi, Talang (Sumatera Barat), Gunung Kaba (Bengkulu), jo Kerinci (Sumatera Barat, Jambi). Di pulau Sumatera tadapaik pulo babarapo danau, di antaronyo Danau Laut Tawar (Aceh), Danau Toba (Sumatera Utara), Danau Singkarak, Danau Maninjau, Danau Diatas, Danau Dibawah, Danau Talang (Sumatera Barat), Danau Kerinci (Jambi) jo Danau Ranau (Lampung - Sumatera Selatan).

Daftar Gunuang di Sumatera[suntiang | suntiang sumber]

Panduduak[suntiang | suntiang sumber]

Peta suku-suku di Sumatera.

Sacaro umum, pulau Sumatera diuni dek bangso Malayu, nan tabagi ka dalam babarapo suku. Suku-suku gadang iolah Aceh, Batak, Urang Melayu, Minangkabau,Besemah, Suku Rejang, Ogan, Komering, jo Lampung. Di wilayah pasisia timur Sumatera jo di babarapo koto-koto gadang sarupo Medan, Palembang, jo Pekanbaru, banyak bamukim etnis Tionghoa. Panduduak pulau Sumatera hanyo takonsentrasi di wilayah Sumatera Timur jo dataran tinggi Minangkabau. Mato pancaharian panduduak Sumatera sabagian basa sabagai patani, nalayan, jo padagang.

Panduduak Sumatera mayoritas baagamo Islam jo saketek nan marupoan panganuik ajaran Kristen Protestan, tautamo di wilayah Tapanuli jo Toba-Samosir, Sumatera Utara. Di wilayah pakotoan, sarupo Medan, Pekanbaru, Batam, Pangkal Pinang jo Palembang, ditamui pulo babarapo urang panganuik Buddha.

Transportasi[suntiang | suntiang sumber]

Koto-koto di pulau Sumatera dihubuangkan dek tigo rueh jalan lintas, yakni lintas tangah, lintas timur, jo lintas barat, nan malintang dari utara - selatan Sumatera. Salain itu tadapaik pulo rueh jalan nan malintang dari barat - timur, co rueh Bengkulu - Palembang, Padang - Jambi, sarato Padang - Dumai.

Di babarapo bagian pulau Sumatera, kareto api marupoan sarano transportasi alternatif. Di bagian selatan, jalur kareto api bamulo dari palabuahan Panjang (Lampung) hinggo Lubuk Linggau jo Palembang (Sumatera Selatan). Di tangah pulau Sumatera, jalur kareto api hanyo tadapaik di Sumatera Barat. Jalur iko mahubuangkan antaro koto Padang jo Sawah Lunto sarato kota Padang jo kota Pariaman. Samaso kolonial Balando hinggo tahun 2001, jalur Padang - Sawah Lunto dipagunokan untuak mangangkuik batu baro. Tatapi samanjak cadangan batu baro di Ombilin mulai saketek, mangko jalur iko indak bafungsi lai. Sajak akia tahun 2006, pamarintah provinsi Sumatera Barat, baliak maaktifkan jalur iko sabagai jalur kareto wisata.

Di utara Sumatera, jalur kareto api mambantang dari koto Medan sampai ka koto Tebing Tinggi. Pado jalur iko, kareto api dipagunokan sabagai sarano maangkuik kelapa sawit jo panumpang.

Panabangan internasional dilayani dari Banda Aceh (Bandar Udara Internasional Sultan Iskandar Muda), Medan (Bandar Udara Internasional Polonia), Padang (Bandara Internasional Minangkabau, jo Palembang (Bandar Udara Internasional Sultan Mahmud Badaruddin II). Sadangkan palabuahan kapa lauik ado di Belawan (Medan), Taluak Bayur (Padang), jo Bakauheni (Lampung).

Ekonomi[suntiang | suntiang sumber]

Pulau Sumatera marupoan pulau nan kayo jo hasil bumi. Dari limo provinsi kayo di Indonesia, tigo provinsi tadapaik di pulau Sumatera, yaitu provinsi Nanggroe Aceh Darussalam, Riau jo Sumatera Selatan. Hasil-hasil utamo pulau Sumatera iolah kelapa sawit, tambakau, minyak bumi, timah, bauksit, batu baro, jo gas alam. Hasil-hasil bumi tasabuik sabagian basa diolah dek parusahoan-parusahoan asiang, misalnyo PT Caltex nan maolah minyak bumi di provinsi Riau.

Tampek-tampek pangasil barang tambang iolah :

  • Arun (NAD), mangasilkan gas alam.
  • Pangkalan Brandan (Sumatera Utara), mangasilkan minyak bumi
  • Duri, Dumai, dan Bengkalis (Riau), mangasilkan minyak bumi
  • Tanjung Enim (Sumatera Selatan), mangasilkan batu baro
  • Plaju dan Sungai Gerong (Sumatera Selatan), mangasilkan minyak bumi
  • Tanjung Pinang (Kepulauan Riau), mangasilkan bauksit
  • Indarung (Sumatera Barat), mangasilkan semen
  • Sawahlunto (Sumatera Barat), mangasilkan batubaro

Babarapo koto di pulau Sumatera, juo marupoan koto paniagoan nan cukuik penting. Medan koto tagadang di pulau Sumatera, marupoan koto paniagoan utamo di pulau iko. Banyak parusahoan-parusahoan gadang nasional nan bakantua pusaik di siko.

Provinsi di Sumatera[suntiang | suntiang sumber]

Pamarintahan di Sumatera tabagi manjadi sapuluah provinsi, manuruik urutan pambantuakannyo:

Kota Gadang[suntiang | suntiang sumber]

Barikuik 10 koto gadang di Sumatera badasakan jumlah populasi tahun 2009.[4]

Istana Maimun di Medan
Urutan Koto, Provinsi Populasi
1 Medan, Sumatera Utara 2,618,645
2 Palembang, Sumatera Selatan 1,532,855
3 Batam, Kepulauan Riau 1,137.894
4 Padang, Sumatera Barat 960,184
5 Bandar Lampung, Lampung 905,593
6 Pekanbaru, Riau 763,275
7 Jambi, Jambi 454,686
8 Bengkulu, Bengkulu 373,243
9 Banda Aceh, Aceh 287,769
10 Pematang Siantar, Sumatera Utara 209,568

Rujuakan[suntiang | suntiang sumber]

  1. ^ Nicholaas Johannes Krom, De Naam Sumatra, BKI, 100, 1941.
  2. ^ Munoz. Early Kingdoms. pp. 175. 
  3. ^ G.R. Tibbets,Pre-Islamic Arabia and South East Asia, in D.S. Richards (ed.),1970, Islam and The Trade of Asia, Oxford: Bruno Cassirer Pub. Ltd, p. 127 nt. 21; S.Q.Fatimi, In Quest of Kalah, in D.S. Richards (ed.),1970, p.132 n.124; W.P. Groeneveldt, Notes in The Malay Archipelago, in D.S. Richards (ed.),1970, p.129 n.42
  4. ^ Helders, Stefan. "Indonesia: largest cities and towns and statistics of their population". World Gazetteer. http://www.world-gazetteer.com/wg.php?x=&men=gcis&lng=en&des=wg&srt=npan&col=abcdefghinoq&msz=1500&geo=-101. Diakses pado 21 April 2009. 

Pautan lua[suntiang | suntiang sumber]