Pariangan, Pariangan, Tanah Datar

Wikipedia Minangkabau - Lubuak aka tapian ilimu

0°25′59″S 100°30′18″E / 0.433098°S 100.50499°E / -0.433098; 100.50499.

Pariangan
Nagara Indonesia
ProvinsiSumatera Barat
KabupatenTanah Datar
KecamatanPariangan
Laweh17,92 km²
Panduduak5,624 urang (2010)
Perkampungan di nagari pariangan

Pariangan adolah sabuah nagari nan talatak di kecamatan Pariangan, Kabupaten Tanah Datar, Provinsi Sumatera Barat. Nagari ko talatak di lereang Gunuang Marapi, katinggian 500-700 meter di ateh pamukaan lauik. Manuruik Tambo Alam Minangkabau, Pariangan adolah nagari nan paliang tuo di Ranah Minang.

Salah satu sudut nagari Pariangan

Nagari iko tamasuak nan paliang dalam manjago ̻Rumah Gadang, sahinggo sampai kini masih banyak basobok nan tajago elok. Di nagari iko juo masih basobok surau, nan masih manjadi tampek tingga basamo untuak laki-laki nan alun manikah.

Pado bagian tangah dari nagari iko masih tagak sabuah masajik tradisional nan cukuik gadang nan dipakirokan alah ado di awal abaik kasambilan baleh, di mano pado masajik tasabuik tadapek tampek mandi umum baraia angek nan masih digunokan sampai kini. Di Nagari iko juo tadapek situs cagar budayo baru Tungku Tigo Sajarangan.

Pado Mei 2012, Nagari Pariangan tapiliah sabagai salah satu dari limo desa tarindah di dunia versi Budget Travel, sabuah majalah pariwisata internasional.[1]

Nagari Pariangan talatak di Lereng Gunuang Marapi, tapeknyo di Kecamatan Pariangan, Kabupaten Tanah Datar, Provinsi Sumatra Barat. Lokasinyo bajarak 95 kilometer dari Kota Padang, 35 kilometer dari Kota Bukiktinggi. Nagari Pariangan talatak di antaro Kota Batusangkar jo Padang Panjang. Nagari Pariangan mampunyoi lueh sakitar 17,97 kilometer pasagi.

Nagari Pariangan mampunyoi Kaindahan nan sangaik asri, dipajalanan Nagari Pariangan banyak tadapek sawah nan subua sarato batang kayu nan rimbun, satiok bajalan satiok itu pulo basarobok jo rumah gadang.

Indak hanyo rumah-rumah nan manjadi daya tariak desa Nagari Pariangan. Masajik Ishlah nan dibangun pado abaik ka-19 pun turuik maundang pangunjuang. Bangunan tatuo nan dibangun dek Syekh Burhanuddin nan marupokan saurang ulama di Minang nan indak maadopsi rumah gadang sabagai arsitektur atoknyo, malainan arsitekturnyo manyarupoi kuil-kuil di Tibet. Masajik tuo ko alah maalami renovasi sabanyak duo kali, pado taun 1920 jo 1994. Nan samakin mambuek masajik ko unik adolah Pancuan Aia Angek langsuang dari Gunuang Marapi. Aia ko dapek digunoan dek umaik Muslim untuak mansucian diri. Pancuan ko dianggap sabagai sabuah barokah dek masyarakaik Nagari Pariangan.

Nagari Pariangan manjadi desa pertanian partamo di Minang, kasuburan tanahnyo indak paralu diraguan baliak. Batani manjadi sumber pangan masyarakaik Nagari Pariangan. Untuak manghormati laluhua sarato jo manjunjuang tinggi paninggaan sijarah, sapetak sawah dijadian situs paninggalan. Sawah Gadang Satampang Baniah nan marupokan sawah partamo nan dibukak dek Datuak Tantajo Garhano (leluhua masyarakaik Minang) nan dijadian cagar budayo dek masyarakaik satampek. Itu marupokan sabuah bukti kalau masyarakaik Nagari Pariangan sangaik manghormati situs-situs basijarah warisan dari leluhua. Sawah partamo tasabuik talatak di ujuang jalan utamo Jorong Pariangan.

Ado nan rancak di Nagari Pariangan, Makam Datuak Tantajo Garhano nan marupokan situs sijarah di wilayah Jorong Pariangan. Uniknyo, indak sarupo makam lain, makam tokoh adaik ko taruih barubah panjang jo lebanyo satiok diukua. Masyarakaik dalam menjago tampek paristirahatan tarakhia tokoh adaik ko, mambuek area makam labiah rancak disabuik taman. Tapi, karano makam tasabuik adolah wilayah sakral, jadi pangunjuang hanyo dapek maliek dari lua paga.[2]

Rujuakan[suntiang | suntiang sumber]

Pautan lua[suntiang | suntiang sumber]